ނިއުކްލިޔަރ އެއްބަސްވުމާ ޚިލާފަށް އީރާނުން މަސައްކަތްކުރަމުންދާނަމަ ނިއުކްލިޔަރ ބޮމެއް ތައްޔާރު ކުރުމަށް ބޭނުންވާ މިންވަރަށް ނިއުކްލިޔަރ ހަކަތަ ހަމަކުރުމަށް އީރާނަށް ނަގާނީ މަދު ދުވަސްކޮޅެއްކަމަށް އެމެރިކާގެ ސެކެޓްރީ އޮފް ސްޓޭޓް އެންތޮނީ ބްލިންކެން ވިދާޅިވެއްޖެއެވެ.
އެންބީސީ ނިއުސްއަށް ދެއްވި ބަސްދީގަތުމެއްގައި ބްލިންކެން ވަނީ ދުނިޔޭގެ ބާރުތަކުން އީރާނާއިއެކު ވެފައިވާ ނިއުކްލިޔަރ އެއްބަސްވުމުގައި އެމެރިކާއިން އަލުން ބައިވެރިވާނީ އެ އެއްބަސްވުމާއި އެއްގޮތަށް އީރާނުން ޢަމަލުކުރާނަމަކަމަށް ވިދާޅުވާ ވިދާޅުވުން ތަކުރާރުކުރައްވާފައެވެ.
ބްލިންކެން ވިދާޅުވީ 2015ވަނަ އަހަރުގައި ސޮއިކޮށްފައިވާ ނިއުކްލިޔަރ އެއްބަސްވުން އެކުލަވާލުމުގައި ބަލާފައި ނުވާ އެހެނިހެން މައްސަލަތަކާމެދުވެސް އެ ޤައުމުން ވިސްނަމުންދާކަމަށެވެ. އޭގެ ތެރޭގައި އީރާނުގައި ހައްޔަރުކޮށްފައިހުރި އެމެރިކާގެ ރައްޔިތުން ދޫކޮށްލުންވެސް ހިމެނޭކަމަށް އޭނާ ވިދާޅުވިއެވެ. އީރާނާއިއެކު އެއްބަސްވުމަކާއި ހަމައަށް އާދެވުނަސް އަދި ނާދުވުނުކަމުގައިވިޔަސް އީރާނުގައި ހައްޔަރުކޮށްފައިތިބި އެމެރިކާގެ ރައްޔިތުން މިނިވަންކުރުމަކީ ކުރަންޖެހޭކަމެއްކަމަށް ބްލިންކެން ވިދާޅުވިއެވެ. އަދި އެ އިންތިޒާމް ހަމަޖެއްސުމަށް އެމެރިކާއިން ޚާއްޞަ އިސްކަމެއް ދޭނެކަމަށްވެސް އޭނާ ވިދާޅުވިއެވެ.
އީރާނުންވަނީ ނިއުކްލިޔަރ އެއްބަސްވުމާގުޅޭ ޝަރުތުތަކާއި ގުޅޭގޮތުން އަލުން މަޝްވަރާނުކުރާނެކަމަށް ބުނެފައެވެ. އެމެރިކާއިން އެއްބަސްވުމާ ވަކިވުމަކީ ހަމައެކަނި އެމެރިކާގެ މައްސަލައެއްކަމަށް އެ ޤައުމުން ބުންޏެވެ. އދގެ ސަލާމަތީ މަޖިލީހުގެ 2231ވަނަ ޤަރާރުގެ ދަށުންވެފައިވާ ނިއުކްލިޔަރ އެއްބަސްވުމުގެ ޝަރުތުތަކަކީ ބަދަލުގެނެވޭނެ ޝަރުތުތަކެއް ނޫންކަމަށާއި އެ އެއްބަސްވުމުގައި ބައިވެރިވާ ފަރާތްތަކަށްވެސް ބަދަލު ނުގެނެވޭނެކަމަށް އީރާނުގެ ޚާރިޖީ ވުޒާރާއިންވަނީ މި ހަފުތާގެ ތެރޭގައިވަނީ ބުނެފައެވެ.
2015ވަނަ އަހަރުގައި ދުނިޔޭގެ ބާރުތަކާއިއެކު އީރާނުން ވެފައިވާ "ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން"ގެ ދަށުން އީރާނުގެ ނިއުކުލިޔަރ މަސައްކަތްތައް މަދުކުރުމުގެ ބަދަލެއްގެ ގޮތުން އެ ޤައުމާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށްވަނީ އެއްބަސްވެފައެވެ. އެ އެއްބަސްވުމުގައި އެމެރިކާ، އިނގިރޭސިވިލާތް، ރަޝިޔާ، ޖަރުމަނުވިލާތް، ފަރަންސޭސިވިލާތް، ވިލާތުގެ އިއްތިޙާދު އަދި ޗައިނާއިންވަނީ ބައިވެރިވެފައެވެ. ނަމަވެސް 2018ވަނަ އަހަރުގެ ތެރޭގައި އެމެރިކާގެ ވެރިކަމާއި ރައީސް ޑޮނަލްޑް ޓްރަމްޕް ޙަވާލުވެވަޑައިގަތުމަށްފަހު އެމެރިކާއިންވަނީ އެ އެއްބަސްވުމުން ވަކިވެ، އީރާނާއި ދެކޮޅަށް ދަތިކުރުމުގެ ގިނަ ފިޔަވަޅުތަކެއް އަޅާފައެވެ. އޭގެ ސަބަބުން އީރާނުންވަނީ އެއްބަސްވުމާއި ޚިލާފަށް ބައެއް ކަންތައްތައް ކުރަން ފަށާފައެވެ.