ޑިފެންސް ދާއިރާއިން މާލީ އެހީތެރިކަން ދިނުމާގުޅޭ 50މިލިއަން ޑޮލަރުގެ ކްރެޑިޓް ފެސިލިޓީއެއްގައި ދިވެހިރާއްޖެއާއި އިންޑިއާ ދެމެދު ސޮއިކޮށްފިއެވެ.
މިކަމުގެ އެއްބަސްވުމުގައި ރާއްޖެއާ އިންޑިއާ ދެމެދު ސޮއިކޮށްފައިވަނީ އިންޑިއާގެ އެކްސްޓަރނަލް އެފެއަރސް މިނިސްޓަރ ޑރ.އެސް ޖައިޝަންކަރް ރާއްޖެއަށް ކުރެއްވި ދަތުރުފުޅުގެ ތެރެއިންނެވެ. މި ކްރެޑިޓް ފެސިލިޓީއަކީ އިންޑިއާގެ އެކްސްޕޯޓް އިންޕޯޓް ބޭންކް އޮފް އިންޑިއާ (އެގްޒިމް ބޭންކް) މެދުވެރިކޮށް ހޯދާ މާލީ އެހީތެރިކަމެކެވެ.
50މިލިއަން ޑޮލަރުގެ ކްރެޑިޓް ފެސިލިޓީގެ އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ފިނޭންސް އިބްރާޙިމް އަމީރުއެވެ. އެކްސްޕޯޓް އިންޕޯޓް ބޭންކް އޮފް އިންޑިއާ (އެގްޒިމް ބޭންކް)ގެ ފަރާތުން ސޮއިކުރެއްވީ ޗީފް ޖެނެރަލް މެނޭޖަރ ޝްރީ ގޯރަވް ސިންގް މަންދާރީއެވެ.
މި އެއްބަސްވުމާ ގުޅޭގޮތުން ފިނޭންސް މިނިސްޓްރީން ވިދާޅުވީ، މި އެހީގެ ދަށުން ދިވެހިރާއްޖޭގައި ދިފާޢީ ކަންކަން ހަރުދަނާކުރުމާ ގުޅޭގޮތުން، މަޝްވަރާތައް ކުރިއަށްދާކަމަށެވެ.
އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި އިންޑިއާގެ އެކްސްޓަރނަލް އެފެއަރސް މިނިސްޓަރ ޑރ.އެސް ޖައިޝަންކަރްއާއި، ދިވެހިރާއްޖޭގެ ފޮރިން މިނިސްޓަރ އަބްދުﷲ ޝާހިދުއާއި އިކޮނޮމިކް މިނިސްޓަރ ފައްޔާޒު އިސްމާއިލްއާއި ޕްލޭނިންގ މިނިސްޓަރ މުޙައްމަދު އަސްލަމް ބައިވެރިވެ ވަޑައިގެންނެވިއެވެ.
އިންޑިއާއިންވަނީ ޤައުމީ ދިފާޢީ ބާރުގެ ކޯސްޓްގާޑްގެ ޚިދުމަތް ފުޅާކުރުމަށް، ކޯސްޓްގާޑް ބަނދަރާ ޑޮކްޔާޑެއް ހެދުމަށްވެސް އެހީތެރިކަން ދީފައެވެ.