ފޮރިން ސަރވިސް އިންސްޓިޓިއުޓް އޮފް މޯލްޑިވްސް (ފޮސިމް)ގެ ގަވަރނިންގ ބޯޑްގެ މެމްބަރުންގެ މެދުގައި މިންތީގެ ހަމަހަމަކަން ޤާއިމްކޮށްފިއެވެ.
ރާއްޖެއިން ބޭރުގައި ޤާއިމްކޮށްފައިވާ ދިވެހިރާއްޖޭގެ ޑިޕްލޮމެޓިކް މިޝަންތަކުގެ ވެރިންގެ މެދުގައި މިންތީގެ ހަމަހަމަކަން ޤާއިމްކުރުމަށްފަހު، ފޮރިން މިނިސްޓްރީގެ ދަށުން ހިންގާ ފޮރިން ސަރވިސް އިންސްޓިޓިއުޓް އޮފް މޯލްޑިވްސް (ފޮސިމް)ގެ ގަވަރނިންގ ބޯޑްގެ މެމްބަރުންގެ މެދުގައިވެސް މިންތީގެ ހަމަހަމަކަން ގާއިމްކޮށްފައިވަނީ އިއްޔެ ބޭއްވި ފޮސިމްގެ ގަވަރނިންގ ބޯޑްގެ 4ވަނަ ބައްދަލުވުމުގައެވެ.
އެއިންސްޓިޓިއުޓް އުފެދުނުފަހުން އަންހެން / ފިރިހެން 2 ޖިންސްގެ ޢަދަދުތައް ހަމަހަމަކޮށް ބޯޑުގެ މެމްބަރުން ތިބި ފުރަތަމަ ބައްދަލުވުމެވެ. ފޮރިން މިނިސްޓަރ ޢަބްދުﷲ ޝާހިދު ވިދާޅުވީ އަމާޒަކީ ފޮސިމް އިތުރަށް ހަރުދަނާކުރުންކަމަށާއި، އެކަމަކީ ނަތީޖާ ނެރޭ ފޮރިން ސަރވިސްއެއް އުފެއްދުމަށް މުހިއްމު ކަމެއްކަމަށެވެ.
ޚާރިޖިއްޔާގައި މިންތީގެ ހަމަހަމަކަން ޤާއިމްކުރުމަކީ ރައީސް އިބްރާހީމް މުޙައްމަދު ސާލިޙާއި ފޮރިން މިނިސްޓަރ ޢަބްދުﷲ ޝާހިދު ޚާއްސަ އިސްކަމެއް ދެއްވައިގެން ކުރައްވަމުން ގެންދަވާ މަސައްކަތެއްކަމަށް ފޮރިން މިނިސްޓްރީން ބުނެއެވެ. ފޮރިން މިނިސްޓްރީން މީގެ ކުރިންވެސް ވަނީ ބޭރުގެ ޤައުމުތަކަށް ރާއްޖެއިން ކަނޑައަޅާ ސަފީިރުންގެ ގޮތުގައި ފިރެހެނުންނާއި އެއް ޢަދަދަކަށް އަންހެން ބޭފުޅުން ކަނޑައަޅުއްވާ، ބޭރުގައި ތިއްބަވާ ދިވެހި ސަފީރުންގެ ތެރޭގައި މިންތީގެ ހަމަހަމަކަން ޤާއިމްކޮށްފައެވެ.