އެމެރިކާގެ ކުރީގެ ރައީސް ޑޮނަލްޑް ޓްރަންޕް އަޒުލްކުރުމުގެ ޝަރީޢަތް ކުރިއަށް ގެންދިޔުމަށް ފެންނަކަމަށް އެ ޤައުމުގެ ޤާނޫނު ހަދާ މަޖިލީހުގެ މަތިގެއިން ނިންމައިފިއެވެ.
މިދިޔަ ޖަނަވަރީ މަހުގެ 6ވަނަ ދުވަހުގައި ޓްރަންޕަށް ތާއިދުކުރާ ގިނަ ޢަދަދެއްގެ ބަޔަކު ވަނީ އެމެރިކާގެ ޤާނޫނު ހަދާ މަޖިލީސް ހިންގާ ކޮންގެރެސް އިމާރާތަށް ވަދެ، އެތަނުގައި ހަމަނު ޖެހުން ހިންގާފައެވެ. މި ހަމަނުޖެހުންތަކުގައި ފުލުހަކު ހިމެނޭގޮތަށް ފަސް މީހުންވަނީ މަރުވެފައެވެ. ޓްރަންޕްގެ ސަޕޯޓަރުން އެ އިމާރާތުގައި ހަމަނު ޖެހުން އުފައްދާފައިވަނީ ރިޔާސީ އިންތިޚާބު އޮޅުވާލާފައިވާކަމަށް ވިދާޅުވެ، އިންތިޚާބު ކާމިޔާބުކުރެއްވީ ޖޯ ބައިޑަންކަމަށް ޤާނޫނު ހަދާ މަޖިލީހުން ކަށަވަރުކުރާ ވަގުތާއި ދިމާކޮށް ނަތީޖާއާއި މެދު އޮތް ހިތްހަމަނުޖެހުން ފައުޅުކުރުމަށް އެ އިމާރާތް ދޮށަށް އެއްވުމަށް ރައީސް ޓްރަންޕް ގޮވާލެއްވުމުންނެވެ.
ކެޕިޓޮލްގެ ހާދިޘާ ހިންގަމުން ދިޔަ ވަގުތުގައިވެސް އެތަނުގައި ޙަރަކާތްތެރިވަމުން ދިޔަ ސަޕޯޓަރުން ދެކެ ލޯބިވެވަޑައިގަންނަވާކަމަށްވެސް ޓްރަމްޕުވަނީ ވިދާޅުވެފައެވެ. އެ ހާދިޘާއާއި ގުޅިގެން ޑިމޮކްރަޓުންވަނީ ޓްރަމްޕް އަޒުލްކުރުމުގެ މަސައްކަތް ފަށައިފައެވެ.
އެމެރިކާގެ ޤާނޫނު ހަދާ މަޖިލީހުގެ މަތިގެއިން ޝަރީޢަތް ކުރިއަށް ގެންދިޔުމަށް ފެންނަކަމަށް ވޯޓު ދީފައިވަނީ މަޖިލީހުގައި ތިއްބަވާ 100 މެންބަރުންގެ ތެރެއިން 56 މެންބަރުންނެވެ. އަދި ޝަރީޢަތް ކުރިއަށް ގެންދިޔުމަށް ނުފެންނަކަމަށް ވޯޓުދިނީ 44 މެންބަރުންނެވެ. ޑިމޮކްރަޓުންނަށް ނިސްބަތްވާ 50 މެންބަރުންވެސް ޝަރީޢަތް ކުރިއަށް ގެންދިޔުމަށް ފެންނަކަމަށް ވޯޓު ދީފައިވާއިރު ރިޕަބްލިކަނުންގެ ހަ މެންބަރަކުވެސްވަނީ ޑިމޮކްރަޓުންނާއި ބައިވެރިވެފައެވެ.
ޝަރީޢަތް ކުރިއަށް ގެންދިޔުމާއި ގުޅޭގޮތުން ނަގާފައިވާ ވޯޓުގެ ނަތީޖާ ނުކުން ގޮތުން އެ ޝަރީޢަތުގައި ޓްރަންޕު ކުށްވެރިވެފައިވާކަމަށް ނިންމިދާނެ ކަމާއިމެދުވަނީ ސުވާލު އުފެދިފައެވެ. ޓްރަންޕު ކުށްވެރިވެފައިވާކަމަށް ނިންމުމަށް މަޖިލީހުގެ ތިންބައި ކުޅަ ދެބައިގެ ވޯޓު ބޭނުންވެއެވެ. އެހެންކަމުން މަޖިލީހުގައި ތިއްބަވާ 50 މެންބަރުންގެ އިތުރުން ރިޕަބްލިކަނުންގެ 17 މެންބަރެއްގެ ވޯޓުވެސް ޓްރަންޕު ކުށްވެރިވެފައިވާމަށް ނިންމުމަށް ބޭނުންވާނެއެވެ.
ޝަރީޢަތުގައި މައްސަލަ ހުށަހެޅުމުގައި ޕްރޮސެކިއުޓަރުންގެ ދައުރު ޢަދާކުރައްވާ ޑިމޮކްރަޓުންގެ މެންބަރުންވަނީ ޖަނަވަރީ މަހުގެ 6ވަނަ ދުވަހުގައި ކެޕިޓޮލް އިމާރާތުގައި ހިންގި ހަމަނުޖެހުންތައް ދައްކުވައިދޭ ވީޑިއޯއެއް ދައްކާފައެވެ. އަދި އިންތިޚާބު ކާމިޔާބުކުރެއްވީ ޖޯ ބައިޑަންކަމަށް ނިންމިޔަ ނުދިނުމަށް ކެޕިޓޮލް އިމާރާތް ދޮށަށް އެއްވެ އެކަމަށް ހުރަސް އެޅުމަށް އޭގެ އިރުކޮޅެއް ކުރިން ޓްރަންޕު ގޮވާލައްވާ މަންޒަރުތައްވެސް އެ ވީޑިއޯގައިވަނީ ހިމަނާފައެވެ.
ކެޕިޓޮލްއަށް ވަދެގައިން މީހުން ފުލުހުންނަށް ޙަމަލާދީ ބެރިކޭޑުތައް ވައްޓާލައި މަންޒަރާއި، މެންބަރުން ތިއްބެވި ކޮޓަރިކޮޅު ގާޑުކުރަން ތިބި އޮފިސަރުން މުޒާހަރާގެ ބައިވެރިއެއްގެ ގަޔަށް ބަޑިޖަހާ މަންޒަރުވެސް ވީޑިއޯގައިވަނީ ހިމަނާފައެވެ. އެ ވީޑިއޯ ދެއްކުމަށްފަހު ޑިމޮކްރަޓުންގެ މެންބަރު ޖޭމީ ރަސްކިން ވިދާޅުވީ އެ ވީޑިއޯއިން ފެނިގެން ދިޔައީ ރައީސަކު އަޒުލްކުރަންޖެހޭ ވަރުގެ ކަމެއް ނޫންނަމަ އެފަދަ އެހެން އަމަލެއް ދެން ނޯންނާނެކަމަށެވެ.
ޓްރަންޕުގެ ދިފާޢުގައި ވާހަކަދެއްކެވި އޭނާގެ ވަކީލުން ބޮޑަށް އަލިއަޅުވާލާފައިވަނީ އެމަނިކުފާނު އަޒުލްކުރުމަށް ނިންމާފައިވާ ނިންމުމުގައި ހުރި މައްސަލަތަކާއި ގުޅޭ ގޮތުންނެވެ. އެމަނިކުފާނުގެ ވަކީލުންވަނީ ޓްރަންޕު އަޒުލްކުރުމަށް ކުރަމުންދާ މަސައްކަތްތަކަކީ ދުސްތޫރާއި ޚިލާފު މަސައްކަތްތަކެއްކަމަށާއި، އޭގެ ބޭނުމަކީ، އެމެރިކާގެ ވެރިކަމުގައި ރައީސް ޓްރަންޕު މިހާރު ނުހުންނެވި ނަމަވެސް ކުރިއަށް އޮތް ތަނުގައި އެމެރިކާގެ ރައީސްކަމަށް ދުވަހަކުވެސް ޓްރަންޕަށް ނާދެވޭނެކަން ޔަޤީންކުރުންކަމަށެވެ. މީގެ ކުރިންވެސް ޓްރަންޕު އަޒުލްކުރުމަށް ޑިމޮކްރަޓުން މަސައްކަތްކޮށްފައިވާކަން ފާހަގަކުރަމުން ވަކީލުން ބުނީ ޑިމޮކްރަޓުންނަކީ އަޒުލްކުރުމަށް ވަރަށް ޝައުގުވެރިވާ ބައެއްކަމަށެވެ.
ރައީސް ޓްރަންޕަކީ އެމެރިކާގެ ތާރީޚުގައިވެސް އަޒުލްކުރާ އެ ޤައުމުގެ ތިންވަނަ ރައީސްއެވެ. އަދި ދެފަހަރަށް އަޒުލްކުރާ ފުރަތަމަ ރައީސްއެވެ. މީގެ އަހަރެއް ކުރިންވެސް ޓްރަންޕު އަޒުލްކުރުމަށް ޑިމޮކްރަޓުން މަސައްކަތްކޮށްފައިވާއިރު އެ ފަހަރު ސަލާމަތްވެވަޑައިގަތީ އޭރު ރިޕަބްލިކަނުންގެ ބާރުގެ ދަށުގައި އޮތް ޤާނޫނު ހަދާ މަޖިލީހުން އެމަނިކުފާނު ކުށްވެރިވެފައި ނުވާކަމަށް ނިންމުމުންނެވެ.