ދެކުނު އެމެރިކާގެ ކްލަބް ތަކުގެ މެދުގައި ކުޅޭ އެންމެ ޝަރަފްވެރި ސަރަހައްދީ މުބާރާތްކަމަށްވާ ކޮޕާ ލިބެޓޮޑޯރެސްގެ ޗެމްޕިއަންކަން ބްރެޒިލްގެ ޕަލްމެއިރާސް ހޯދައިފިއެވެ. މި މުބާރާތް ޕަލްމެއިރާސް ކާމިޔާބުކުރީ ރޭ ކުޅުނު ފައިނަލް މެޗްގައި ބްރެޒިލްގެ ސަންތޯސްއާ ބައްދަލުކުރިމެޗް އެއް ލަނޑު ސުން ލަނޑުން ކާމިޔާބުކޮށްގެންނެވެ.
ރިއޯޑި ޖެނީރޯގެ މަރަކާނާ ސްޓޭޑިއަމްގައި ކުޅުނު މިމެޗްގައި ދެޓީމުންވެސް ވަނީ ވާދަވެރި ކުޅުމެއް ދައްކާފައެވެ. ނަމަވެސް ދެޓީމުންކުރެ އެއްވެސް ޓީމަކަށް މާގިނަ ފުރުސަތު ތަކެއް ތަނަވަސް ކުރެވިފައެއް ނުވެއެވެ. މިމެޗްގައި ޕަލްމެއިރާސްއިން ޖެހި މެޗްގެ ހަމައެކަނި ލަނޑު މެޗްގެ އިތުރު ވަގުތުގެ ނުވަވަނަ މިނެޓްގައި ޖަހާދިނީ ބަދަލު ކުޅުންތެރިޔާ ބްރެނޯ ލޯޕޭޒްއެވެ. މިއީ ޕަލްމެއިރާސްއިން ކޮޕާ ލިބެޓަޑޯރެސް ކާމިޔާބުކުރި ދެވަނަ ފަހަރެވެ. މީގެ ކުރިން އެޓީމްވަނީ 1999 ވަނަ އަހަރުވެސް މި މުބާރާތް ކާމިޔާބުކޮށްފައެވެ.
މިކާމިޔާބީއާއެކު މިއަންނަ މަހު ގަތަރުގެ ވެރިރަށް ދޯހާގައި ބޭއްވުމަށްހަމަޖެހިފައިވާ ފީފާ ކްލަބް ވާރލްޑް ކަޕްގައި ދެކުނު އެމެރިކާ ތަމްސީލް ކުރާނީ ޕަލްމެއިރާސްއެވެ. ކޮރޯނާ ވައިރަހުގެ ސަބަބުން ކުޅިބެލުންތެރިން ނުވައްދާ ކުޅުނު މިމެޗް ބަލާލަން ދައުވަތު ދީގެން ފަސް ހާހެއްހާ މީހުން ވަދެފައިވެއެވެ.
ޕަލްމެއިރާސްވަނީ ބްރެޒިލްގެ ޕައުލިސްޓާ ޗެމްޕިއަންޝިޕްވެސް މިދިޔަ އަހަރުގެ އޮގަސްޓްމަހު ކާމިޔާބުކޮށްފައެވެ. އަދި ކޮޕާ ދޮ ބްރެޒިލްގެ ފައިނަލްގައި މިއަންނަ މަހު ގްރެމިއޯއާ ދެކޮޅަށްވެސް ޕަލްމެއިރާސް ކުޅުމަށްވަނީ ހަމަޖެހިފައެވެ.