އެން.ބީ.އޭ. ބާސްކެޓް ބޯޅަ މުބާރާތުގައި ބްރޫކްލިން ނެޓްސް އާއި ސެން އެންޓޯނިއޯ ސްޕަރސް ބައްދަލުކުރިމެޗް ނެޓްސް ކާމިޔާބުކޮށްފިއެވެ. މިމެޗް ނެޓްސް ކާމިޔާބުކުރީ 124 ޕޮއިންޓް 113 ޕޮއިންޓުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ނެޓްސްއަށް އެންމެ ރަނގަޅު ކުޅުމެއް ދައްކައިދިނީ އެޓީމަށް 30 ޕޮއިންޓް ހޯދައިދީ 14 ރީބައުންޑް ނަގާ 15 އެސިސްޓް ދިން ޖޭމްސް ހާޑެންއެވެ. ހާޑެން އަންނަނީ މިސީޒަންގައި ނެޓްސްއަށް ބަދަލުވި ފަހުން މިހާރު ވަރަށް މޮޅު ކުޅުމެއް ދައްކަމުންނެވެ. އަދި އެޓީމުން ދައްކަމުންދާ މޮޅު ކުޅުމާއެކު މިޙާރުވަނީ އީސްޓަން ކޮންފަރެންސްގެ ދެވަނައަށް ކުރިއަށް ޖެހިލާފައެވެ. މިމެޗްގައި ސްޕަރސްއަށް އެންމެ ރަނގަޅު ކުޅުމެއް ދެއްކީ އެޓީމަށް 22 ޕޮއިންޓް ހޯދައިދީ 11 އެސިސްޓް ދިން ޑިމާރ ޑިރޮޒާންއެވެ.
މިމުބާރާތުގައި ފިލަޑެލްފިއާ ސެވަންޓީ ސިކްސަރސް އާއި އިންޑިއާނާ ޕޭސަރސް ބައްދަލުކުރިމެޗް 130 ޕޮއިންޓް 114 ޕޮއިންޓުން ކާމިޔާބުކުރީ ސިކްސަރސްއެވެ. މިމެޗްގައި ސިކްސަރސްއަށް އެންމެ ރަނގަޅު ކުލުމެއް ދެއްކީ އެޓީމަށް 24 ޕޮއިންޓް ހޯދައިދީ 13 ރީބައުންޑް ނަގައިދިން ޖޮއެލް އެމްބިޑްއެވެ. ޕޭސަރސް އަށް އެންމެ ރަނގަޅު ކުޅުމެއް ދެއްކީ 20 ޕޮއިންޓް ހޯދައިދިން މެލްކަމް ބްރޮގްޑަންއެވެ. މީގެއިތުރުން ނިއުއޯލިއަންސް ޕެލިކަންސް އާއި ޔޫޓާ ޖޭޒް ބައްދަލުކުރިމެޗް 129 ޕޮއިންޓް 124 ޕޮއިންޓުން ކާމިޔާބުކުރީ ޕެލިކަންސްއެވެ. މިމެޗްގައި ޕެލިކަންސްގެ ޒިއޮން ވިލިއަމްސަން ވަނީ އެޓީމަށް 26 ޕޮއިންޓް ހޯދައިދީ 10 ރީބައުންޑް ނަގާފައެވެ. އަދި ޖޭޒްގެ ބޯޖާން ބޮގްޑަނޮވިޗް ވަނީ އެޓީމަށް 31 ޕޮއިންޓް ހޯދައިދީފައެވެ.
މި މުބާރާތުގައި ކުޅުނު އެހެން މެޗުތަކަށް ބަލާލާއިރު ޑެންވަރ ނަގެޓްސް އާއި ޝިކާގޯ ބުލްސް ބައްދަލުކުރިމެޗް 118 ޕޮއިންޓް 112 ޕޮއިންޓުން ނަގެޓްސް ކާމިޔާބުކުރިއިރު ޑެލަސް މެވްރިކްސް އާއި އޯލާންޑޯ މެޖިކް ބައްދަލުކުރިމެޗް 130 ޕޮއިންޓް 124 ޕޮއިންޓުން ކާމިޔާބުކުރީ މެވްރިކްސްއެވެ.