ޗައިނާއާއި އެމެރިކާއާއި ދެމެދު އޮތް ގުޅުން ރަނގަޅުކުރުމަށް ޗައިނާގެ އިސް ޚާރިޖީ ފަރާތް ގޮވައިލައްވައިފިއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ދައުރުގައި ޗައިނާއާއި އެމެރިކާއާއި ދެމެދު އޮންނަ ގުޅުންވަނީ މީގެ ކުރިން ގޯސް ނުވާ މިންވަރަށް ހީނަރުވެފައެވެ. 1979ވަނަ އަހަރުގައި ޚާރިޖީ ގުޅުން ޤާއިމްކޮށްފައިވާ ޗައިނާއާއި އެމެރިކާއާއި ދެމެދު ވިޔަފާރިއާއި ޓެކްނޮލޮޖީގެ މައްސަލަތަކުގެ އިތުރުން ހޮންގްކޮންގާއި ޓައިވާނާއި ޝީޗިއާން އަދި ދެކުނު ޗައިނާ ކަނޑާއިގުޅޭގޮތުންވަނީ ވަރަށް ބޮޑަށް ދެބަސްވެފައެވެ.
ޗައިނާގެ ސެންޓްރަލް ފޮރިން އެފެއާސް ކޮމިޝަން އޮފް ދަ ޗައިނީޒް ކޮމިއުނިސްޓް ޕާޓީގެ ޑިރެކްޓަރު، ޔަންގ ޖިއެޗީއަކީ އެމެރިކާގެ ރައީސްކަމާއި ޖޯ ބައިޑަން ޙަވާލުވެވަޑައިގަތުމަށްފަހު ޗައިނާއާއި އެމެރިކާއާއި ދެމެދު އޮތް ގުޅުމާ ގުޅޭގޮތުން ވާހަކަދައްކަވާ އެންމެ އިސް ޚާރިޖީ ފަރާތެވެ. ކޮމިއުނިސްޓު ޕާޓީގެ އެކުލަވާލުން އޮންނަ ގޮތުން ޔަންގ ޖިއެޗީއަކީ ޚާރިޖީ ކަންކަމުގައި ޗައިނާގެ ޚާރިޖީ ވަޒީރަށްވުރެވެސް އިސް ފަރާތެކެވެ.
އެމަނިކުފާނުގެ ވާހަކަފުޅުގައި ވިދާޅުވީ ޗައިނާއާއި އެމެރިކާއާއި ދެމެދު އޮތް ގުޅުން ރަނގަޅުކުރަންޖެހޭކަމަށާއި، ޗައިނާގެ ދާޚިލީ މައްސަލަތަކަށް އެމެރިކާއިން ވަނުން ހުއްޓާލަންޖެހޭކަމަށެވެ. އެގޮތުން ހޮންގުކޮންގާއި، ޓިބެޓާއި ޝީޗިއާން ގެ މައްސަލައިގެ އިތުރުން ޗައިނާގެ އިސްތިގުލާލަށާއި ސަރަޙައްދީ ކަންކަމާއި ގުޅުންހުރި އެހެނިހެން މައްސަލަތަކަށް އެމެރިކާއިން ނުވަނުމަށް އޭނާވަނީ ގޮވައިލައްވައިފައެވެ. އެމެރިކާގެ އިންތިޚާބުތައް ހިމެނޭގޮތަށް އެ ޤައުމުގެ އެއްވެސް ދާޚިލީ މައްސަލައަކަށް ޗައިނާއިން ބާރު ނުފޯރުވާކަމަށްވެސް އޭނާވަނީ ފާހަގަކުރައްވައިފައެވެ.
ޔަންގ ޖިއެޗީ ވިދާޅުވީ ދުނިޔޭގެ މަޝްރަހުގައި އެމެރިކާ އޮތް މަޤާމަށް ވާދަކުރުމަށް ޗައިނާއިން ގަސްތުނުކުރާކަމަށެވެ. ނަމަވެސް ޗައިނާއަށް ލިބޭ ކުރިއެރުމަކީ އެއްވެސް ބަޔަކަށް ހުއްޓުވޭނެ ކުރިއެރުމެއް ނޫންކަމަށް އޭނާ ވިދާޅުވިއެވެ.
އޭގެ އިތުރުން ޔަންގ ޖިއެޗީވަނީ ވިޔަފާރީގެ ނަމުގައި ޤައުމީ ސަލާމަތާއިބެހޭ ކަންކަމުގެ ނާޖާއިޒު ފައިދާ ނުނެގުމަށް ރައީސް ބައިޑަންގެ ސަރުކާރަށް ގޮވައިލައްވައިފައެވެ. އޭނާ ވިދާޅުވީ ދެ ޤައުމުގެ ދެމެދުގައި އޮތް ވާދަވެރިކަން ނައްތާލައި، ދެ ޤައުމުގެ ގުޅުން ރަނގަޅުކުރުމަށް ޗައިނާއާއިއެކު އެމެރިކާއިން މަސައްކަތްކުރާނެކަމަށް އުންމީދުކުރައްވާކަމަށެވެ. އަދި ދެ ފަރާތުންވެސް އެއްބަޔަކު އަނެއް ބަޔަކަށް އިޚްތިރާމްކޮށް، ދެބަސްވުންތަކުން އެއްފަރާތްވެ، ތުހުމަތުތައް ކުރުން ހުއްޓާލައި އެކުގައި މަސައްކަތްކުރުމަށް ޗައިނާއިން ތައްޔާރަށް އޮތްކަމަށް އޭނާ ވިދާޅުވިއެވެ.
ޔަންގ ޖިއެޗީގެ ވާހަކަފުޅުގައިވަނީ ތަކުރާރުކޮށް އެކުގައި މަސައްކަތްކުރުމާއި ގުޅޭގޮތުން ވާހަކަދައްކަވާފައެވެ.