ބޭކާރުގޮތުގައި އިންޓަނެޓް ބޭނުން ނުކޮށް، އިންޓަނެޓަކީ ޤައުމު ބިނާކުރުމުގެ މުހިންމު ވަސީލަތަކަށްހެދުމަށް މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މަލީހު ޖަމާލް ގޮވާލައްވައިފިއެވެ.
މިނިސްޓަރ މަލީހު މިހެން ވިދާޅުވި "ސޭފަރ އިންޓަނެޓް ޑޭ 2021" ފާހަގަކުރުމަށް ދެއްވި ވީޑިއޯ މެސެޖުގައެވެ.
މިއަހަރުގެ "ސޭފަރ އިންޓަނެޓް ޑޭ" ރާއްޖޭގައި ފާހަގަކުރުމުގެ ގޮތުން، ސްކޫލް ދަރިވަރުންނަށް އިންޓަނެޓް ބޭނުންކުރުމުގައި ރައްކާތެރި މާހައުލެއް ހޯދައިދިނުމާ ގުޅޭ ޕްރޮގްރާމްތައް ކުރިއަށްގެންދިއުމަށް ވަނީ ހަމަޖެހިފައެވެ. މިނިސްޓަރ މަލީހު ޖަމާލު ވިދާޅުވީ އެޑިއުކޭޝަން މިނިސްޓްރީއާ ކޮމިއުނިކޭޝަން މިނިސްޓްރީ ގުޅިގެން މުހިންމު ޕްރޮގްރާމްތަކެއް ރާވާފައިވާކަމަށެވެ.
މިނިސްޓަރ މަލީހު ވަނީ އިންޓަރނެޓަކީ އިންސާނިއްޔަތަށް ލިބުނު އެއް ނިޢުމަތްކަން ހަނދާންކޮށް ތަހުޒީބުކަމާއެކު އިންޓަރނެޓް ބޭނުންކުރުމަށް ގޮވާލައްވާފައެވެ. އެގޮތުން އިންޓަނެޓްގެ ބޭނުން، ބިނާކުރުވަނިވި ގޮތްތަކަށް ބޭނުންކުރުމަށް މިނިސްޓަރ ގޮވާލެއްވިއެވެ.
ބޭކާރު ކަންކަމުގައި އިންނެޓްގައި ވަގުތު ހޭދަކުރުމުގެ ބަދަލުގައި ކުރިއަރައިގެން ދާން ބޭނުންވާ ރޮނގުތަކުން މަޢުލޫމާތު މުއްސަނދިކޮށް، ޤައުމަށް ފައިދާކުރާނެ ގޮތްތަކަށް ބޭނުންހިފުމަށް މިިނިސްޓަރ އެދިވަޑައިގެންނެވިއެވެ. މިގޮތުގައި އިންޓަނެޓް ބޭނުންކުރުމަށް، ދަރިވަރުންނަކީ ޒިންމާދާރު ބަޔަކަށް ހެދުމުގައި ބެލެނިވެރިންގެ ރޯލު ބޮޑުކަންވެސް މިނިސްޓަރ ފާހަގަކުރެއްވިއެވެ.
"އިންޓަނެޓް ޒިންމާދާރުގޮތުގައި ބޭނުންކުރުމަށް ކުދިންނަށް ކިޔައިދޭންޖެހޭ. އޭރުން މުސްތަޤްބަލް އުޖާލާވާނީ، މިއީ ޤައުމު ބިނާކުރުމުގައިވެސް މުހިންމު ވަސީލަތެއް. ކުދިން ޤައުމަށް މުހިންމު ދާއިރާތަކުން ކުރިއަރައިގެންދިއުމަށް އެހީއެއް." މިނިސްޓަރ މަލީޙު ވިދާޅުވިއެވެ.
އެނޑިއުކޭޝަން މިނިސްޓަރ ޑރ.އައިޝަތު އަލީ ވިދާޅުވީ ކޯވިޑް19ގެ ޙާލަތާ ގުޅިގެން ރާއްޖޭގައި ތަޢުލީމީ ނިޒާމުގައި އިންޓަނެޓްގެ މުހިންމުކަން ބޮޑުވެގެން ހިނގައްޖެކަމަށެވެ. އެގޮތުން ސްކޫލް މާޙައުލާ އަދި ގޭގައިވެސް އިންޓަނެޓް ބޭނުންކުރާ މިންވަރު އިތުރުވެއްޖެކަން މިނިސްޓަރ ފާހަގަކުރެއްވިއެވެ. އެހެންކަމުން އިންޓަނެޓަށް ދަރިވަރުން އަޙުލުވެރިވެފައިވާ މިންވަރު އިތުރުކޮށް، އިންޓަނެޓްގެ ޒަރިއްޔާއިން އަންނަ ނޭދެވޭ ކަންކަމަށް ކުދިން ހޭލުންތެރިކުރުމުގެ މުހިންމުކަން ބޮޑުވެފައިވާކަމަށް މިނިސްޓަރ ވިދާޅުވިއެވެ.
"އިންޓަނެޓްގެ އަނދިރިފަރާތް ކުޑަކުދިންނަށް ބުނެދޭންޖެހޭ. އަދި އެއްވެސް ގޯނާއެއް ކުރިމަތިވެއްޖެނަމަ އެކަން ޙިއްސާކުރުމުގެ މުހިންމުކަން ކުދިންނަށް ބުނެދޭންޖެހޭ." މިނިސްޓަރ އައިޝަތު އަލީ ވިދާޅުވިއެވެ.
"ސޭފަރ އިންޓްނެޓް ޑޭ"ގެ ހަރަކާތްތައް ސްކޫލްތަކުގައި ކުރިއަށްގެންދާއިރު، ޓީޗަރުންނާ ދަރިވަރުން އަދި ބެލެނިވެރިންގެ ހޭލުންތެރިކަން އިތުރުކުރުމުގެ ޕްރޮގްރާމްތައްވެސް ކުރިއަށްގެންދާނެއެވެ.