އިޓާލިއަން ސެރީއާގެ ލާޒިއޯއިން ކޯވިޑް 19 ގެ ޕްރޮޓޮކޯލްތަކަށް އަމަލުކޮށްފައިނުވުމާގުޅިގެން އެކްލަބް ޖޫރިމަނާކޮށްފިއެވެ. ލާޒިއޯ ޖޫރިމަނާކޮށްފައިވަނީ ސަތޭކަ ފަންސާސް ހާސް ޔޫރޯއިންނެވެ.
އިޓާލިއަން ފުޓްބޯލް ފެޑެރޭޝަނުން ކުރިއަށް ގެންދިޔަ ތަހްގީގަށް އެނގިފައިވާގޮތުގައި ލާޒިއޯއިންވަނީ އެކްލަބްގެ ބައެއް ކުޅުންތެރިންނަށް ކޮރޯނާ ވައިރަސް ޖެހިފާވާކަން ކަމާބެހޭ ސިއްހީ ފަރާތްކަށް ނުއަންގާ ސިއްރުކޮށްފައެވެ. އަދި ކޮރޯނާ ވައިރަސް ޖެހިފައިވާ ތިން ކުޅުންތެރިޔަކަށް ތަމްރީންތަކުގައި ބައިވެރިވުމުގެ ފުރުސަތުވެސް އެކްލަބުން ދީފައިވާކަންވަނީ ހާމަވެފައެވެ. އަދި ދެފަހަރެއްގެ މަތިން ސިމްޕްޓަމްސް ހުރިކަމަށް ބެލެވޭ ކުޅުންތެރިން އެކަހެރި ކުރުމުގެ ބަދަލުގައި އެކުޅުންތެރިން ލައްވާ ކުޅުވާފައިވާކަންވެސް ހާމަވެފައިވެއެވެ. މިކަންތަކާއި ގުޅިގެން ކްލަބްގެ ދެ ޑޮކްޓަރަކުވަނީ 12 މަހަށް ސަސްޕެންޑްވެސް ކޮށްފައެވެ. އަދި ކްލަބްގެ ރައީސް ކްލައުޑިއޯ ލޮޓީޓޯވަނީ ހަތް މަސް ވަންދެން ފުޓްބޯޅައިގެ އެއްވެސް ހަރާކާތެއްގައި ބައިވެރިވުން މަނާކޮށްފައެވެ.
ލާޒިއޯއިން ހާމަކުރިގޮތުގައި ފުޓްބޯޅަ ފެޑެރޭޝަންގެ މިނިންމުމާ ދެކޮޅަށް އެކްލަބުން އެޕީލް ކުރާނެކަމަށެވެ. ލާޒިއޯއިން ކޮރޯނާ ވައިރަހުގެ ޕްރޮޓޮކޯލްތަކާއި ހިލާފުވާކަން ހާމަވުމާއި ގުޅިގެން ކަމާބެހޭ ފަރާތްތަކުން ލާޒިއޯގެ ޓްރެއިނިންގ ދަނޑުތައް އިންސްޕެކްޓް ކޮށް އަދި ސްވެބް ޓެސްޓްތައް ނަގާފައިވަނީ މިދިޔަ އަހަރުގެ ނޮވެމްބަރުމަހުއެވެ. އަދި އިޓާލިއަން ފުޓްބޯލް ފެޑެރޭޝަނުން މިދިޔަ މަހު ފިޔަވަޅުތައް އަޅަން ނިންމި ކަމުގައިވިޔަސް އެފަރާތުން މަޑުކުރީ ކޯޓަށް ހުށަހަޅާ ކޯޓުން ބުނާއެއްޗަކަށެވެ. އަދި ކޯޓުން އިއްޔެވަނީ އެފަރާތުގެ ނިންމުން އާންމުކޮށްފައެވެ. ނަމަވެސް ލާޒިއޯއިން ހާމަކުރާގޮތާއި ޕްރޮޓޮކޯލްތަކާއި ހިލާފަށް އެކްލަބުން އެއްވެސް ކަމެއް ކޮށްފައިނުވެއެވެ.