އިޓާލިއަން ސެރީއާގައި ޕޮއިންޓް ތާވަލްގެ އެއްވަނައިގައި އުޅޭ އިންޓަރ މިލާން އާއި ދެވަނައިގައި އުޅޭ އޭސީ މިލާން ބައްދަލުކުރިމެޗް ފަސޭހަ ކަމާއެކު އިންޓަރ ކާމިޔާބުކޮށްފިއެވެ. ސެންސީރޯގައި ކުޅުނު މިމެޗް އިންޓަރ ކާމިޔާބުކުރީ 3 ލަނޑު ސުންލަނޑުންނެވެ.
ވާދަވެރި ކުޅުމެއް ފެނިގެންދިޔަ މެޗްގައި އިންޓައިން އެޓީމުގެ ފުރަތަމަ ލަނޑު މެޗްގެ 5 ވަނަ މިނެޓްގައި ޖަހައިދިނީ ރޮމެލޫ ލުކާކޫ ތަނަވަސްކޮށްދިން ފުރުސަތެއްގައި ލައުޓާރޯ މާޓިނޭޒްއެވެ. އަދި ދެވަނަ ލަނޑު މެޗްގެ 57 ވަނަ މިނެޓްގައި ޖަހައިދިނީވެސް މާޓިނޭޒްއެވެ. އަދި ފަހު ލަނޑު މެޗްގެ 66 ވަނަ މިނެޓްގައި ޖަހާދިނީ ލުކާކޫއެވެ. މިމެޗްގައި މިލާންއަށް މާ އެދެވޭ ކުޅުމެއް ނުދެއްކުނު ނަމަވެސް ލަނޑު ޖަހާނެ ރަނގަޅު ދެ ފުރުސަތެއް ޒްލަޓާން އިބްރަހިމޮވިޗަށް ލިބިގެންދިޔައިރު ސަންޑްރޯ ޓޮނާލީއަށްވެސް ލަނޑު ޖަހާގެ ރަނގަޅު ފުރުސަތެއް ލިބިގެން ގޮސްފައިވެއެވެ.
މިމެޗް ވެގެންދިޔައީ މިލާންގެ ކީޕަރ ޖިއާން ލުއިޖީ ޑޮނަރޫމާއަށް އިތުރު ހިތްދަތިކަމެއް ކުރިމަތިވި މެޗަކަށެވެ. އެއީ ރޭގެ މެޗަކީ އޭނާ އިޓާލިއަން ސެރީއާގައި ކުޅުނު 200 ވަނަ މެޗެވެ. އޭނާ ވެފައިވަނީ 200 މެޗް ހަމަކުރި އެންމެ ޒުވާން ކުޅުންތެރިޔާއަށެވެ. އެހެންކަމުން މިތާރީހީ މެޗުން ބަލިވެގެން ނިންމާލަން ޖެހުމުން އޭނާއަށް މިވަނީ އިތުރު ހިތްދަތިކަމެއް ލިބިގެން ގޮސްފައެވެ. މި ރިކޯޑް ކުރިން އޮތީ ތަޖްރިބާކާރު ކީޕަރ ޖިއާން ލުއިޖީ ބުފޮން އަތުގައެވެ.
މިކާމިޔާބީއާއެކު އިންޓަރ އަށް މިހާރުވަނީ 23 މެޗުން 53 ޕޮއިންޓް ލިބިފައެވެ. އަދި ދެވަނައިގައި އުޅޭ މިލާނަށް ލިބިފައިވަނީ 23 މެޗުން 49 ޕޮއިންޓެވެ.