ކޯވިޑް-19 ގެ އަސްލު ދެނެގަތުމަށް ހުރިހާ ގޮތްގޮތަކުން އަދިވެސް ބަލަމުންދާކަމަށް ދުނިޔޭގެ ޞިއްޙަތު ޖަމުޢިއްޔާ، ޑަބްލިއުއެޗުއޯއިން ބުނެފިއެވެ.
2019ވަނަ އަހަރުގެ ޑިސެމްބަރު މަހުގެ ތެރޭގައި ކޯވިޑް-19 އެންމެ ފުރަތަމަ ފެނުނު ޗައިނާގެ ވުހާން ސިޓީއަށް ޑަބްލިއުއެޗުއޯގެ ޚާއްޞަ ވަފުދަކުން ދަތުރުކޮށް، ބަލީގެ އަސްލު ދެނެގަތުމަށްވަނީ ގިނަ މަސައްކަތްތަކެއް ކޮށްފައެވެ. ނަމަވެސް ވައިރަހުގެ އަސްލު މަސްދަރު ހޯދުމުގައި އެ ވަފުދުންވަނީ ނާކާމިޔާބުވެފައެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ސަރުކާރުންވަނީ ކޯވިޑް-19ގެ އަސްލަކީ ވުހާން އިންސްޓިޓިއުޓް އޮފް ވައިރޮލޮޖީން ލީކުވި ވައިރަހެއްކަމަށް ބުނެފައެވެ. އެހެންނަމަވެސް، ޗައިނާއިންވަނީ އެ ތުހުމަތުތައް ދޮގުކޮށްފައެވެ. ވުހާންއަށް ދަތުރުކުރި ޑަބްލިއުއެޗުއޯގެ ވަފުދުންވަނީ ވައިރަސް ފެތުރުނީ ވުހާން ސިޓީގެ ވައިރޮލޮޖީ ލެބަކުން ލީކުވެގެންކަމަށް ދެކެވޭ ވާހަކަތަކަކީ ހަގީގަތެއް ނެތް ވާހަކަތަކެއްކަން ޔަޤީންކޮށްދީފައެވެ.
ޖެނީވާގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޑަބްލިއުއެޗުއޯގެ ޑިރެކްޓަރ ޖެނެރަލް ޓެޑްރޮސް އަދަނަމް ގެބްރިއޭސުސް ވިދާޅުވީ ވަރަށް އުނގަދޫ ޙާލަތްތަކުގައި ވަރަށް މުހިންމު ސައިންޓިފިކް އެކްސަސައިޒުތަކެއް ޑަބްލިއުއެޗުއޯގެ ވަފުދުން ޗައިނާގައި ކުރިއަށް ގެންގޮސްފައިވާކަމަށެވެ. ވައިރަހުގެ އަސްލާއިގުޅޭ ގޮތުން ލަފާކޮށްފައިވާ ބައެއް ކަންކަން އިތުރަށް ނުބަލާ ދޫކޮށްލާކަމަށް ދެކެވޭ ވާހަކަތަކަށް އިޝާރާތްކުރައްވާ އޭނާ ވިދާޅުވީ ޑަބްލިއުއެޗުއޯގެ ވަފުދުން ބަލި ފެތުރެން ދިމާވިކަމަށް ޝައްކުކުރެވޭ ހުރިހާ ގޮތްގޮތަށް އެކަން ތަޙްޤީޤުކުރަމުންދާކަމުގެ ޔަޤީންކަން އަރުވާކަމަށެވެ.
ޓެޑްރޮސް ވިދާޅުވީ ވައިރަސް ފެތުރުނު ގޮތް ދިރާސާކުރުމަށް ބަލަންޖެހޭ ބައެއް ކަންކަމަކީ ޗައިނާގައި ޙަރަކާތްތެރިވަމުންދާ ޑަބްލިއުއެޗުއޯގެ ވަފުދުގެ މަސައްކަތުގެ ތެރޭގައި ނުހިމެނޭ ކަންކަމަށްވުން އެކަށީގެންވާކަމަށެވެ. ޗައިނާއަށް ކުރާ އެންމެ ދަތުރަކުން ހުރިހާ ޖަވާބެއް ނުލިބޭނެކަމަށް ޑަބްލިއުއެޗުއޯއިން އަބަދުވެސް ބުނަމުންދާކަމަށް ފާހަގަކުރައްވަމުން އޭނާ ވިދާޅުވީ މިފަހަރުގެ ދަތުރުންވެސް މުހިންމު ގިނަ މަޢުލޫމާތުތަކެއް ލިބިފައިވާކަމަށެވެ.
މި އަންނަ ހަފުތާގެ ތެރޭގައި ޑަބްލިއުއެޗުއޯގެ ވަފުދުން ވުހާންއަށް ކުރި ދަތުރުގެ ރިޕޯޓު ލިބޭނެކަމަށް ޤަބޫލުކުރައްވާކަމަށް ޓެޑްރޮސް ވިދާޅުވިއެވެ. އަދި އެ ވަފުދުގެ ފަހު ރިޕޯޓު އޭގެ ހަފުތާތަކެއް ފަހުން ލިބިގެންދާނެކަމަށް އޭނާ ވިދާޅުވިއެވެ. ދެ ރިޕޯޓުވެސް އާންމުކުރުމަށް ވަނީ ހަމަޖެހިފައެވެ.
ޑަބްލިއުއެޗުއޯގެ ވަފުދުންވަނީ ވައިރަސް އުފަންވެފައިވަނީ ވާލުގެ ޒަރިއްޔާއިންކަމަށްވުމުގެ ފުރުޞަތު އޮތްކަމަށް ބުނެފައެވެ. ނަމަވެސް އިންސާނުންނަށް ވައިރަސް ފޯރިގޮތް ޔަޤީންކުރުމަށް ތަފާތު ގިނަ ގޮތްގޮތަށް ބަލަމުންދާކަމަށް އެ ވަފުދުން ބުންޏެވެ.