އެމެރިކާގެ ޚާރިޖީ ސިޔާސަތަށް އޮތް އެންމެ ބޮޑު ގޮންޖެހުމަކީ އުތުރު ކޮރެޔާގެ މައްސަލަކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
މާރިޗު މަހުގެ 25ވަނަ ދުވަހު އުތުރު ކޮރެޔާއިންވަނީ އަނެއްކާވެސް ބެލިސްޓިކު މިސައިލުތަކެއް ތަހުލީލުކޮށްފައެވެ. މިއީ މިދިޔަ ޖަނަވަރީ މަހުގެ ތެރޭގައި އެމެރިކާގެ ވެރިކަމާ ބައިޑަން ޙަވާލުވެވަޑައިގެންނެވިފަހުން އުތުރު ކޮރެޔާއިން ކުރި ފުރަތަމަ މިސައިލު ތަހުލީލެވެ. އުތުރު ކޮރެޔާގެ ޢަމަލުތަކުގެ ސަބަބުން އެ ޤައުމުން ހަތިޔާރު އުފެއްދުމުގެ މަސައްކަތް އިތުރުކުރަމުންދާކަންވަނީ ސާފުވެފައެވެ. އުތުރު ކޮރެޔާއާމެދު އެމެރިކާއިން ގެންގުޅޭނެ ސިޔާސަތެއް ކަނޑައެޅުމުގެ މަސައްކަތް އެމެރިކާގެ ސަރުކާރުން ކުރަމުންދާ ދަނޑުވަޅެއްގައި އެމެރިކާއަށް ފިއްތުންތައް ކުރިމަތިކުރުވުމަށް އުތުރު ކޮރެޔާއިން ކުރާ މަސައްކަތްތައްވަނީ އިތުރުވެފައެވެ.
އުތުރު ކޮރެޔާއިން ކުރި މިސައިލު ތަހުލީލުތަކާ ގުޅޭގޮތުން ނޫސްވެރިންނާ ވާހަކަދައްކަވަމުން ބައިޑަން ވިދާޅުވީ އުތުރު ކޮރެޔާއިން މިސައިލު ތަހުލީލު ކުރީ އދގެ 1718ވަނަ ޤަރާރާ ޚިލާފަށްކަމަށެވެ. 2006ވަނަ އަހަރުގެ ތެރޭގައި އދން ފާސްކުރި ޤަރާރުގެ ދަށުން މިސައިލާއި ނިއުކުލިޔާ ތަހުލީލުތައް ކުރުން އުތުރު ކޮރެޔާއަށްވަނީ މަނާކޮށްފައެވެ.
އެ ޤަރާރާއި ޚިލާފަށް އުތުރު ކޮރެޔާއިން ޢަމަލުކުރި ނަމަވެސް އުތުރު ކޮރެޔާއެކު މަޝްވަރާކޮށް ދެ ޤައުމުގެ ދެމެދުގައި ގުޅުން ބޭއްވުމަށް ބޭނުންވާކަމަށް ބައިޑަން ވިދާޅުވިއެވެ. ނަމަވެސް އުތުރު ކޮރެޔާގެ ޢަމަލުތައް ނުހުއްޓާނަމަ ފިޔަވަޅު އަޅަންޖެހޭނެކަމަށް އޭނާ ވިދާޅުވިއެވެ. އުތުރު ކޮރެޔާއާއެކު ގުޅުން ބޭއްވޭނީ އެ ޤައުމުން ނިއުކުލިޔާ ހަތިޔާރު ގެންގުޅުން ހުއްޓާލުމަށް އެއްބަސްވުމުންކަމަށް ބައިޑަން ވިދާޅުވިއެވެ.