އަންހެނުންނަށް ބާރުވެރިކަން ލިބުނު ހުކުމާއެކު، ބަންޑާރަ ނާއިބު އިބްރާހީމް ރިފްޢަތު އެމައްސަލާގައި ވަކާލާތުކުރި ވަކީލުންނަށް ޝުކުރު އަދާކުރައްވައިފިއެވެ. ލޯކަލް ކައުންސިލްތަކުން އަންހެނުންނަށް ގޮނޑި ޚާއްސަކޮށް، ލާމަރުކަޒީ ޤާނޫނަށް ގެނައި އިސްލާހަކީ ޤާނޫނު އަސާސީއާއި ޚިލާފު ނިންމުމެއް ނޫންކަމަށް ހައިކޯޓުން އިއްޔެ ވަނީ ހުކުމް ކުރައްވާފައެވެ.
ލޯކަލް ކައުންސިލްތަކުގެ 33 އިންސައްތަ އަންހެނުންނަށް ޚާއްސަކޮށް ލާމަރުކަޒީ ޤާނޫނު މަޖިލީހުން ފާސްކުރީ 2019 ވަނައަހަރުގެ ޑިސެމްބަރުމަހުގެ 15 ވަނަދުވަހުއެވެ. މި ނިންމުމާއި ދެކޮޅަށް މި އިސްލާހު ބާޠިލުކުރުމަށް ހައިކޯޓަށް ހުށައެޅީ މޫސާ އަންވަރުއެވެ. މި މައްސަލައިގައި މޫސާ އަންވަރު ބުނެފައިވަނީ ޤާނުނު އަސާސީން ކޮންމެ މީހަކަށްވެސް ލިބިދީފައިވާ ފުރުޞަތެއް ޤާނޫނު އަސާސީ އިސްލާހުނުކޮށް އެ ޙައްޤު ނިގުޅައިނުގަނެވޭނެކަމަށެވެ.
މި މައްސަލާގައި ވަަކާލާތުކުރައްވަމުން ދައުލަތުގެ ބަންޑާރަ ނައިބުގެ އޮފީހުން ވިދާޅުވީ އަންހެނުންނަށް ގޮނޑި ޚާއްސަކުރުމުން އެއްވެސް ބައެއްގެ އަސާސީ ޙައްޤެއް ހަނިނުވާކަމަށެވެ. އަދި މި ބަދަލު ގެނެސްފައިވަނީ ޑިމޮކްރެޓިކް ޤައުމުތަކުގައި އަމަލުކުރަމުން އަންނަ އުސޫލްތަކުގެ މައްޗަށް ބަލައިގެން ކަމަށްވެސް ބަންޑާރަ ނައިބުގެ އޮފީހުން ވަނީ ވިދާޅުވެފައެވެ.
މި މައްސަލަ ނިންމައި ހައިކޯޓުން އިއްވި ޙުކުމުގައި ބުނެފައިވަނީ ޤާނޫނު އަސާސީގެ މާއްދާތަކުން ތަފާތުކުރުން ފެންނަން އެބަހުރިކަމަށެވެ. އެގޮތުން ވަކިކަންކަމުގައި އުމުރުތައް ކަނޑައަޅާފައި ހުރުމުން ޤާނުނު އަސާސީގައި ދެވަނަ ބާބުގައި ހުރިކަންކަމަކީ މުތުލަގުކޮށް ދީފައިވާ ޙައްޤުތަކެއް ނޫންކަން އެނގޭކަމަށެވެ. އަންހެނުންނަށް ވަކި ގޮނޑިތަކެއް ކަނޑައެޅުމަކީ ޖިންސުގެ ތަފާތުކުރުންތަކެއް ނަމަވެސް އެ ނިންމުމަކީ ޤާނޫނު އަސާސީއާއި ޚިލާފު ނިންމުމަކަށް ނުވާނެކަމަށެވެ.
ހައިކޯޓުގެ މިހުކުމާއި ގުޅިގެން ބަންޑާރަ ނާއިބު ވަނީ އެ އޮފީހުގެ ފަރާތުން ކޯޓުގައި ވަކާލާތުކުރެއްވި ވަކީލުންނަށް ޝުކުރު އަދާކުރައްވާފައެވެ. ބަންޑާރަ ނާއިބް ވިދާޅުވީ މުޖުތަމަޢުގެ އާދަކާދައާއި ވިސްނުން ޒަމާނާއި ޙާލަތާ އެއްގޮތަށް ބަދަލުކުރުމަށްޓަކައި ޤާނޫނަކީ ހަމައެކަނި ވަޞީލަތެއް ކަމަށެވެ. އެހެންކަމުން މިންތީގެ ހަމަހަމަކަން ކަށަވަރުކުރުމަށް ވިސްނުން ބަދަލުކުރަންޖެހޭ ކަމަށެވެ.
ލާމަރުކަޒީ ޤާނޫނުން އަންހެނުންނަށް ގޮނޑި ޚާއްޞަކުރިކުރުން ޤާނޫނީ ގޮތުން ރަނގަޅުކަމަށް @mvhighcourt ނިންމެވި މައްސަލައިގައި @AGOmv ގެ ފަރާތުން މަސައްކަތްކުރެއްވި @FathimathKudy @SanaHawwa @ahmadnashath @hammay02 އަދި @shinan92 ގެ މަސައްކަތަށް ތަޢުރީފާއި ޝުކުރު ޙައްޤު. https://t.co/eUSDPOpDO0
— I Riffath (@ibriffath) January 25, 2021
މި މައްސަލަ ބެއްލެވީ ހައިކޯޓްގެ ފަސް ފަނޑިޔާރުންގެ ބެންޗަކުންނެވެ. މޫސާ އަންވަރު މި މައްސަލަ ފުރަތަމަ ހުށައެޅީ ސުޕްރީމްކޯޓަށެވެ. އެހެންނަމަވެސް މި މައްސަލަ ބަލަންޖެހޭ ފުރަތަމަ މަރުހަލާއަކީ ހައިކޯޓުކަމުން އެކޯޓުން ވަނީ މި މައްސަލަ ބަލައިނުގަންނަން ނިންމާފައެވެ. ނަމަވެސް މިމައްސަލާގައި އިއްޔެ ހައިކޯޓުން ކުރި ހުކުމާއި ގުޅިގެން މިމައްސަލަ ސުޕްރީމް ކޯޓަށް ހުށައަޅާނެކަމަށް މޫސާ އަންވަރު ވަނީ ބުނެފައެވެ.