ފަލަސްޠީނުގެ ބިންތަކުގައި ހިންގާފައިވާ ހަނގުރާމައިގެ ޖަރީމާތައް ބަލަން ފަށާފައިވާކަން އިންޓަނޭޝަނަލް ކްރިމިނަލް ކޯޓު، އައިސީސީން ބުނެފިއެވެ.
2019ވަނަ އަހަރުގެ ޑިސެމްބަރު މަހުގެ ތެރޭގައި އިސްރާއީލުން އިސްތިޢުމާރުކޮށްފައިވާ ފަލަސްޠީނުގެ ހުޅަނގު އައްސޭރިއާއި ޣައްޒާގައި ހަނގުރާމައިގެ ޖަރީމާތަކެއް ހިންގާފައިވާކަމަށް އައިސީސީންވަނީ ބުނެފައެވެ. އެ ޖަރީމާތައް ހިންގައިފައިވަނީ އިސްރާއީލާއި ފަލަސްޠީނުގައި ޙަރަކާތްތެރިވާ ހަމާސް ޖަމާޢަތުންކަމަށް ބެލެވޭކަމަށް އައިސީސީންވަނީ ބުނެފައެވެ. މި މަހުގެ ކުރީކޮޅު އައިސީސީންވަނީ ފަލަސްޠީނުގައި ހިންގާފައިވާ ހަނގުރާމައިގެ ޖަރީމާތައް ރަސްމީކޮށް ބަލަން ފަށާނެކަން އިޢުލާނުކޮށްފައެވެ. އެކަމަށް ފަލަސްޠީނުން މަރުޙަބާ ކީނަމަވެސް އިސްރާއީލުންވަނީ އެ ނިންމުން ކުށްވެރިކޮށްފައެވެ.
މާރިޗު މަހުގެ 19ވަނަ ދުވަހު އައިސީސީން ބުނީ ތަހުޤީޤު ފަށާފައިވާކަމުގެ ލިޔުން ދެ ޤައުމަށްވެސް މިހާރު ފޮނުވައިފައިވާކަމަށެވެ. އެއާއެކު ދެ ޤައުމަށްވެސް އަމިއްލަ ތަހުޤީޤެއް ކުރުމަށްފަހު ޖަވާބުދާރީވުމަށް އެއް މަސް ދުވަހުގެ މުއްދަތެއްވަނީ ދީފައެވެ. އަމިއްލަ ތަހުޤީޤެއް ފަށާފައިވާކަން އެނގުމުން އައިސީސީން ފަށާފައިވާ ތަހުޤީޤު ހުއްޓުމަކަށް އަންނާނެއެވެ. އައިސީސީން މައްސަލައެއް ބަލާނީ އެ މައްސަލައިގައި ހިމެނޭ ޤައުމުތަކަށް ކުރެވޭ ތުހުމަތުތައް ނުބަލާ ޙާލަތުގައި އެކަންޏެވެ.