ދުނިޔޭގެ އެންމެ ވަރުގަދަ އަސްކަރިއްޔާ އޮތީ ޗައިނާގައިކަމަށް ދިރާސާއަކުން ދައްކައިފިއެވެ.
ދިފާޢީ ކަންކަމާގުޅޭ ވެބުސައިޓެއްކަމަށްވާ މިލިޓަރީ ޑައިރެކްޓުގައި ޝާޢިއުކޮށްފައިވާ ދިރާސާއެއްގައި ބުނީ ދުނިޔޭގައި އަސްކަރީގޮތުން އެންމެ ވަރުގަދަ ޤައުމަކީ ޗައިނާކަމަށެވެ. އެ ދިރާސާގައި ޕޮއިންޓު ދީފައިވާ އުސޫލުގެ ދަށުން ޗައިނާއަށް 82 ޕޮއިންޓު ލިބުނުވެ. އަސްކަރިއްޔާއަށް އެންމެ ބޮޑު ހޭދައެއް ކުރާ އެމެރިކާ އޮތީ 74 ޕޮއިންޓާއެކު ލިސްޓުގެ ދެވަނާގައެވެ. އަދި 69 ޕޮއިންޓާއެކު ތިން ވަނައިގައި އޮތީ ރަޝިޔާއެވެ. ހަތަރުވަނައިގައި އޮތް އިންޑިޔާއަށް ލިބުނީ 61 ޕޮއިންޓެވެ.
ޤައުމުތަކުގެ އަސްކަރިއްޔާގެ ވަރުގަދަކަން ބެލުމުގައި ދިރާސާގައި ބަލާފައިވަނީ އަސްކަރިއްޔާއަށް ކުރާ ހޭދައާއި ޚިދުމަތުގައި ތިބި ސިފައިންގެ ޢަދަދާއި ވަޔާއި ކަނޑާއި އެއްގަމު ސިފައިންގެ އަސްކަރީ ވަޞީލަތްތަކާއި މުސާރައާއި އެހެނިހެން އެފަދަ ކަންކަމުގެ މައްޗަށެވެ. ޤައުމުތަކުގައި ލިބެންހުރި އަސްކަރީ ވަޞީލަތްތަކަށް ބަލައިނަމަ ކަނޑުމަތީގައި ހިނގާ ކުރިމަތިލުމެއް ކާމިޔާބު ކުރާނީ ޗައިނާއިންކަމަށާއި ވައިގެ ކުރިމަތިލުންތަކުގައި ކުރި ހޯދާނީ އެމެރިކާއިންކަމަށް އެ ދިރާސާއިން ބުނެއެވެ. އަދި އެއްގަމުގައި ހިނގާ ކުރިމަތިލުމެއްގައި ކާމިޔާބު ހޯދާނީ ރަޝިޔާއިންކަމަށްވެސް އެ ދިރާސާގައި ބުނެފައިވެއެވެ.
މިލިޓަރީ ޑައިރެކްޓުގެ ދިރާސާގައި ބުނީ އަސްކަރިއްޔާއަށް އެންމެ ބޮޑު ހޭދައެއް ކުރާ އެމެރިކާއިން އަހަރަކު 732 ބިލިއަން އެމެރިކާ ޑޮލަރު ޚަރަދު ކުރާކަމަށެވެ. އަސްކަރިއްޔާއަށް ދެވަނައަށް އެންމެ ބޮޑު ހޭދައެއް ކުރަނީ ޗައިނާއިންނެވެ. އެ ޤައުމުން އަހަރަކު 261 ބިލިއަން އެމެރިކާ ޑޮލަރު ޚަރަދު ކުރެއެވެ. ތިން ވަނައިގައި އޮތް އިންޑިޔާއިން ޚަރަދުކުރަނީ އަހަރަކު 71 ބިލިއަން އެމެރިކާ ޑޮލަރެވެ