އިންގްލަންޑާއި އިންޑިއާގެ ކްރިކެޓްކެޓް ޓީމާ މެދުގައި މިހާރު ކުޅެމުންދާ ޓީ ޓުވެންޓީގެ މެޗްތަކުގެ ތެރެއިން ތިންވަނަ މެޗް ކާމިޔާބުކޮށް އެއްމެޗްގެ ލީޑެއް އިންގްލަންޑްއިން ނަގައިފިއެެވެ. އިންޑިއާގެ އަހްމަދުއާބާދުގައި ކުޅުނު މިމެޗް އިންގްލަންޑް ކާމިޔާބުކުރީ އަށް ވިކެޓުންނެވެ.
މިމެޗުގައި އެންމެ ފުރަތަމަ ކުޅެން އަރާ އިންޑިޔާއިން 20 އޯވަރުގެ ތެރޭގައި ހަކުޅުންތެރިން ނުބައިވެގެން ހެދުނީ 156 ލަނޑެވެ. މިމެޗްގައި އިންޑިއާއިން އެންމެ ރަނގަޅަށް ކުޅުނީ ކެޕްޓަން ވިރާޓް ކޯލީއެވެ. އޭނާވަނީ މިމެޗްގައި 46 ބޯޅައިން 77 ލަނޑު ހަދާފައެވެ. މިމެޗްގެ ފެށުން އިންޑިއާއަށް ދިޔައީ ވަރަށް ގޯސްކޮށެވެ. މިގޮތުން މެޗުގެ ފުރަތަމަ ހަ އޯވަރުގެ ތެރޭ އެޓީމަށް ހެދުނީ ތިން ވިކެޓް ގެއްލިގެން 24 ލަނޑެވެ. މިމެޗްގައި އިންގްލަންޑުން އެންމެ ރަނގަޅަށް އުކީ 31 ލަނޑަށް 3 ވިކެޓް ނެގި މާރކް ވުޑްއެވެ.
ޖަވާބުގައި އިންގްލަންޑުން ކުޅެން އަރާ 18 އޯވަރު ދެބޯޅައިން ދެ ވިކެޓަށް 158 ލަނޑު ހަދާ މިމެޗް ކާމިޔާބުކުރިއެވެ. މިމެޗުގައި އިންގްލަންޑް ޓީމުން އެންމެ ރަނގަޅަށް ކުޅުނީ 52 ބޯޅައިން ނުބައިނުވެ 83 ލަނޑު ހެދި ޖޮސް ބަޓްލަރއެވެ. އަދި އެޓީމްގެ ޖޮނީ ބެއަރސްޓޯ ވަނީ 28 ބޯޅައިން 40 ލަނޑު ހަދާފައެވެ. މިމެޗް ވެގެންދިޔައީ އިންގްލަންޑްގެ ކެޕްޓަން އިއޮއިން މޯގަން އެޓީމަށް ކުޅުނު ޓީ ޓުވެންޓީގެ 100 ވަނަ މެޗަށެވެ. މިއީ އިންގްލަންޑްގެ ކުޅުންތެރިޔަކު ޓީ ޓުވެންޓީގައި 100 މެޗް ހަމަކުރި ފުރަތަމަ ފަހަރެވެ. އަދި މާދަމާ ކުޅޭ މެޗް އިންގްލަންޑް ކާމިޔާބުކޮށްފިނަމަ މިސީރީޒް އެޓީމަށް ކާމިޔާބު ކުރެވޭނެއެވެ.