ތިން ރަށެއްގެ ހޮސްޕިޓަލުގައި ބެކަޕް ޖަނެރޭޓަރު ބެހެއްޓުމުގެ މަސައްކަތް ފަށައިފިއެވެ.
މިނިސްޓްރީ އޮފް ހެލްތުން މިމަޝްރޫޢު ހަވާލުކޮށްފައިވަނީ ފެނަކަ ކޯޕަރޭޝަނާއެވެ. މިމަޝްރޫޢުގެ ދަށުން ބެކަޕް ޖަނެރޭޓަރު ބެހެއްޓުމަށް ހަމަޖެހިފައިވަނީ ގދ.ތިނަދޫ ޑރ.އަބްދުއްސަމަދު މެމޯރިއަލް ހޮސްޕިޓަލާއި ރ.އުނގޫފާރު ރީޖަނަލް ހޮސްޕިޓަލާއި ހދ.ކުޅުދުއްފުށި ރީޖަނަލް ހޮސްޕިޓަލުގައެވެ. ހެލްތު މިނިސްޓްރީން މިމަޝްރޫޢު ފެނަކައާއި ޙަވާލުކުރުމަށް ބޭއްވި ރަސްމިއްޔާތުގައި ހެލްތު މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯރ ހެލްތު އަޙްމަދު އާދިލްއެވެ. ފެނަކަ ކޯޕަރޭޝަނުގެ ފަރާތުން ސޮއިކުރެއްވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަޙްމަދު ސަޢީދެވެ. މި ރަސްމިއްޔާތުގައި ޙެލްތު މިނިސްޓަރވެސް ބައިވެރިވެވަޑައިގެންނެވިއެވެ.
އަތޮޅުތެރޭގެ ހޮސްޕިޓަލްތަކަށް މެދުކެނޑުމެއްނެތި ކަރަންޓު ފޯރުކޮއްދިނުމަށް @MoHmv އާއި މިކުންފުންޔާ ގުޅިގެން ކުރެވޭ މަސައްކަތުގެތެރެއިން, އިތުރު 03 ހޮސްޕިޓަލެއްގައި ބެކްއަޕް ޖެނެރޭޓަރ ސިސްޓަމް ގާއިމް ކުރުމުގެ އެއްބަސްވުމެއްގައި މިއަދު ވަނީ ސޮއި ކުރެވިފަ.(1/2) pic.twitter.com/OQyL6Z2nde
— Fenaka Corporation Ltd (@TeamFenaka) January 28, 2021
ރާއްޖޭގެ ސިއްޙީ ނިޒާމު ހަރުދަނާކުރުމަށް ކުރަމުންދާ މަސައްކަތުގެ ދަށުން ހޮސްޕިޓަލްތަކަށް ކަރަންޓު މެދުކެނޑުމެއްނެތި ފޯރުކޮށްދިނުމަށް އަތޮޅުތަކުގެ ހޮސްޕިޓަލްތަކުގައި ބެކަޕް ޖަނެރޭޓަރު ޤާއިމުކުރުމުގެ މައްސަކަތް ސަރުކާރުން އަންނަނީ ކުރައްވަމުންނެވެ. މީގެ އިތުރުންވެސް އަތޮޅުތަކުގެ ސިއްޙީ ނިޒާމު ތަރައްޤީކުރުމަށް ޢުމްރާނީގޮތުންވެސް މަސައްކަތްތަކެއް އަންނަނީ ކުރަމުންނެވެ. އެގޮތުން ހޮސްޕިޓަލްތަކުގެ އާ ޢިމާރާތް އެޅުމާއި ވަޞީލަތް ހަމަކުރުމުގެ މަސައްކަތް އަންނަނީ ކުރަމުންނެވެ. އަދި ރާއްޖޭގެ 5 ސަރަޙައްދެއްގައި ޓަރޝިއަރީ ފެންވަރުގެ ހޮސްޕިޓަލް ތަރައްޤީކުރުމަށް ސަރުކާރުން ފައްޓަވާފައިވާ މަޝްރޫޢުގެ މަސައްކަތްވެސް ދަނީ ކުރަމުންނެވެ.