ރާއްޖެއަށް ތަރުކާރީއާއި މޭވާ އެތެރެކުރާ ބޭރު ކުންފުނިތަކަށް ފައިސާ ނުދައްކާ ފަރާތްތައް ހޯދަނީ
މަކަރާއި ހީލަތުން ރާއްޖެއަށް ތަރުކާރީއާ މޭވާ އެތެރެކޮށް، ބޭރު ކުންފުނިތަކަށް ފައިސާ ނުދައްކާ މައްސަލައެއް ފުލުހުން ބަލަން ފަށައިފިއެވެ. ފުލުހުން ވިދާޅުވީ މި މައްސަލަ ފުލުހަށް ހުށައެޅުމާ ގުޅިގެން، މިފަދަ ކަންކަން ކުރަމުންދާ ފަރާތްތައް ހޯދުމަށް މޯލްޑިވްސް ޕޮލިސް ސަރވިސްގެ އިކޮނޮމިކް ކްރައިމް ޑިޕާރޓްމަންޓާއި އިންޓެލިޖެންސް ގުޅިގެން ޚާއްސަ މަސައްކަތްތަކެއް ކުރަން ފަށާފައިވާ ކަމަށެވެ.
މިކަމާގުޅިގެން މިމަހުގެ 16 ވަނަ ދުވަހު ފުލުހުން ހިންގި އޮޕަރޭޝަނެއްގައިވަނީ، މާލޭގެ ދެ ގެއަކާއި ތިން އެޕާޓްމަންޓަކާއި އޮފީހެއް ބަލައިފާސްކޮށްފައެވެ. އަދި މި ތަންތަނުން، ފުލުހުންނަށް ހުށަހެޅިފައިވާ މައްސަލަތަކާ ގުޅުންހުރި ގިނަ ހެކިތަކެއް ހޯދާފައިވާ ކަމަށް ފުލުހުން ވިދާޅުވެއެވެ.
އިކޮނޮމިކް ކްރައިމް ޑިޕާޓްމަންޓުން މައުލޫމާތުދެއްވި ގޮތުގައި މަކަރާއި ހީލަތުން ރާއްޖެއަށް ތަރުކާރީއާއި މޭވާ ތަކުރާރުކޮށް އެތެރެކޮށް، ރާއްޖެއިން ބޭރުގެ ކުންފުނިތަކަށް ދައްކަންޖެހޭ ފައިސާ ނުދައްކާ 10 މައްސަލައެއް ފާއިތުވި އަހަރު ހުށައަޅާފައިވެއެވެ އަދި މިމަހު މިފަދަ އެއް މައްސަލަ ހުށައަޅާފައިވެއެވެ.
އަދި މިގޮތަށް އެތެރެކުރާ ތަރުކާރީއާއި މޭވާ ރާއްޖޭގެ ބާޒާރުގެ އަގަށްވުރެ އާދަޔާ ޚިލާފަށް ހެޔޮއަގުގައި ވިއްކަމުންދާކަން ތަހްގީގަށް ފާހަގަކުރެވިފައިވާކަމަށްވެސް ފުލުހުން ވިދާޅުވެއެވެ.
މީގެ ސަބަބުން ދިވެހި ވިޔަފާރިވެރިންނާއި ޤައުމުގެ އިޤްތިޞާދަށް އޭގެ ނޭދެވޭ އަސަރުކުރާނެތީ، ވިޔަފާރި ކުރާ ފަރާތްތަކުން މިކަމަށް ސަމާލްވުމަށް ފުލުހުންވަނީ އިލްތިމާސްކުރައްވާފައެވެ. އަދި މިގޮތަށް ވިޔަފާރި ހިންގާ މީހުންގެ އަތުން ނުއަގުގައި މުދާ ނުގަތުމަށާއި، މިކަމަށް ހިތްވަރު ނުދިނުމަށްވެސް ފުލުހުންވަނީ އެދިވަޑައިގެންފައެވެ. އަދި މިފަދަ ޢަމަލެއް ފާހަގަކުރެވިއްޖެނަމަ ވީހާވެސް އަހަށް ފުލުހުންނާ އެ މަޢުލޫމާތު ޙިއްސާކުރެއްވުމަށްވެސްވަނީ އެދިވަޑައިގެންފައެވެ.
މަދުބަޔަކު ކުރާ މިފަދަ ޢަމަލުތަކުގެ ސަބަބުން ބޭރުގެ ވިޔަފާރިވެރިންގެ އިތުބާރު ގެއްލި، މިކަމުގެ ގޮންޖެހުން ރާއްޖެއަށް ކުރިމަތިވެދާނެތީ އެކަމަށް ހުރިހާ ފަރާތްތަކުން ސަމާލްވުމަށް ފުލުހުންވަނީ އިލްތިމާސްކުރައްވާފައެވެ.
ޙާޖީ
އިންޑިޔާ މީހުން ބުނެގެން ދިވެހި ފަސްގަނޑުގައި ތިބި ދިވެ ހިން ހިފާ ހައްޔަރުކުރަނީ