ޕިސްޓަންސްއާ ވާދަކޮށް ނެޓްސް މެޗް ކާމިޔާބުކޮށްފި

އެންބީއޭ ބާސްކެޓްބޯޅަ މުބާރާތުގައި ބްރޫކްލިން ނެޓްސް އާއި ޑެޓްރެއިޓް ޕިސްޓަންސް ބައްދަލުކުރިމެޗް ނެޓްސް ކާމިޔާބުކޮށްފިއެވެ. މިމެޗް ނެޓްސް ކާމިޔާބުކުރީ 113 ޕޮއިންޓް 111 ޕޮއިންޓުންނެވެ.

ދެޓީމްގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ މިމެޗްގައި ނެޓްސްއަށް އެންމެ ރަނގަޅު ކުޅުމެއް ދެއްކީ އެޓީމަށް 44 ޕޮއިންޓް ހޯދައިދީ 14 ރީބައުންޓް ނަގާ 8 އެސިސްޓް ދިން ޖޭމްސް ހާޑެންއެވެ. އަދި ޕިސްޓަންސްއަށް އެންމެ ރަނގަޅު ކުޅުމެއް ދެއްކީ 13 ޕޮއިންޓް ހޯދައިދީ 10 ރީބައުންޑް ނެގި މޭސަން ޕްލަމްލީއެވެ.

މިމުބާރާތުގައި ޔޫޓާ ޖޭޒް އާއި މެމްފިސް ގްރިޒްލީސް ބައްދަލުކުރިމެޗް 117 ޕޮއިންޓް 114 ޕޮއިންޓުން ކާމިޔާބުކުރީ ޖޭޒްއެވެ. މިއީ މިސީޒަންގައި އެންމެ ރަނގަޅު ކުޅުމެއް ދައްކަމުން އަންނަ ޖޭޒް ކާމިޔާބުކުރި 33 ވަނަ މެޗެވެ. މިމެޗްގައި ޖޭޒްއަށް އެންމެ ރަނގަޅު ކުޅުމެއް ދެއްކީ 35 ޕޮއިންޓް ހޯދައިދިން ޑޮނޮވަން މިޝޭލްއެވެ. އަދި ގްރިޒްލީސްއަށް އެންމެ ރަނގަޅަށް ކުޅުނީ 32 ޕޮއިންޓް ހޯދައިދީ 11 އެސިސްޓް ދިން ޖޭ މޮރާންޓްއެވެ. މީގެއިތުރުން އެންމެ ފަހުގެ ޗެމްޕިއަން ލޮސް އެންޖަލިސް ލޭކަރސް އާއި ކްލީވްލަންޑް ކެވެލިއަރސް ބައްދަލުކުރިމެޗް 100 ޕޮއިންޓް 86 ޕޮއިންޓުން ކާމިޔާބުކުރީ ލޭކަރސްއެވެ. މިމެޗްގައި ލޭކަރސްއަށް އެންމެ ރަނގަޅު ކުޅުމެއް ކެއްކީ އެޓީމަށް 24 ޕޮއިންޓް ހޯދައިދީ 10 ރީބައުންޑް ނެގި މޮންޓްރެޒްލް ހެރެލްއެވެ. އަދި ކެވެލިއަރސްއަށް އެންމެ ރަނގަޅު ކުޅުމެއް ދެއްކީ 17 ޕޮއިންޓް ހޯދައިދީ 10 ރީބައުންޑް ނެގި ލެރީ ނޭންސް ޖޫނިއަރއެވެ.

މިމުބާރާތުގައި ކުޅުނު އެހެން މެޗްތަކަށް ބަލާލާއިރު އެޓްލާންޓާ ހޯކްސް އާއި ގޯލްޑަން ސްޓޭޓް ވޮރިއަރސް ބައްދަލުކުރިމެޗް 124 ޕޮއިންޓް 108 ޕޮއިންޓުން ހޯކްސް ކާމިޔާބުކުރިއިރު ފީނިކްސް ސަންސް އާއި ޓޮރޮންޓޯ ރެޕްޓަރސް ބައްދަލުކުރިމެޗް 104 ޕޮއިންޓް 100 ޕޮއިންޓުން ކާމިޔާބުކުރީ ސަންސްއެވެ. އަދި ބޮސްޓަން ސެލްޓިކްސް އާއި މިލްވައުކީ ބަކްސް ބައްދަލުކުރިމެޗް 122 ޕޮއިންްޓް 114 ޕޮއިންޓުން ސެލްޓިކްސް ކާމިޔާބުކުރިއިރު ޕޯޓްލަންޑް ޓްރެއިލް ބްރޭޒަރސް އާއި އޯލަންޑޯ މެޖިކް ބައްދަލުކުރިމެޗް 112 ޕޮއިންޓް 105 ޕޮއިންޓުން ކާމިޔާބުކުރީ ޓްރެއިލް ބްލޭޒަރސްއެވެ. ޑެންވަރ ނަގެޓްސް އާއި ނިއުއޯލިއަންސް ޕެލިކަންސް ބައްދަލުކުރިމެޗް 113 ޕޮއިންޓް 108 ޕޮއިންޓުން ނަގެޓްސް ކާމިޔާބުކުރިއިރު އިންޑިއާނާ ޕޭސަރސް އާއި ޑެލަސް މެވްރިކްސް ބައްދަލުކުރިމެޗް 109 ޕޮއިންޓް 94 ޕޮއިންޓުން ކާމިޔާބުކުރީ ޕޭސަރސްއެވެ.