މި ރަމަޞާންމަހު މިސްކިތްތަކުގައި ޙިފްޛުކޮށް ތަރާވީޙް ނަމާދުކުރުމަށް ރާއްޖެއިން ބޭރުން ގެންނަ ޙާފިޒުންނާއި ޤާރީންގެ ވީޒާގެ ކަންކަން ހަމަޖެއްސުމަށް އޮންލައިން ޕޯޓަލް "އިމުގާ" މެދުވެރިކޮށް ހުށަހެޅުމަށް އިމިގްރޭޝަނުން އެދިއްޖެއެވެ.
ވީޒާއަށް އެދި ހުށަހަޅާއިރު ކައުންސިލް އިދާރާއިން ފުރިހަމަކުރަންޖެހޭ "ސްޕެޝަލް ވީޒާ"އަށް އެދޭފޯމާއި ވީޒާއަށް އެދޭ ފަރާތުގެ މަޢުލޫމާތު ފޯމާއި، މިނިސްޓްރީ އޮފް އިސްލާމިކް އެފެއަރޒްއިން ދޫކުރާ ހުއްދައިގެ އިތުރުން ބިދޭސީ ފަރާތުގެ "ޕާސްޕޯޓް ޑާޓާ ޕޭޖް"ގެ ކުލަ ކޮޕީ އަދި ބިދޭސީ މީހާގެ ޕާސްޕޯޓް ފޮޓޯ ހުށަހަޅަންޖެހޭނެކަމަށް އިމިގްރޭޝަނުން މަޢުލޫމާތުދެއެވެ.
ރާއްޖެ ގެންނަން ފޯމު ހުށަހަޅާ ޙާފިޒު ނުވަތަ ޤާރީއަށް ހުއްދަ ދޭނަމަ އެކަން، 7 ދުވަހުގެ ތެރޭގައި ސިސްޓަމް މެދުވެރިކޮށް އަންގާނެކަމަށް އިމިގްރޭޝަނުން ބުނެއެވެ.
ރާއްޖެ ގެންނަ ފަރާތުގެ އާއިލާގެ މެންބަރަކު(އަނބިން/ދަރިން) ގެންނަނަމަ، އެ ފަރާތްތަކަށް ދަތުރުކުރެވޭނީ ޙާފިޒު/ޤާރީ ގެންނަ އިދާރާއަކުން އެމީހުން ސްޕޮންސަރކޮށްގެންނެވެ. އިމިގްރޭޝަނުން ވިދާޅުވީ މި ފަރާތްތަކަށް ދޫކުރާނީ 30 ދުވަހުގެ ޓުއަރިސްޓް ވީޒާއެއްކަމަށެވެ. އަދި 30 ދުވަހަށްވުރެ އިތުރުވާނަމަ، ވީޒާ ހަމަވުމުގެ ކުރިން މުއްދަތު އިތުރުކުރަންޖެހޭނެކަމަށް އިމިގްރޭޝަނުން ބުނެއެވެ.
އިމިޤްރޭޝަނުން ބުނީ މި ފަރާތްތަކުން ރާއްޖޭގައި ތިބޭ މުއްދަތުގައި ވީޒާގެ ކަންކަން ޤަވައިދާ އެއްގޮތަށް ފުރިހަމަކުރުމަކީ، އެމީހަކު ރާއްޖެ ގެންނަ މީހެއްގެ ޒިންމާއެއްކަމަށެވެ.