މިޔަންމާގެ ސަރުކާރާއި ދެކޮޅަށް ބަޣާވާތް ކުރި ފަރާތްތަކަށް އެމެރިކާއިން ދަތިކުރުމުގެ އިތުރު ފިޔަވަޅުތައް އެޅުމަށް ނިންމައިފިއެވެ.
މިދިޔަ ނޮވްމެބަރު މަހު ބޭއްވި މިޔަންމާގެ އިންތިޚާބު ބޮޑުތަނުން ކާމިޔާބުކުރެއްވި މިޔަންމާގެ ޑިމޮކްރަޓިކް ލީޑަރު އަން ސަން ސޫކީ ސަރުކާރާއި ދެކޮޅަށް އެ ޤައުމުގެ ސިފައިން ބަޣާވާތްކޮށް، ސޫކީއާއި އެނާގެ ސަރުކާރަށް ނިސްބަތްވާ އިސް ގިނަ އޮފިޝަލުންތަކެއް ހައްޔަރުކުރީ މިމަހުގެ އެއްވަނަ ދުވަހުއެވެ. އެއަށްފަހު އަސްކަރިއްޔާއިން ވަނީ އެ ޤައުމުގައި އެއް އަހަރުގެ މުއްދަތަށް ކުއްލި ޙާލަތު އިޢުލާނުކޮށްފައެވެ.
މިޔަންމާގެ ބަޣާވާތާއި ގުޅޭގޮތުން ވާހަކަދައްކަވަމުން އެމެރިކާގެ ރައީސް ޖޯ ބައިޑަން ވިދާޅުވީ މިޔަންމާގެ އަސްކަރިއްޔާއިން އަތުލައިގެން ބާރުތައް ދޫކޮށްލަންޖެހޭކަމަށެވެ. އަދި ޙައްޔަރުކޮށްފައިވާ ފަރާތްތައް މިނިވަންކުރަންޖެހޭކަމަށެވެ. ބައިޑަން ވިދާޅުވީ ބަޣާވާތާއި ގުޅިގެން ދަތިކުރުމުގެ ފިޔަވަޅުތައް އަޅާނެ ފަރާތްތައް މި ހަފުތާގެ ތެރޭގައި ނިންމާނެކަމަށާއި އެ ޤައުމަށް މުދާ ބޭރުކުރުމަށްވެސް ދަތިކުރާނެކަމަށެވެ.
ބައިޑަން ވިދާޅުވީ އެމެރިކާގައި ހިފަހައްޓާފައިވާ މިޔަންމާގެ އެއް ބިލިއަން އެމެރިކާ ޑޮލަރު އެ ޤައުމުގެ އަސްކަރިއްޔާއަށް ދޫ ނުކުރައްވާނެކަމަށެވެ. އަދި މިޔަންމާގެ ސަރުކާރަށް ފައިދާކުރާ އެމެރިކާގެ ހުރިހާ އެސެޓެއް ފުރީޒުކުރާނެކަމަށް ބައިޑަން ވިދާޅުވިއެވެ. ނަމަވެސް ޞިއްޙީ ޚިދުމަތްތަކަށާއި މަދަނީ ޖަމުޢިއްޔާތަކަށާއި ސީދާ މިޔަންމާގެ ރައްޔިތުންނަށް ފައިދާކުރާ ދާއިރާތަކަށް ވާގިވެރިވުމުގައި އެމެރިކާއިން ދެމި އޮންނާނެކަމަށް ބައިޑަން ވިދާޅުވިއެވެ.
މިޔަންމާގެ އަސްކަރިއްޔާއިންދަނީ ބަޣާވާތާއި ދެކޮޅަށް މުޒާހަރާ ކުރަމުންދާ މިޔަންމާގެ ގިނަ ޢަދަދެއްގެ ރައްޔިތުންނާއި ދެކޮޅަށް ބާރުގެ ބޭނުންކުރަމުންނެވެ. އަސްކަރިއްޔާގެ ފަރާތުން މިޔަންމާގެ އެންމެ ބޮޑު ދެ ސިޓީކަމުގައިވާ ޔަންގޮންއާއި މަންޑަލޭގައި ރޭގަނޑު 8ން ފަތިހު 4އަށް ކާފިއު އިޢުލާނުކޮށްފައިވާއިރު، އާންމުން ފޭސްބުކާއި ޓްވިޓާ، އިންސްޓާގުރާމްފަދަ މީސްމީޑިޔާގެ ވަޞީލަތްތައް ބޭނުންކުރުންވަނީ މުއްދަތެއް ނެތްގޮތަށް މަނާކޮށްފައެވެ.
ރައީސް ބައިޑަންވަނީ މިޔަންމާގެ އަސްކަރިއްޔާގެ ޢަމަލުތައް ކުށްވެރިކުރައްވާ، އެއީ އެ ޤައުމުން ޑިމޮކްރަސީއާއި ދިމާލަށް ކުރަމުންދާ މަސައްކަތަށާއި ޤާނޫނުތަކަށްދެވޭ ޙަމަލާއެއްގެ ގޮތުގައި ސިފަކުރައްވާފައެވެ. ބައިޑަންވަނީ ބާރުގެ ބޭނުންކުރުމާއި އަނިޔާވެރިކަން އިސް ނުކުރުމަށް މިޔަންމާގެ އަސްކަރިއްޔާއަށް ގޮވައިލައްވައިފައެވެ.