މަސްތުވާތަކެތިކަމަށް ޝައްކުކުރެވޭ ޕެކެޓުތަކެއް ހއ.އަތޮޅުގެ ބައެއް ރަށްރަށަށް ލައްގަމުން އެބަދެއެވެ. ފުލުހުންވަނީ މިކަން ކަށަވަރުކޮށްދެއްވާފައެވެ. ފުލުން ވިދާޅުވީ މަސްތިވާތަކެތިކަމަށް ބެލެވޭ އެއްޗެއް ހުރި ޕެކެޓުތަކެއް ލައްގަމުންދާތީ އެކަމާ ގުޅިގެން ފުލުހުން ހަރަކާތްތެރިވަމުންދާކަމަށެވެ. އަދި އެކަން އިތުރަށް ބަލަމުންދާކަމަށެވެ.
މަސްތުވާތަކެތިކަމަށް ޝައްކުކުރެވޭ ކޮތަޅުތަކެއް ހުރި ގޯންޏެއް ފުރަތަމަ ފެނިފައިވަނީ ހއ.ފިއްލަދޫންނެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން ފިއްލަދޫ ކައުންސިލްގެ ރައީސް އަޙުމަދު ފަލާހު ވިދާޅުވީ، ރަށުގެ ފަޅުތެރެއިން ކަޅު ބޮޑު ދަބަހެއްހެން އޮތް އެއްޗެއް ފެނުނީ ރަށުގެ މަސްދޯންޏަކަށްކަމަށެވެ. އެއީ މިއަދު ހެނދުނު 11:00ހާއިރުއެވެ.
ފަލާހު ވިދާޅުވީ ދަބަހުގެ އެތެރޭގައި ބަނދުކޮށްފައިހުރި ބޮޑެތި ޕެކެޓުތަކެއްގެ ތެރޭގައި، ކުދި ކުދި ޕެކެޓުތަކެއް ހުރިކަމަށެވެ. އަދި އެތަކެތި ކަނޑައި ބެލިއިރު، އޭގައި މުށި ކުނޑި ކަހަލަ އެއްޗެއް އަޅާފައިވާކަމަށެވެ. އޭގެތޭރެގައި 1ކިލޯގެ 50 ބޮޑު ޕެކެޓު އޮތްކަމަށް އޭނާ ވިދާޅުވިއެވެ.
މަސްތުވާތަކެތިކަމަށް ޝައްކު ކުރެވިގެން، މެންދުރުގެ ވަގުތުގައި އެ ތަކެތި ވަނީ ފުލުހުންނާ ހަވާލުކޮށްފައެވެ. ފަލާހު ވިދާޅުވީ ފަޅުތެރެއިން ފެނުނު ދަބަހުގެ އިތުރަށް، ރަށުގެ އެހެން ސަރަޙައްދެއްގެ ގޮނޑުދޮށުންވެސް އެފަދަ ޕެކެޓު ފެނުނުކަމަށެވެ. މި ތަކެތި މިހާރުވަނީ ފުލުހުންނާ ހަވާލުކޮށްފައެވެ.
ފުލުހުންވިދާޅުވީ ހއ.ގެ އިތުރު ރަށްތަކުންވެސް މިފަދަ، މަސްތުވާތަކެތިކަމަށް ޝައްކުކުރެވޭ ތަކެތި ފެނިފައިވާކަމަށެވެ.