ލުބުނާނުގައި ސަރުކާރެއް އެކުލަވާލެއްވުމަށް ކުރައްވަމުންދާ މަސައްކަތަށް އެ ޤައުމުގެ ރައީސް މިޝާލް ޢައޫން ނުފޫޒު ފޯރުވުމަށް މަސައްކަތްކުރައްވާކަމަށް ސަޢުދު އަލްޙަރީރީ ވިދާޅުވެއްޖެއެވެ.
މިދިޔަ އަހަރުގެ އޮގަސްޓު މަހުގެ ތެރޭގައި ލުބުނާނުގެ ބައިރޫތުގައި ހިނގި ބޮޑު ގޮވުމަށްފަހު އެ ޤައުމުގެ ސަރުކާރު އިސްތިޢުފާ ދިނެވެ. އޭގެ ފަހުން އޮކްޓޯބަރު މަހުގެ ތެރޭގައި ބޮޑުވަޒީރުގެ މަޤާމަށް ސަޢުދު އަލްޙަރީރީ ޢައްޔަންކުރުމަށްވަނީ ނިންމައިފައެވެ. ނަމަވެސް ޙަރީރީއާއި ޢައޫންއާ ދެމެދު އޮންނަ ސިޔާސީ ވާދަވެރިކަމުގެ ސަބަބުން ވަޒީރުންގެ މަޖިލިސް އެކުލަވާލެއްވުމަށް ޙަރީރީއަށްވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.
ރައީސް ޢައޫންވަނީ އައު ސަރުކާރު އެކުލަވާލެވިދާނެ ބައެއް ގޮތްތައް ޙަރީރީއާ ޙިއްޞާ ކުރައްވައިފައެވެ. އެގޮތުން ޢައޫންވަނީ ވަޒީރުންގެ މަޖިލީހަށް 18އާއި 22އާ ދެމެދުގެ ޢަދަދަކަށް ވަޒީރުން ޢައްޔަނުކުރުމަށް ހުށަހަޅުއްވައި އެ މަޤާމުތަކަށް ޙަރީރީ ޢައްޔަނުކުރައްވާނެ ބޭފުޅުންގެ ނަންތައް ލިޔުއްވުމަށް ފޯމެއް ފޮނުއްވައިފައެވެ.
އެކަމާ ގުޅޭގޮތުން ޙަރީރީ ވިދާޅުވީ ޢައޫން މަސައްކަތް ކުރައްވަނީ ވަޒީރުންގެ މަޖިލިސް އެކުލަވާލުމަށް ކުރައްވައި މަސައްކަތަށް ނުފޫޒު ފޯރުވައި ބައެއް ސިޔާސަތުތައް ހުއްޓުވުމުގެ ބާރު އޭނާގެ ވާގިވެރިންނަށް ދެއްވުމަށްކަމަށެވެ. އެއީ ބަލައިގަނެވޭނެ ކަމެއް ނޫންކަމަށާއި ވަޒީރުންގެ މަޖިލިސް އެކުލަވާލުމުގައި ބޮޑުވަޒީރުގެ ދަޢުރަކީ ރައީސް ފޮނުއްވައި ލިސްޓެއް ފުރާލުން ނޫންކަމަށް އޭނާ ވިދާޅުވިއެވެ.
ސަރުކާރެއް ޤާއިމު ނުކުރެވި ދިގު ލައިގެން ދިޔުމުން ލުބުނާނުގެ އިޤްތިޞާދީ މައްސަލަތައްވަނީ އިތުރުވެފައެވެ. ޢައޫންއާ ދެބަސްވުންތަކެއް އުފެދިފައިވާކަން ހާމަކުރައްވައި ޙަރީރީ ދެއްކެވި ވާހަކަފުޅުތަކަށްފަހު ލުބުނާނުގެ ފައިސާގެ އަގުވަނީ އިތުރަށް ވެއްޓިފައެވެ. ސަރުކާރެއް ޤާއިމު ނުކުރެވޭނަމަ ލުބުނާނުގެ އިޤްތިޞަދީ ޙާލަތުން އަރައިގަތުމަށް ބޭނުންވާ ބައިނަލްއަޤްވާމީ އެހީތެރިކަން ހޯދުމުގައި އެ ޤައުމަށް ބޮޑެތި އުނަދަގޫތަކަކާ ކުރިމަތިލާން ޖެހޭނެއެވެ.