އިންގްލިޝް ޕްރިމިއަރ ލީގުގައި ޕޮއިންޓް ތާވަލްގެ އެއްވަނައިގައި އުޅޭ މެންޗެސްޓަރ ސިޓީ އާއި ޓޮޓްނަމް ހޮޓްސްޕަރ ބައްދަލުކުރިމެޗް ކާމިޔާބުކޮށް ޕޮއިންޓް ތާވަލްގައި ސިޓީއިން ލީޑު ފުޅާކޮށްފިއެވެ. އަމިއްލަ ދަނޑުގައި ކުޅުނު މިމެޗް ސިޓީ ކާމިޔާބުކުރީ 3 ލަނޑު ސުންލަނޑުންނެވެ.
ދެޓީމްގެ ފަރާތުންވެސް ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. ނަމަވެސް މިމެޗްގެ ކުރީކޮޅު ޓޮޓްނަމްގެ ހެރީ ކޭންއަށް މެޗްގައި ލީޑު ނެގުމަށް ރަނގަޅު ފުރުސަތެއްލިބި ބޭކާރުވިއެވެ. މިމެޗްގައި ސިޓީއިން ޖެހި ފުރަތަމަ ލަނޑު މެޗްގެ 23 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ ރޮޑްރީއެވެ. މި ޕެނަލްޓީއަކީ ޓޮޓްނަމްގެ ޕެނަލްޓީ އޭރިއާ ތެރެއިން ސިޓީގެ އިލްކާއި ގުންޑޮގާންއަށް ޕިއޭ އެމިލް ހޮއިބަރގް ފައުލް ކުރުމުން ލިބުނު ޕެނަލްޓީއެކެވެ. އަދި ޕެނަލްޓީ ލިބުމާއެކު ޕެނަލްޓީ ޖަހާނެ ކުޅުންތެރިއެއްގެ ބަހުސް ކޮންމެވެސް ވަރަކަށް ދިޔަތަން ދަނޑުމަތިން ފެނިގެންދިޔައެވެ. މިގޮތުން ސިޓީގެ ކީޕަރ އެޑަރސަން ކުރިއަށް އަރަނިކޮށް ފަހަތަށް ފޮނުވާނީ ބެނާޑޯ ސިލްވަރ ވާހަކަ ދައްކައިގެންނެވެ. މިމެޗްގައި ސިޓީގެ ދެވަނަ ލަނޑު މެޗްގެ 50 ވަނަ މިނެޓްގައި ޖަހައިދިނީ ގުންޑޮގާންއެވެ. އަދި ސިޓީގެ ފަހު ލަނޑު މެޗްގެ 66 ވަނަ މިނެޓްގައި ކީޕަރ އެޑަރސަން ކުރިއަށް ފޮނުވާލި ބޯޅައަކުން ކާމިޔާބުކުރީވެސް ގުންޑޮގާންއެވެ. މިއީ އޭނާ ކާމިޔާބުކުރި 11 ވަނަ ލަނޑެވެ. މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ސިޓީއަށް ލިބި ބޭކާރުވިތަން ފެނިގެންދިޔައެވެ. މިމެޗްގައި ޓޮޓްނަމްއަށް ލިބުނު އެންމެ ރަނގަޅު ފުރުސަތު ތަނަވަސް ކުރީ ބަދަލު ކުޅުންތެރިޔާ ގެރެތު ބޭލްއެވެ. ސިޓީ ޕެނަލްޓީ އޭރިއާ ތެރެއިން ތިން ހަތަރު ކުޅުންތެރިން ކައިރިން ނައްޓާލުމަށްފަހު ފޮނުވި ހަމަލާ އެޑަރސަންވަނީ ވަރަށް ހުޝިޔާކުކަމާއެކު ދިފާއުކޮށްފައެވެ.
މިކާމިޔާބީއާއެކު ސިޓީއަށް މިހާރުވަނީ ޕޮއިންޓް ތާވަލްގައި ހަތް ޕޮއިންޓްގެ ލީޑެއް ލިބިފައެވެ. އެއީ ކުޅުނު 23 މެޗުން 53 ޕޮއިންޓް ލިބިގެންނެވެ. ދެވަނައިގާ އުޅޭ ލެސްޓަރ ސިޓީއަށް ލިބިފައިވަނީ 24 މެޗުން 46 ޕޮއިންޓެވެ. ނަމަވެސް މިރޭ މެންޗެސްޓަރ ޔުނައިޓެޑް ކުޅޭ މެޗުން އެޓީމް މޮޅުވެއްޖެނަމަ މިފަރަގު ފަސް ޕޮއިންޓަށް ކުޑަވާނެއެވެ. މިމެޗުން ބަލިވުމުން ޓޮޓްނަމް މިހާރު އުޅެނީ 23 މެޗުން ލިބިފައިވާ 36 ޕޮއިންޓާއެކު ތާވަލްގެ 9 ވަނައިގައެވެ.
މެޗަށްފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ހާމަކުރިގޮތުގައި މިއީ އޭނާގެ ކުޅުންތެރިންނަށް ހައްގު މޮޅެއް ކަމަށެވެ. ކުރީކޮޅު ޓޮޓްނަމްއިން ދަނޑީގައި ޖެހުނު ބޯޅަ ގޯލަށް ވަން ނަމަ ޓޮޓްނަމް ކޮޅަށް މެޗް އެނބުރުމުގެ ފުރުސަތު އޮތް ކަމަށާއި ނަމަވެސް އޭނާގެ ކުޅުންތެރިން އޭނާ ބޭނުންވިގޮތަށް ކުޅެފައިވާކަމަށްވެސް ޕެޕް ހާމަކުރިއެވެ. ޓޮޓްނަމްގެ ކޯޗު ޖޯސޭ މޮރީނިއޯ ހާމަކުރިގޮތުގައި މެޗްގެ ކުރީކޮޅު އެޓީމަށް ލީޑު ނަގަން ފުރުސަތު ލިިބުނު ކަމަށާއި އަދި ދެން ފެނިގެންދިޔައީ ސިޓީއިން އޭނާ ހާމަކުރިގޮތުގައި މިޒަމާނުގެ ޕެނަލްޓީއަކުން ލީޑުނެގި ތަންކަމަށެވެ.