އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ފޭސްބުކް އެކައުންޓުން ކޮށްފައިވާ ޕޯސްޓެއް އެ ކުންފުނިން ޑިލީޓްކޮށްލާ، ނަތަންޔާހޫގެ އެކައުންޓާއި ގުޅުންހުރި ޗެޓުބޮޓެއް ސަސްޕެންޑު ކޮށްފިއެވެ.
ފޭސްބުކުން އެގޮތަށް ޢަމަލުކޮށްފައިވަނީ އެ ކުންފުނީގެ ޕްރައިވެސީ ޕޮލިސީއާއި ޚިލާފުވެފައިވާތީކަމަށް އެ ކުންފުނިން ބުންޏެވެ.
ބޮޑުވަޒީރު ނަތަންޔާހޫގެ ފޭސްބުކް ޕޭޖުގައި ކޮރޯނާވައިރަހާ ގުޅޭގޮތުން ހިމަނާފައިވާ ލިންކަކަށް ފިތާލުމުން އެ ޕޭޖު ބަލާ މީހުންނަށް އޮޓޯ މެސެޖެއް އަންނަ ގޮތަށްވަނީ ހަދާފައެވެ. ބޮޑުވަޒީރު ނަތަންޔާހޫ ފޮނުއްވަވާ މެސެޖެއް ގޮތުގައި ދައްކާފައިވާ އެ މެސެޖުގައި ބުނެފައިވަނީ އުމުރުން 60 އަހަރުން މަތީގެ އެއްވެސް ގާތް ތިމާގެ މީހެއް ނުވަތަ ރައްޓެއްސެއް ކޯވިޑް-19 ވެކްސިން ނުޖަހާ ހުރިނަމަ އެމީހެއްގެ ނަމާއި ފޯނު ނަމްބަރު ޙިއްޞާކުރުމަށެވެ. އޭރުން އެ ފަރާތަކަށް ބޮޑުވަޒީރު ގުޅުއްވާ ވެކްސިން ޖެހުމަށް ބާރު އަޅުއްވާނެކަމަށް މެސެޖުގައިވަނީ ބުނެފައެވެ.
އެ ޕޯސްޓު ފޭސްބުކުން މިހާރުވަނީ ފޮހެލައިފައެވެ. ފޭސްބުކުގެ ތަރުޖަމާނެއް ބުނީ އެ ކުންފުނީގެ ޕްރައިވެސީ ޕޮލިސީގެ ދަށުން އެއްވެސް މީހެއްގެ ޞިއްޙީ މާއުލޫމާތު ޙިއްޞާކުރުމަށް ނޭދެވޭނެކަމަށެވެ. އަދި އެފަދަ މަޢުލޫމާތު ޙިއްޞާކުރާ ޕޯސްޓުތައް ފޭސްބުކުގައި ޝާޢިއު ނުކުރެވޭނެކަމަށް އެ ކުންފުނިން ބުންޏެވެ.
ފޭސްބުކްގެ ނިންމުމާއި ގުޅިގެން ނަތަންޔާހޫގެ ލިކުޑް ޕާޓީންވަނީ އެކަމަށް ރައްދުދީ ބަޔާނެއް ނެރެފައެވެ. އެ ބަޔާނުގައި ބުނީ ފޭސްބުކްގައި ޖަހާފައިވާ ޕޯސްޓުގެ މަޤުސަދަކީ އިސްރާއީލުގެ ހުރިހާ ރައްޔިތުންނަށް ފުދޭ ވަރަށް ބޮޑުވަޒީރު ނަތަންޔާހޫ ވެކްސިން ގެންނަވާފައިވާއިރު، އިސްރާއީލުގެ އުމުރުން 60 އަހަރުން މަތީގެ މީހުން އެމީހުންގެ ފުރާނަ ރައްކާތެރިކުރުމަށް ވެކްސިން ޖެހުމަށް ބާރު އެޅުންކަމަށެވެ. ހުރިހާ އެންމެންވެސް ވެކްސިން ޖެހުމަށް އެ ޕާޓީން ގޮވާލަމުންދަނީ ވީއެންމެ އަވަހަށް އެ ޤައުމުގެ އިޤްތިޞާދު އަލުން ހުޅުވާލާ، ކޯވިޑް-19ން އަރައިގެން ފުރަތަމަ ޤައުމަށް އިސްރާއީލު ހެދުމަށްކަމަށްވެސް އެ ބަޔާނުގައިވަނީ ބުނެފައެވެ.
މީގެ ދެ އަހަރު ފަހުން ބާއްވާ އިންތިޚާބުގައި ބޮޑުވަޒީރުކަމުގެ އިތުރު ދައުރަކަށް ކުރިމަތިލައްވާ ނަތަންޔާހޫގެ ކެންޕެއިނުގެ އެންމެ މުހިންމު އެއް މެސެޖަކީ އެ ޤައުމުގެ ކޯވިޑް-19 ވެކްސިން މަޝްރޫޢުކަމުގައިވަނީ ހައްދަވާފައެވެ.