ކޯވިޑް-19 ވެކްސިންގެ ހުރިހާ ޑޯޒެއް ފުރިހަމަކުރާ މީހުންނަށް މާސްކު ނާޅައި އުޅެވިދާނެކަމަށް އެމެރިކާގެ ސެންޓަރ ފޮރ ޑިޒީސް ކޮންޓްރޯލް، ސީޑީސީން ބުނެފިއެވެ.
ހަލުވި ދުވެއްޔެއްގައި ކޯވިޑް-19 ވެކްސިން ދެމުންދާ ދަނޑިވަޅެއްގައި ސީޑީސީން އާންމުކުރި އައު އިރުޝާދުތަކުގައި ބުނީ ވެކްސިންގެ ޑޯޒްތައް ފުރިހަމަކޮށްފައިވާ މީހުން އެތެރޭގެ މާހައުލުތަކުގައި އެކަކު އަނެކަކާ ބައްދަލު ކުރާނަމަ މާސްކު އަޅަން ނުޖެހޭނެކަމަށެވެ. ނަމަވެސް ބޭރަށް ނުކުމެ އުޅެން ޖެހޭނީ މާސްކު އަޅައިގެންކަމަށާއި ގިނަ މީހުން އެއްވެ އުޅޭ ތަންތަނަށް މާސްކު ނާޅައި ދިޔުން ރަނގަޅު ނޫންކަމަށް ސީޑީސީން ބުނެއެވެ.
އެމެރިކާގެ ކޯވިޑް-19ގެ ތިން ވެކްސިނެއް ބޭނުންކުރެއެވެ. އެއީ ދެ ޑޯޒް ހިމެނޭ ފައިޒަރ ވެކްސިނާއި މޮޑާނާ ވެކްސިނާއި އެއް ޑޯޒް ހިމެނޭ ޖޮންސަން އެންޑް ޖޮންސަންގެ ވެކްސިނެވެ. ސީޑީސީން ބުނީ އެ ވެކްސިންތަކުގެ ފަހު ޑޯޒް ފުރިހަމަ ކުރާތާ ދެ ހަފުތާ ފަހުން ވެކްސިން ޖަހާފައިވާ މީހުންނަކީ ބަލިން ރައްކާތެރިކަން ލިބިފައިވާ މީހުންކަމުގައި ބެލެވިދާނެކަމަށެވެ. އެހެންކަމުން މާސްކު ބޭނުންކުރުމާއި އިޖުތިމާޢީ ގައިދުރުކަމުގެ ފިޔަވަޅުތައް ނެތި އެ މީހުންނަށް އެކަކު އަނެކަކާ ބައްދަލުކުރެވިދާނެކަމަށް ސީޑީސީން ބުނެއެވެ. އޭގެ އިތުރުން ވެކްސިން ނުޖަހައި ބަލީގެ ނުރައްކާ ކުޑަ އެއް ގޭބިސީއަކަށް ނިސްބަތްވާ މީހުންނާވެސް މާސްކު ނާޅައި ބައްދަލުކުރެވިދާނެކަމަށް ސީޑީސީން ބުނެއެވެ.
ސީޑީސީން ބުނީ އިރުޝާދުތަކަށް ގެނެސްފައިވާ އެންމެ ފަހުގެ ބަދަލުތަކަކީ އާންމު ދިރިއުޅުމަށް އަލުން ރުޖޫޢަވުމާ ގާތަށް އެޅޭ މުހިންމު ފިޔަވަޅެއްކަމަށެވެ. ނަމަވެސް އެމެރިކާގައި މިހާތަނަށް ވެކްސިންގެ ޑޯޒްތައް ފުރިހަމަކޮށްފައިވަނީ އާބާދީގެ 10 އިންސައްތަ މީހުންކަމަށް ސީޑީސީން ބުނެއެވެ. އެހެންކަމުން، ބަލި ފެތުރުން ހުއްޓުވުމަށް އެދެވޭ ފިޔަވަޅުތަކެއް އެޅުމުގައި ދެމިތިބުމުގެ މުހިންމުކަން ސީޑީސީންވަނީ ފާހަގަކޮށްފައެވެ.