ޕީއެންސީގެ ރައީސް އަބްދުއްރަހީމް ޢަބްދުﷲގެ މައްޗަށް އުފުލާފައިވާ ދައުވާއަށް އޭނާ އިންކާރުކުރައްވައިފިއެވެ. އަބްދުއްރަހީމްގެ މައްޗަށް ދައުލަތުން އުފުލާފައުވަނީ ހަޑިހުތުރު އެއްޗެހި ކިޔުމާއި ހަޑިހުތުރު ބަސް ބޭނުން ކުރުމުގެ ކުށުގެ ދައުވާއެވެ.
މި މައްސަލައިގެ ޝަރީއަތުގެ އަޑުއެހުންތައް ފަށާފައިވަނީ މިިދިޔަ ޖެނުއަރީމަހުގެ 31 ވަނަދުވަހުއެވެ. މައްސަލައިގެ ލިޔެކިޔުންތައް ލިބިފައި ނުވާކަމަށް ބުނެ އެދުވަހުގެ ޝަރީއަތުގައި އަބްދުއްރަހީމް ދައުވާއަށް ޖަވާބުދާރީވެޑައިގެންފައެއް ނުވެއެވެ.
މި މައްސަލާގައި މިއަދުގެ ބޭއްވި ޝަރީއަތުގެ މަޖިލީހުގައި ވާހަކަ ދައްކަވަމުން އަބްދުއްރަހީމް ޢަބްދުﷲގެ ވަކީލު އަހުމަދު ހިޝާމް ވަޖީހު ވިދާޅުވީ ދައުވާއަށް އަބްދުއްރަހީމް އިންކާރުކުރައްވާކަމަށެވެ. އަދި ޤާނޫނުގައި ބުނާ އެއްޗަކާއި ކޮށްފައިވާ ދައުވާ ދައުވާއަކާއި ސާފު ނުވާކަމަށްް ބުނެ ބައެއް ސުވާލުތައް ވަނީ އުފައްދާފައެވެ.
އެހެންނަމަވެސް މި ސުވާލުތަކަށް ދައުލަތުން ޖަވާބު ދާރީވުމުން މައްސަލަ ބައްލަވާ ގާޒީ ނިންމެވީ ޝަރީއަތް ކުރިޔަށް ގެންދެވުމަށެވެ. އެހެންކަމުން އަވަސް މައްސަލައެއްގެ ގޮތުގައި ޝަރީއަތް ކުރިޔަށް ގެންދަވާނެކަން އިއުލާންކުރައްވާ ދެން އޮންނަ އަޑުއެހުމެއްގައި ދިފާއުން ހުށައަޅަން ޖެހޭ ކަންކަން ހުށައެޅުމަށް ފުރުސަތު ދެއްވާ މިއަދުގެ އަޑު އެހުންވަނީ ނިންމާލާފައެވެ.
ޤާނޫނުލް އުޤޫބާތުގެ 615 ވަނަ މާއްދާގެ 3 ވަނަ ނަންބަރުގެ ދަށުން ހަޑިހުތުރު އެއްޗެހި ކިޔުމާއި ހަޑިހުތުރު ބަސް ބޭނުން ކުރުމުގެ ދައުވާ އަބްދުއްރަހީމްގެ މައްޗަށް އުފުލީ މިދިޔަ އަހަރުގެ އޮކްތޯބަރު މަހުގެ 26 ވަނަ ދުވަހުއެވެ.
އެމާއްދާގައި ވަނީ އާންމު މަޞްލަޙަތަށް ގެއްލުން ހުރި ޢަމަލުކުރުމުގެ ކުށްތަކެވެ. އެގޮތުން އެމާއްދާގެ ތިންވަނަ ނަންބަރުގައި ބުނެފައި ވަނީ ހަޑިހުތުރު އެއްޗެހި ކިޔުމާއި ހަޑިހުތުރު ބަސް ބޭނުން ކުރުމާއި ހަޑިހުތުރު ޢަމަލުތައް ކުރުމުގެ ކުށެވެ. އެއީ ޖުނަޙްގެ 4 ވަނަ ދަރަޖައިގެ ކުށެކެވެ. މިކުށުގެ އެންމެ ބޮޑު އަދަބަކީ ތިން މަހަށް ޖަލަށް ލުމެވެ.
އަބްދުއްރަހީމްގެ މައްޗަށް މިދަޢުވާ އުފުލާފައި ވަނީ 2019 އަހަރުގެ ނޮވެންބަރު މަހުގެ 28 ވަނަ ދުވަހު ކުރީގެ ރައީސް އަބްދުﷲ ޔާމީނަށް ކްރިމިނަލް ކޯޓުން ޙުކުމް އިއްވި ދުވަހު އެ ސަރަހައްދުގައި ހުރެ ފަނޑިޔާރުންނަށް ނިސްބަތްކޮށް ހަޑި ހުތުރު ބަސް ބޭނުކޮށް ހަޑި ހުތުރު ބަހުން ވާހަކަ ދައްކާފައިވާ މައްސަލާގައެވެ.
އެދުވަހު ފަނޑިޔާރުންނަށް ނިސްބަތް ކުރައްވައި، ހުތުރު ބަހެއް ބޭނުންކޮށް، އިންޒާރު ދިން މައްސަލަ ތަހުގީގު ކޮށްދިނުމަށް ފުލުހުންނަށް ހުށައަޅާފައި ވަނީ ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުންނެވެ.