އެމެރިކާގައި ކޯވިޑް-19 ޖެހުނު މީހުންގެ އަދަދު 25 މިލިއަނަށް އަރައިފިއެވެ.
އެންމެ ހަލުވިކޮށް ކޯވިޑް-19 ފެތުރޭ ޤައުމުގެ ގޮތުގައި އޮތް އެމެރިކާގައި ބަލި ޖެހުނު މީހުންގެ ޢަދަދު 25 މިލިއަނަށް އިތުރުވުމަށް ނަގާފައިވަނީ އަހަރެއްހާ ދުވަހެވެ. އެއީ ދުވާލެއްގެ މައްޗަށް ގާތްގަނޑަކަށް 67،934 އިންފެކްޝަނެކެވެ. ނުވަތަ 2020ވަނަ އަހަރުގެ ޖަނަވަރީ މަހުގެ 21ވަނަ ދުވަހުން ފެށިގެން ކޮންމެ 1.2 ސިކުންތަކު އެއް އިންފެންޝަނެކެވެ.
ފާއިތުވި ހަފުތާ ބަންދުގެ ތެރޭގައި އެމެރިކާގައި ކޯވިޑް-19 ފެތުރޭ މިންވަރުގެ އިތުރުން ބަލީގައި މަރުވާ މީހުންގެ އަދަދުވެސްވަނީ އިތުރުވެފައެވެ. ކޯވިޑް-19 ޖެހިގެން އެމެރިކާގައި މިހާތަނަށް 429،490 މީހުން މަރުވެފައިވާއިރު އެ ޤައުމު އޮތީ ބަލީގެ ސަބަބުން އެންމެ ގިނަ އަދަދެއްގެ މީހުން މަރުވެފައިވާ ޤައުމުގެ ގޮތުގައެވެ. މި އަހަރުގެ މެއި މަހާއި ހަމައަށް ދާންވާއިރަށް ކޯވިޑް-19 ޖެހިގެން އެމެރިކާގައި މަރުވާ މީހުންގެ ޢަދަދު 569،000އަށް އިތުރުވާނެކަމަށް އެމެރިކާގެ ޔުނިވަސިޓީ އޮފް ވޮޝިންޓަނުންވަނީ އަންދާޒާކޮށްފައެވެ. އެއީ ބައްޔާއި ދެކޮޅަށް ވެކްސިން ދިނުމުން ސަލާމަތްވާނެކަމަށް ބެލެވޭ 42،800 ފުރާނަ ނުހިމަނައެވެ.
އެމެރިކާގެ ބައެއް ސްޓޭޓުތަކުގައި ދުވާލެއްގެ މައްޗަށް ކޯވިޑް-19 ޖެހޭ މީހުންގެ އަދަދު ކޮންމެވެސް ވަރަކަށް ދަށަށްގޮސްފައިވާ ނަމަވެސް ބަލިޖައްސާ ވައިރަހުގެ އައު ވައްތަރުތައް ދައުރުވަމުންދާތީ ސައިންސުވެރިންވަނީ އެކަމާއިމެދު ކަންބޮޑުވުން ފައުޅުކޮށްފައެވެ.
ބްރައުން ޔުނިވަސިޓީ ސްކޫލް އޮފް ޕަބްލިކް ހެލްތުގެ ޑީން، ޑރ. އައިޝާ ޖާ ވިދާޅުވީ ބަލިޖެހޭ މީހުންގެ ޢަދަދު ކޮންމެވެސް ވަރަކަށް ދަށަށްދާން ފަށައިފައިވުމަކީ ރަނގަޅު ފާލެއްކަމަށެވެ. ނަމަވެސް ބަލިޖެހޭ މީހުންގެ ޢަދަދު އަދިވެސް ވަރަށް މަތިކަމަށް އޭނާ ފާހަގަކުރެއްވިއެވެ. ބަލި ފެތުރޭ މިންވަރު އިތުރުވިޔަ ނުދީ ހިފެހެއްޓޭނަކަމާއިމެދު ސުވާލު އުފެދިފައިވާކަމަށާއި، ވެކްސިން ދިނުމުގެ މަސައްކަތް ހަލުވި ދުވެއްޔެއްގައި ކުރިއަށް ގެންދެވިއްޖެނަމަ ބަލި ފެތުރޭ މިންވަރު ދަށްކުރެވޭނެކަމަށް އޭނާ ވިދާޅިވިއެވެ. ނަމަވެސް އެއަށްވުރެ ކުރިން ވައިރަހުގެ އައު ވައްތަރުތައް ގަދަޔަށް ފެތުރެން ފަށައިފިނަމަ ބަލިޖެހޭ މީހުންގެ އަދަދު އަނެއްކާވެސް އިތުރުވެ ޤައުމުގެ ޙާލަތު އިތުރަށް ގޯސްވާނެކަމަށް އޭނާ ވިދާޅުވިއެވެ. އެހެންކަމުން މިޙާލަތަކީ ވައިރަހުގެ އައު ވައްތަރުތަކާއި ވެކްސިނާއި ދެމެދު އޮތް ރޭހެއްގެ ގޮތުގައި އޭނާ ސިފަކުރެއްވިއެވެ.
އިނގިރޭސިވިލާތުން ފެނިފައިވާ ވައިރަހުގެ އައު ވައްތަރެއްކަމަށްވާ ބީ އެކެއް ޕޮއިންޓު އެކެއް ޕޮއިންޓު ހަތެއް ވައިރަހަކީ އެ ވައިރަހަކާއިމެދު ސައިންސުވެރިން ވަރަށް ކަންބޮޑުވާ ވައިރަހުގެ ބާވަތެކެވެ. އެ ވައްތަރު މިހާރުވަނީ އެމެރިކާގެ 22 ސްޓޭޓަކުން ފެނިފައެވެ. އެމެރިކާގެ ސީޑީސީއިންވަނީ އެ ވައިރަހުގެ ވާރުތަވުމުގެ ބާރު މާ ގަދަކަމަށާއި 2021ވަނަ އަހަރުގެ ކުރީ ކޮޅުގައި ވައިރަހުގެ އައު ވައްތަރު ފެތުރޭ މިންވަރު ވަރަށް ބޮޑަށް އިތުރުވާނެކަމުގެ އިންޒާރު ދީފައެވެ. ވައިރަހުގެ އައު ވައްތަރު ފުރަތަމަ ފެނުނު އިނގިރޭސިވިލާތުންވެސްވަނީ އެ ވައިރަހުގެ ސަބަބުން ފުރާނައަށް ނުރައްކާވާ މިންވަރު އިތުރުވުމުގެ ފުރުޞަތެއް އޮތްކަމަށް ބެލެވޭކަމަށް ބުނެފައެވެ.
އެމެރިކާގެ ނޭޝަނަލް އިންސްޓިޓިއުޓް އޮފް އެލާޖީ އެންޑް އިންފެކްޝަސް ޑިޒީސް، ޑރ. އެންތޮނީ ފައުޗީވެސްވަނީ އެ ވައިރަހުގެ ސަބަބުން ފުރާނައަށް ނުރައްކާވާ މިންވަރު އިތުރުވެދާނެކަމަށް ދެކުމަކީ ހިކުމަތްތެރި ފިޔަވަޅަކަށް ވާނެކަމަށް ވިދާޅުވެފައެވެ.