ޔުއޭފާ ޔޫރޮޕާ ލީގުގެ ފަހު 16 ޓީމްގެ ބުރުގެ ގުރުނެގުން ބާއްވައިފިއެވެ. މި މުބާރާތުގެ ފަހު 16 ޓީމްގެ ބުރުގެ ގުރުލުން ބާއްވާފައިވަނީ އިއްޔެ ހަވީރުގެ ވަގުތެއްގައެވެ.
އެއްވެސް ޓީމެއް ސީޑް ކުރުމެއް ނެތި ބޭއްވި މި ގުރުލުގައި އެންމެ ފާހަގަކޮށްލެވޭ ކުރިމަތިލުމަކަށް މިފަހަރު ދިމާވީ އިންގްލިޝް ޕްރިމިއަރ ލީގުގެ މެންޗެސްޓަރ ޔުނައިޓެޑާއި އިޓާލިއަން ސެރީއާގެ އޭސީ މިލާންގެ ކުރިމަތިލުމެވެ. މިދެޓީމް މީގެކުރިން ވަނީ 11 ފަހަރެއްގެ މަތިން ބައްދަލުކޮށްފައެވެ. ނަމަވެސް އެއީ މުޅިންވެސް ޗެމްޕިއަންސް ލީގުގައެވެ. މިއީ ޔޫރޮޕާ ލީގުގައި މިދެޓިމް ވާދަކުރާ ފުރަތަމަ ފަހަރެވެ. މި ކުރިމަތިލުމާއެކު މެންޗެސްޓަރއަށް ކުރިން ކުޅުނު ޒްލަޓާން އިބްރަހިމޮވިޗް އަލުން މެންޗެސްޓަރގެ ދަނޑުގައި ކުޅޭ ތަން ފެނިގެންދާނެއެވެ.
މިބުރުގެ އެހެން ކުރިމަތި ލުންތަކަށް ބަލާލާއިރު ނެދަލަންޑްސްގެ އަޔެކްސް އެމްސްޓަރޑަމް ބައްދަލުކުރާނީ ސްވިޓްޒަލަންޑްގެ ބީއެސްސީ ޔަންގް ބޯއިސްއާއެވެ. ޔޫކްރެއިންގެ ޑީނަމޯ ކިއެވް ސްޕެއިންގެ ވިޔަރެއާލްއާއި ބައްދަލުކުރާއިރު އޭއެސް ރޯމާ ބައްދަލުކުރާނީ ޝަޚްތަރް ޑޮނެސްކްއާއެވެ. ގްރީސްގެ އޮލިމްޕިއާކޯސް، އާސެނަލްއާއި ބައްދަލުކުރާއިރު ކްރޮއޭޝިއާގެ ޑީނަމޯ ޒަގްރެބް ބައްދަލުކުރާގޮތަށް ގުރުން ދިމާވީ ޓޮޓްނަމް ހޮޓްސްޕަރއާއެވެ. ޗެކް ރިޕަބްލިކްގެ ސްވާވިއާ ޕްރާހާ ސްކޮޓްލަންޑްގެ ގްލާސްގޯ ރޭންޖަރސް އާއި ބައްދަލުކުރާއިރު ސްޕެއިންގެ ގްރަނާޑާ ބައްދަލުކުރާނީ ނޯވޭގެ މޯލްޑަ އާއެވެ.
ފަހު 16 ޓީމްގެ ބުރުގެ ފުރަތަމަ ލެގް ކުޅުމަށް ހަމަޖެހިފައިވަނީ މާރޗްމަހުގެ 11 ވަނަ ދުވަހުއެވެ. އަދި ދެވަނަ ލެގް ކުޅެވޭނީ މާރޗްމަހުގެ 18 ވަނަ ދުވަހުއެވެ.