ޔޫއޭއީގެ ބޮޑުވަޒީރުގެ ނައިބު އަދި ޔޫއޭއީގެ މާލީ ވަޒީރު ޝައިޚު ޙަމްދާން ބިން ރާޝިދު އަލްމަކުތޫމް އަވަހާރަވެއްޖެއެވެ.
ޝައިޚު ޙަމްދާން ބިން ރާޝިދު އަލްމަޚްތޫމަކީ ދުބާއީގެ ވެރިޔާ ޝައިޚު މުޙައްމަދު ބިން ރާޝިދު އަލްމަކުތޫމްގެ ބޭބޭފުޅެވެ. އޭނާ އަވަހާރަވީ އާލާސްކަންފުޅާ ގިނަ ދުވަސްތަކެއްގައި އުޅުއްވުމަށްފަހުއެވެ. އޭނާގެ އާލާސްކަންފުޅަށް ފަރުވާ ހޯއްދެވުމަށް ޤައުމުން ބޭރަށް ދަތުރުކުރައްވައި މިދިޔަ އޮކްޓޯބަރު މަހުގެ ތެރޭގައި އޮޕަރޭޝަނެއްވެސް ކުރެއްވިއެވެ. އޭނާ އަވަހާރަވީ އުމުރުފުޅުން 75ގައެވެ.
ޝައިޚު ހަމްދާން އަވަހާރަވުމުން ދުބާއީގައި ހުންނަ ސަރުކާރުގެ އިދާރާތައް ތިން ދުވަހުގެ މުއްދަތަށް ބަންދުކުރުމަށްވަނީ ނިންމައިފިއެވެ. ދިހަ ދުވަހުގެ މުއްދަތަށް ބައި ދަނޑިއަށް ދިދަ ތިރިކޮށް ހިތާމަ ފައުޅުކުރާނެކަމަށް ދުބާއީގެ ސަރުކާރުންވަނީ އިޢުލާނުކޮށްފައެވެ. ކޯވިޑް-19ގެ ބަލިމަޑުކަމުގެ ސަބަބުން ޝައިޚު ޙަމްދާންގެ ޖަނާޒާގައި ބައިވެރިވާނީ ޢާއިލީ ބޭފުޅުން އެކަންޏެވެ.
ޔޫއޭއީގެ މާލީ ވަޒީރުގެ މަޤާމަށް ޝައިޚު ޙަމްދާން ޢައްޔަންކުރެއްވުނީ 1971ވަނަ އަހަރުއެވެ. އެމަނިކުފާނަކީ ޔޫއޭއީގެ ކުރިއެރުމާ ތަރައްޤީއަށް ގިނަގުނަ މަސައްކަތްތަކެއް ކުރައްވާފައިވާ ބޭފުޅެކެވެ.