ޔުއޭފާ ޗެމްޕިއަންސް ލީގުގެ ކުއާޓަރ ފައިނަލްގެ ގުރުއަތުލުން މިއަންނަ ހުކުރު ދުވަހު އޮންނާނެއެވެ. މިމުބާރާތުގެ ކްއާޓަރ ފައިނަލްގައި ވާދަކުރާ އަށް ޖާގައިގެ ތެރެއިން ހަޖާގަ މިހާރުވަނީ ކަށަވަރުވެފައެވެ.
މިމުބާރާތުގެ ކުއާޓަރ ފައިނަލުން މިހާރު ޖާގަހޯދާފައިވާ ޓީމުތަކުގެ ތެރެގައި ހިމެނެނީ ރެއާލް މެޑްރިޑް، ޕެރިސް ސެއިންޓް ޖަރމެއިން، ބޮރޫޝިއާ ޑޯޓްމުންޑް، ޕޯޓޯ، މެންޗެސްޓަރ ސިޓީ އަދި ލިވަޕޫލެވެ. އަދި މިރޭ ކުޅޭ ދެމެޗާއެކު މިމުބާރާތުގެ ކުއާޓަރ ފައިނަލުން ޖާގަހޯދާ ފަހު ދެޓީމުވެސް ޔަގީންވާނެއެވެ.
މިރޭ ކުޅޭ މެޗުތަކަށް ބަލާއިރު ޗެލްސީ އާއި އެޓްލެޓިކޯ މެޑްރިޑްގެ މެޗްގެ ފުރަތަމަ ލެގު އެއްލަނޑު ސުންލަނޑުން ކާމިޔާބުކޮށްފައިވަނީ ޗެލްސީއެވެ. އަދި ބަޔޭން މިޔުނިކާއި ލާޒިއޯ ބައްދަލުކުރި ފުރަތަމަ ލެގް 4 ލަނޑު އެއްލަނޑުން ކާމިޔާބުކޮށްފައިވަނީ ބަޔާންއެވެ. އެހެންކަމުން މިމުބާރާތުގެ ކުއާޓަރ ފައިނަލުން ޖާގަހޯދުމުގެ ފުރުސަތު ބޮޑީ ޗެލްސީ އާއި ބަޔާންއަށް ކަމަށް ގިނަ ބަޔަކު ޤަބޫލު ކުރެއެވެ.
މި މުބާރާތުގެ ކުއާޓަރ ފައިނަލްގެ ގުރުލުމުގައި އެއްވެސް ޓީމެއް ސީޑް ކުރުމެއް ނޯންނާނެއެވެ. އެެހެންކަމުން އަމިއްލަ ޤައުމުގެ ޓީމަކާއި ޖެހުމުގެ ފުރުސަތު ޖަރުމަނާއި އިނގިރޭސިވިލާތުގެ ޓީމުތަކަށް އެބައޮތެވެ. އަދި އެޓްލެޓިކޯއާއި ޗެލްސީގެ މައްޗަށް ކުރި ހޯދައިފިނަމަ ސްޕެއިންގެ ދެކްލަބް ޖެހުމުގެ ފުރުސަތުވެސް އޮންނާނެއެވެ.
މިމުބާރާތުގެ ކްއާޓަރ ފައިނަލްގެ މެޗްތައް ކުޅުމަށް ހަމަޖެހިފައިވަނީ އޭޕްރީލް މަހުގެ ހަޔަކާއި ހަތްވަނަ ދުވަހާއި އަދި ތޭރަ އާއި 14 ވަނަ ދުވަހުއެވެ.