އޮސްޓްރޭލިއަން އޯޕަން ޓެނިސް މުބާރާތުގައި ސްޕެއިންގެ ރަފައެލް ނަދާލް ބަލިކޮށް މިމުބާރާތުގެ ސެމީފައިނަލުން ގްރީސްގެ ސްޓެފަނޯސް ސިޓްސިޕާސް ޖާގަހޯދައިފިއެވެ. ފޯރިގަދަ ކުޅުމެއް ފެނިގެންދިޔަ މިމެޗް ސިޓްސިޕާސް ކާމިޔާބުކުރީ ފަހަތުން އަރާ 3 ސެޓް 2 ސެޓުންނެވެ.
މިމެޗްގެ ފުރަތަމަ 2 ސެޓް މުބާރާތުގެ ދެވަނަ ސީޑް އަދި 21 ވަނަ ގްރޭންޑް ސްލޭމް މުބާރާތް ކާމިޔާބު ކުރުމަށް މަސައްކަތް ކުރަމުންދިޔަ ނަދާލް ކާމިޔާބުކުރީ ވަރަށް ފަސޭހަ ކަމާއެކު ތިނެއް ހައެއް އަދި ދެއެއް ހަޔަކުންނެވެ. އަދި މިއާއެކު މިމެޗް ފަސޭހަ ކަމާއެކު ނަދާލް ކާމިޔާބުކޮށް ސެމީފައިނަލުން ޖާގަހޯދާނެކަމަށް ބެލެވުނެވެ. ނަމަވެސް ތިންވަނަ ސެޓްގައި ސިޓްސިޕާސްވަނީ އޭނާގެ ކުޅުން ރަނގަޅުކޮށް ނަދާލްއަށް ޕްރެޝަރު ބޮޑުކޮށްފައެވެ. މިގޮތުން މިސެޓް ޓައި ބްރޭކަކަށް ގޮސް ހަތެއް ހަޔަކުން ކާމިޔާބުކުރީ ސިޓްސިޕާސްއެވެ. އަދި ޖެހިގެންއައި މިމެޗްގެ ހަތަރުވަނަ ސެޓް ހައެއް ހަތަރަކުން ސިޓްސިޕާސް ކާމިޔާބުކޮށް މިމެޗް ފަސްވަނަ ސެޓަކަށް ގެންދިޔައެވެ. އަދި ފަހު ސެޓް ހަތެއް ފަހަކުން ކާމިޔާބުކޮށް ސިޓްސިޕާސް މިމެޗް ކާމިޔާބު ކުރިއެވެ.
މެޗަށްފަހު ވަރުބަލިވެފައިހުރި ސިޓްސިޕާސްވަނީ ހޯދި ކާމިޔާބީއާއެކު ބަސް ހުއްޓިފައިވާކަމުގައި ހާމަކޮށްފައެވެ. އަދި މިމެޗްގައި އޭނާގެ ކުޅުމުން ހުރިހާ އެއްޗެއް ހާމަވެގެންދާ ކަމަށާއި މިފެންވަރުގައި ކުޅެވުނީތީ އާދަޔާހިލާފް ހިތްހަމަ ޖެހުމެއް ލިބިއްޖެ ކަމަށް ވެސް ސިޓްސިޕާސްވަނީ ހާމަކޮށްފައެވެ. އަދި މިމެޗް އޭނާއަށް ފެށުނީ ވަރަށް ހާސްކަމާއެކު ކަމަށާއި ނަމަވެސް ތިން ވަނަ ސެޓާހަމައިން ދެން އެވީ ގޮތެއް ބުނަންވެސް ނޭނގޭ ކަމަށާއި އޭގެ ފަހުން މެޗްގައި އޭނާއަށް ކުޑަ ދޫންޏެއް އުޅޭ ގޮތަށް އުޅެވުނީ އުދުހިފައިކަމަށް ސިޓްސިޕާސް ހާމަކުރިއެވެ.
މިމުބާރާތުގެ ސެމީފައިނަލްގައި ސިޓްސިޕާސް ބައްދަލުކުރާނީ މުބާރާތުގައި ހަތަރުވަނައަށް ސީޑް ކުރެވިފައިވާ ޑާނިލް މެޑްވެޑޭވްއާއެވެ. މި މުބާރާތުގެ ސެމީ ފައިނަލުން މެޑްވެޑޭވް ޖާގަހޯދީ ކުއާޓަރ ފައިނަލްގައި އަމިއްލަ ޤައުމުގެ އަންދްރޭ ރުބްލޯވް އާއި ބައްދަލުކުރިމެޗް ސީދާ ތިން ސެޓުން ކާމިޔާބުކޮށްގެންނެވެ. އެއީ ހަތެއް ފަހެއް، ހައެއް ތިނެއް އަދި ހައެއް ދެއަކުންނެވެ. މިމެޗްގައި ރުބްލޯވްއަށް ހޫނުގަދަވުމުގެ ސަބަބުން އޭނާގެ ކުޅުމަށް ވަރަށް ބޮޑަށް އަސަރުކުރިތަން ފެނިގެންދިޔައެވެ. މެޗަށްފަހު މެޑްވެޑޭވް ހާމަކުރިގޮތުގައި މިއީ އޭނާއަށް އެންމެ ރަނގަޅަށް ކުޅެވުނު އެއްމެޗެވެ.