އިޓާލިއަން ސެރީއާގައި އޭސީ މިލާނާއި ފިއޮރެންޓީނާ ބައްދަލުކުރިމެޗް މިލާން ކާމިޔާބުކޮށްފިއެވެ. ފިއޮރެންޓީނާގެ ދަނޑުގައި ކުޅުނު މިމެޗް މިލާން ކާމިޔާބުކުރީ 3 ލަނޑު 2 ލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 9 ވަނަ މިނެޓްގައި ޖަހައިދިނީ މިލާންގެ ތަޖްރިބާކާރު ފޯވަޑް ޒްލަޓާން އިބްރަހިމޮވިޗެވެ. މިއީ އަނިޔާގައި ވޭތުވެދިޔަ މަހެއްހާ ދުވަހު ކުޅުމާއި ދުރުގައި ހުރުމަށްފަހު އެނބުރި އައިސް ފުރަތަމަ އެގާރައިގާ ހިމެނިގެން އިބްރަހިމޮވިޗް ކުޅުނު ފުރަތަމަ މެޗެވެ. ނަމަވެސް މިލަނޑު ޖެހިތާ 8 މިނެޓްފަހުން ލިބުނު ހިލޭޖެހުމަކުން ފިއޮރެންޓީނާވަނީ މެޗްގެ ނަތީޖާ ހަމަހަމަކޮށްފައެވެ. މިލަނޑު އެޓީމަށް ޖަހައިދިނީ އެރިކް ޕުލްގަރއެވެ. އަދި މެޗްގެ 51 ވަނަ މިނެޓްގައި ފްރޭންކް ރިބަރީ ޖަހައިދިން ލަނޑާއެކު މިމެޗްގައި ފިއޮރެންޓީނާއިން ލީޑު ނެގިއެވެ.
ފިއޮރެންޓީނާއިން ލަނޑު ޖެހިތާ 6 މިނެޓްފަހުން މިލާނުންވަނީ މެޗްގެ ނަތީޖާ ހަމަހަމަކޮށްފައެވެ. މިލަނޑު އެޓީމަށް ޖަހައިދިނީ ޑިއާޒްއެވެ. އަދި މިމެޗުން މިލާން މޮޅުވި ލަނޑު މެޗްގެ 72 ވަނަ މިނެޓްގައި ޖަހައިދިނީ ހަކާން ޗަލަނޮގްލޫއެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބިގެންދިޔައެވެ. އަދި ގޯލްގެ ދަނޑިއަށްވެސް ބައެއް ހަމަލާތައް އަމާޒުވެފައިވެއެވެ.
މިކާމިޔާބީއާއެކު މިލާން މިވަނީ އެއްވަނައިގާ އުޅޭ އިންޓަރ މިލާނާއި ދެމެދުގައިވާ ފަރަގު މިވަގުތަށް 6 ޕޮއިންޓަށް ކުޑަކޮށްފައެވެ. އެއީ ކުޅުނު 28 މެޗުން ލިބިފައިވާ 59 ޕޮއިންޓާއެކުއެވެ. ނަމަވެސް އިންޓަރ އެއްމެޗް މަދުން ކުޅެފައިވުމުން މިފަރަގު 9 ޕޮއިންޓަށް އިތުރު ވުމަކީ އެކަށީގެންވާކަމެކެވެ. މިމެޗުން ބަލިވުމުން ފިއޮރެންޓީނާ އުޅެނީ ކުޅުނު 28 މެޗުން ލިބިފައިވާ 29 ޕޮއިންޓާއެކު ތާވަލްގެ 16 ވަނައިގައެވެ.