އޮންލައިންކޮށް އިންޑިއާ ވިސާއަށް އެދެވޭނެގޮތް ހަމަޖައްސައިފި

ދިވެހިންނަށް ލުއިފަސޭހަކޮށްދިނުމުގެ ގޮތުން އިންޑިއާ ވިސާ އޮންލައިންކޮށް އެދެވޭނެގޮތަށް ހަމަޖައްސައިިފިއެވެ.

އިންޑިއާއަށް ދާ ދިވެހިންނަށް ވިސާ ހޯދުމުގައި ދިމާވާ މައްސަލައަށް ހައްލެއް ގެނައުމުގެ މަސައްކަތް ކުރަމުންދާކަމަށް މިދިޔަ މަހު ރާއްޖޭގައި ހުންނަ އިންޑިއާ ހައިކޮމިޝަނުން ވިދާޅުވެފައިވެއެވެ. އިންޑިއާ ވިސާއަށް އެދުމަށް އެޕްލިކޭޝަން ހުށައެޅުމަށް ކޮންމެ ރެޔަކު އިންޑިއާ ހައިކޮމިޝަން ކައިރީގައި ގިނަ ޢަދަދެއްގެ މީހުން ކިއުގައި ތިބެއެވެ.

އިންޑިއާ ހައިކޮމިޝަނުން ވިދާޅުވީ ވިސާއަށް އެދުމުގައި ދިމާވާ ދަތިތައް ހައްލުކުރުމަށް އެޕޮއިންޓްމެންޓް ހެއްދުމުގެ ނިޒާމަށް މިއަދުން ފެށިގެން ބަދަލުތަކެއް ގެނެސްފައިވާކަމަށެވެ. އެގޮތުން މިއަދުން ފެށިގެން، އޮންލައިންކޮށް ވިސާ އެޕްލިކޭޝަން ފޯމު ފުރުމަށްފަހު، އެޕޮއިންޓްމަންޓް ބުކް ކުރެވޭނެކަމަށް ހައިކޮމިޝަނުން ވިދާޅުވެއެވެ.

"އެގޮތުން 7 މާރިޗު 2021 އިން ފެށިގެން، ވިސާ އެޕްލިކޭޝަން ކާމިޔާބުކަމާއިއެކު އޮންލައިންކޮށް ފުރިހަމަ ކުރެއްވުމަށްފަހު (https://indianvisaonline.gov.in/visa/index.html) – އަޅުގަނޑުމެންގެ ވިސާ އެޕޮއިންޓްމެންޓް ވެބްސައިޓަށް (https://hcimv-consularappointment.com) ވަޑައިން އެންމެ އަވަހަށް ލިބެންއޮތް އެޕޮއިންޓްމެންޓް ޚިޔާރުކުރައްވާ، އެޕޮއިންޓްމެންޓް ހެއްދެވޭނެއެވެ." އިންޑިއާ ހައިކޮމިޝަނުން ނެރުނު ބަޔާނުގައިވެއެވެ.

މި ބަދަލާއެކު ހޮޓްލައިން ނަންބަރު މެދުވެރިކޮށް އެޕޮއިންޓްމެންޓް ހެދުމަށް ހުޅުވާލާފައިވާއިރު، ހައިކޮމިޝަނުން ޓޯކަން ދޫކުރުންވެސް މިހާރު ވަނީ ހުއްޓަލާފައެވެ.

އިންޑިއާއަށް ދަންބޭނުންވާ ދިވެހިންނަށް ވިސާއަށް އެދެވޭނެ ފަސޭހަ އިންތިޒާމްތަކެއް އިންޑިއާ ހައިކޮމިޝަނުން ހަމަޖައްސައިދީފައިވާއިރު، ކޯވިޑް-19އާއި ގުޅިގެން އިންޑިއާގެ ބޯޑަރުތައް ބަންދުކޮށްފައިވީނަމަވެސް ދިވެހިންނަށް އެ ޤައުމަށް އެތެރެވެވޭނެ އިންތިޒާމް ވަނީ ހަމަޖައްސާފައެވެ.