އޮސްޓްރޭލިއަން އޯޕަން ޓެނިސް މުބާރާތުގެ ހަތަރުވަނަ ބުރުން ދުނިޔޭގެ އެއްވަނަ ޓެނިސް ކުޅުންތެރިޔާ ނޯވަކް ޖޯކޮވިޗް ޖާގަހޯދައިފިއެވެ. މި މުބާރާތުގެ ހަތަރުވަނަ ބުރުން ޖޯކޮވިޗް ޖާގަހޯދީ ތިންވަނަ ބުރުގައި އެމެރިކާގެ ޓޭލަރ ފްރިޓްޒް އާއި ބައްދަލުކުރިމެޗް ކާމިޔާބުކޮށްގެންނެވެ.
ޖޯކޮވިޗަށް އަނިޔާގެ ސަބަބުން ގިނަ އުނދަގޫތަކަކާއެކު ކުޅުނު މިމެޗް ޖޯކޮވިޗް ކާމިޔާބުކުރީ 3 ސެޓް 2 ސެޓުންނެވެ. އެއީ ހަތެއް ހައެއް، ހައެއް ހަތަރެއް، ތިނެއް ހައެއް، ހަތަރެއް ހައެއް އަދި ހައެއް ދެއަކުންނެވެ. މުބާރާތް ކުޅެމުންދިޔަ އޮސްޓްރޭލިއާގެ މެލްބަން ނިސްބަތްވާ ވިކްޓޯރިއާ ސްޓޭޓްގައި ކުއްލި ގޮތަކަށް ލޮކްޑާއުން އިޢުލާން ކުރުމާއި ގުޅިގެން މިމެޗްގެ ހަތަރުވަނަ ސެޓް ކުޅެމުން ދަނިކޮށް ކުޅުން މެދު ކަނޑާލާ ކުޅިބެލުންތެރިން ގެއަށް ފޮނުވާލާފައިވެއެވެ. އަދި މެޗްގެ ބާކީ ބައި ކުޅެފައިވަނީ ކުޅިބެލުންތެރިން ނުލާ ހުސްކޮށް ކޯޓް ބާއްވައިގެންނެވެ. މިމުބާރާތުގެ ހަތަރު ވަނަ ބުރުގައި ޖޯކޮވިޗް ބައްދަލުކުރުމަށް ހަމަޖެހިފައިވަނީ މުބާރާތުގައި 14 ވަނައަށް ސިޑް ކުރެވިފައިވާ މިލޯސް ރައޮނިކްއާއެވެ.
މެޗަށްފަހު ވާހަކަ ދައްކަމުން ޖޯކޮވިޗްވަނީ މިމެޗް ކުޅެނިކޮށް ލިބުނު އަނިޔާގެ ސަބަބުން ހަތަރު ވަނަ ބުރުގެ މެޗްގައި އޭނާ އަށް ފަހަރެއްގައި ނުކުޅެވިދާނެކަން ހާމަކޮށްފައެވެ. އޭނާ ހާމަކުރިގޮތުގައި ދެދުވަސް ތެރޭގައި މިއަނިޔާއިން ރަނގަޅުވާނެކަމެއް ނޭނގޭ ކަމަށާއި އަދި އެހެން ވެއްޖެނަމަ ހަތަރުވަނަ ބުރުގައި އޭނާ ނުފެނިދާނެކަމަށެވެ. އަދި މިމެޗްމަތިން އޭނާ އަބަދުވެސް ހަނދާން ހުންނާނެ ކަމަށާއި ދިމާވި ހާލަތަށް ބަލާ މިއީ ހަނދާނުން ފިލައިގެންދާނެ ކާމިޔާބީއެއް ނޫން ކަމުގައި އޭނާ ހާމަކުރިއެވެ.
މިމުބާރާތުގެ ހަތަރުވަނަ ބުރުގައި ޖޯކޮވިޗް ވާދަކުރާ ރައޮނިކް ހަތަރު ވަނަ ބުރުން ޖާގަހޯދީ ތިންވަނަ ބުރުގައި ހަންގޭރީގެ މާޓަން ފުކްސޮވިޗް އާއި ބައްދަލުކުރިމެޗް 3 ސެޓް 1 ސެޓުން މެޗް ކާމިޔާބުކޮށްގެންނެވެ. އެއީ ހަތެއް ހައެއް، ފަހެއް ހަތެއް، ހައެއް ދެއެއް އަދި ހައެއް ދެއަކުންނެވެ.
މިމުބާރާތުގެ ތިންނަ ބުރުގައި ކުޅުނު އެހެން މެޗްތަކަށް ބަލާލައިރު އެންމެ ފޯރިގަދަ ވެގެންދިޔައީ މުބާރާތުގެ ތިންވަނަ ސީޑް އޮސްޓްރިއާގެ ޑޮމިނިކް ތީމް އާއި އޮސްޓްރޭލިއާގެ ނިކް ކިރްގިއޯސް ބައްދަލުކުރި މެޗެވެ. މިމެޗް ފަހަތުން އަރާ ތިން ސެޓް 2 ސެޓުން ކާމިޔާބުކުރީ ތީމްއެވެ. މިމެޗްގެ ފުރަތަމަ ދެސެޓް ހަތަރެއް ހައެއް، ހަތަރެއް ހަޔަކުން ކިރްގިއޯސް ކާމިޔާބުކޮށްފައިވަނިކޮށް ފަހު ތިން ސެޓް ތީމް ކާމިޔާބުކުރީ ހައެއް ތިނެއް، ހައެއް ހަތަރެއް އަދި ހައެއް ހަތަރަކުންނެވެ. ހަތަރުވަނަ ބުރުގައި ތީމް ބައްދަލުކުރާނީ ބަލްގޭރިއާގެ ގްރިގޯ ޑިމިޓްރޯފްއާއެވެ.
ތިންވަނަ ބުރުގައި އެންމެ ހައިރާން ކުރުވަނިވި ނަތީޖާއެއް ނިކުތީ މި މުބާރާތުގެ ކޮލިފައިންގ ކުޅެގެން މުބާރާތުން ޖާގަހޯދި ދުނިޔޭގައި 114 ވަނައަށް ރޭންކް ކުރެވިފައިވާ ރަޝިޔާގެ އަސްލާން ކަރަޓްސޭވް އާއި މުބާރާތުގައި އަށްވަނައަށް ސީޑް ކުރެވިފައިވާ އާޖެންޓީނާގެ ޑިއޭގޯ ޝްވާޓްސްމަން ބައްދަލުކުރިމެޗުންނެވެ. މިމެޗް ގިނަ ބަޔަކު ހީކުރިގޮތާއި ހިލާފަށް ކަރަޓްސޭވް ކާމިޔާބުކުރީ ސީދާ ތިން ސެޓުންނެވެ. އެއީ ހައެއް ތިނެއް، ހައެއް ތިނެއް އަދި ހައެއް ތިނަކުންނެވެ. އަދި ކޮލިފައިންގެ ފުރަތަމަ ބުރުގައި ސެޓެއް ގެއްލުނު ފަހުން މިހާތަނަށް އެއްވެސް މެޗެއްގައި ސެޓެއްވެސް ކަރަޓްސޭވްއަތުން އަދި ގެއްލިފައެއް ނުވެއެވެ. ހަތަރުވަނަ ބުރުގައި ކަރަޓްސޭވް ބައްދަލުކުރާނީ ޑެނިސް ޝަޕޮލަލޯވް ބަލިކޮށް ހަތަރުވަނަ ބުރުން ޖާގަހޯދި ފީލިކްސް އައުގަރ އެލިއަސިމްއާއެވެ. އަދި މުބާރާތުގެ ހަވަނަ ސީޑް އެލެގްޒެންޑަރ ޒްވަރޭވް ވަނީ އެޑްރިއަން މަނަރީނޯ އާއި ބައްދަލުކުރިމެޗް ހައެއް ތިނެއް، ހައެއް ތިނެއް އަދި ހައެއް އެކަކުން މެޗް ކާމިޔާބުކޮށްފައެވެ.