މި އަހަރު ބޭއްވުމަށް ހަމަޖެހިފައިވާ ފަލަސްޠީނުގެ އާންމު އިންތިޚާބާއި ރިޔާސީ އިންތިޚާބު ކުރިއަށް ގެންދާނެގޮތަކާއިމެދު އެ ޤައުމުގެ މައި ދެ ފެކްޝަންކަމުގައިވާ ފަތަހް އަދި ހަމާސުން އެއްބަސްވުމަކާއި ހަމައަށް އަތުވެއްޖެއެވެ.
ފަލަސްޠީނުގައި އެންމެ ފަހުން ޤާނޫނު ހަދާ މަޖިލީހުގެ އިންތިޚާބެއް ބާއްވާފައިވަނީ 2006ވަނަ އަހަރުގައެވެ. އެ އަހަރުގެ އިންތިޚާބު ކާމިޔާބުކޮށްފައިވަނީ ހަމާސުންނެވެ. އެ އިންތިޙާބަށްފަހު އުފެދުނު ސިޔާސީ ނުތަނަވަސްކަމުގެ ނަތީޖާއެއްގެ ގޮތުން 2007ވަނަ އަހަރުގައި ހަމާސްގެ ބާރުގެ ދަށަށް ޣައްޒާ ސްޓްރިޕްވަނީ ގެންގޮސްފައެވެ. އެއާއިއެކު އިތުރު އިންތިޚާބެއް ބޭއްވުމަށް ހުރަސްތަކެއް އެޅި ފާއިތުވި 15 އަހަރުގެ ތެރޭގައި އެ ޤައުމުގައި އިންތިޚާބެއް ބާއްވާފައެއް ނުވެއެވެ. ނަމަވެސް މިދިޔަ ޖަނަވަރީ މަހުގެ ތެރޭގައި ފަލަސްޠީނުގެ ރައީސް މަޙްމޫދު އައްބާސްގެ އިދާރާއިން ނެރުނު ޤަރާރެއްގައިވަނީ މި އަހަރުގެ މެއި މަހުގެ 22 ވަނަ ދުވަހުގައި ޤާނޫނު ހަދާ މަޖިލީހުގެ އިންތިޚާބު ބާއްވާ ޖުލައި މަހުގެ 31ވަނަ ދުވަހު ރިޔާސީ އިންތިޚާބު ބާއްވާނެކަމަށް އިޢުލާނުކޮށްފައެވެ.
އިންތިޚާބާއި ގުޅޭގޮތުން މަޝްވަރާކުރުމަށް މިމަހުގެ 8 ވަނަ ދުވަހު ފަލަސްޠީނުގެ ހަމާސާއި ފަތަހް ފެކްޝަނުންވަނީ މިޞްރުގެ ކައިރޯގައި ބައްދަލުކޮށްފައެވެ. ދެ ދުވަހަށް ދެމިގެންދިޔަ މަޝްވަރާތަކަށްފަހު ދެ ފަރާތުން އެކުގައި ނެރުނު ބަޔާނެއްގައި ބުނީ ތާވަލުކޮށްފައިވާ ގޮތަށް އިންތިޚާބު ބާއްވާ، އިންތިޚާބުގެ ނަތީޖާއަށް އިޚްތިރާމްކުރުމަށް ފަތަހައާއި ހަމާސްގެ އިތުރުން އެ ޤައުމުގެ އިތުރު 12 ފެކްޝަނަކުން އެއްބަސްވެފައިވާކަމަށެވެ. އޭގެ ތެރޭގައި ހަނގުރާމަވެރި ޖަމާއާތް އިސްލާމިސްޓް ޖިހާދު މޫވްމަންޓުވެސް ހިމެނެއެވެ.
ކައިރޯގައި ކުރިއަށްދިޔަ މަޝްވަރާތަކުގެ ބައިވެރިންވަނީ އިންތިޚާބާއި ގުޅޭ ކޯޓެއް ޤާއިމްކުރުމަށްވެސް އެއްބަސްވެފައެވެ. އެ ކޯޓުގައި ހިމެނޭނީ ހުޅަނގު އައްސޭރިއާއި ޣައްޒާއާއި އިރުމަތީ ޤުދުސްގެ ފަނޑިޔާރުންނެވެ. އިންތިޚާބާއި ގުޅޭ ހުރިހާ މައްސަލައެއް ބަލާނީ އެ ކޯޓުންނެވެ.
އޭގެ އިތުރުން ހުޅަނގު އައްސޭރީގެ ވޯޓުލާ މަރުކަޒުތަކުގެ ސަލާމަތީ ކަންކަން ބަލަހައްޓާނީ ފަތަހުގެ ފުލުހުންކަމަށާއި ޣައްޒާގެ ވޯޓުލާ މަރުކަޒުގެ ސަލާމަތީ ކަންކަން ބަލަހައްޓާނީ ހަމާސްގެ ފުލުހުންކަމަށްވަނީ ނިންމާފައެވެ. އަދި ހުޅަނގު އައްސޭރިއާއި ޣައްޒާގައި ބަންދުކޮށްފައިވާ ސިޔާސީ ހައްޔަރީން ފަތަހާއި ހަމާސްގެ ފަރާތުން ދޫކޮށްލައި، އެއްވެސް ހުރަހެއް ނެތި ކެންޕެއިނު ކުރުމުގެ ފުރުޞަތު ދިނުމަށްވެސް ދެ ފެކްޝަނުންވަނީ އެއްބަސްވެފައެވެ.
ފަލަސްޠީނުގެ ގިނަ ރައްޔިތުން ޤަބޫލުކުރާ ގޮތުގައި ގިނަ އަހަރުތަކަކަށްފަހު އިންތިޚާބެއް ބޭއްވުމަށް ރައީސް އައްބާސް ނިންމަވާފައިވަނީ އެމެރިކާގެ އައު ރައީސް ޖޯ ބައިޑަންއަށް އެމަނިކުފާނު ޑިމޮކްރަސީއަށްޓަކައި މަސައްކަތްކުރައްވާކަން ދެއްކެވުމަށެވެ. ކުރިއަށް އޮތް އިންތިޚާބުގައި އިތުރު ދައުރަކަށް ވާދަކުރައްވާނެކަމަށް ބެލެވިފައިވާ ރައީސް އައްބާސް ބޭނުންފުޅުވަނީ ފަލަސްޠީނާއި އެމެރިކާއާއި ދެމެދު އޮންނަ ރަނގަޅު ކުރުމަށެވެ.
ކުރިއަށް އޮތް އިންތިޚާބުތަކުގައި ފަލަސްޠީނުގެ ޣައްޒާއައި ހުޅަނގު އައްސޭރީގެ 2.8 މިލިއަން މީހުންނަށް ވޯޓުލުމުގެ ހައްޤު ލިބިގެންވެއެވެ.