ސްޕެނިޝް ސުޕަރ ކަޕްގެ ޗެމްޕިއަން ރެއާލް މެޑްރިޑް ބަލިކުރުމަށްފަހު އެމުބާރާތުގެ ފައިނަލުގެ ފަހު ޖާގަ އެތުލެޓިކް ބިލްބާއޯ ހޯދައިފިއެވެ. މި މުބާރާތުގެ ފައިނަލުން ބިލްބާއޯ ޖާގަހޯދީ ރޭ ކުޅުނު ސެމީފައިނަލް މެޗް 2 ލަނޑު އެއް ލަނޑުން ކާމިޔާބުކޮށްގެންނެވެ.
ރެއާލްގެ ދަނޑުގައި ކުޅުނު މިމެޗްގެ ފުރަތަމަ ލަނޑު މެޗްގެ 18 ވަނަ މިނެޓަގައި ޖަހާދިނީ ބިލްބާއޯގެ ތަޖުރިބާ ކާރު ފޯވަޑް ރައުލް ގާސިއާއެވެ. އަދި އެޓީމްގެ ދެވަނަ ލަނޑު ފުރަތަމަ ހާފް ނިމެން 7 މިނެޓަށް ވެފައިވަނިކޮށް ލިބުނު ޕެނަލްޓީ އަކުން ކާމިޔާބުކޮށްދިނީވެސް ގާސިއާއެވެ. މިއީ ރެއާލްެގެ ޕެނަލްޓީ އޭރިޔާ ތެރެއިން ބިލްބާއޯގެ އިނީގޯ މާޓިނޭޒްއަށް ރެއާލްގެ ލޫކަސް ވަޒްކުއޭޒް ފައުލް ކުރުމުން ލިބުނު ޕެނަލްޓީއެކެވެ. މިމެޗްގައި ރެއާލްއިން ޖެހި ހަމައެކަނި ލަނޑު މެޗް ނިމެން 17 މިނެޓަށް ވެފައިވަނިކޮށް ޖަހާދިނީ އެޓީމްގެ ތަޖްރިބާކާރު ފޯވަޑް ކަރިމް ބެންޒީމާއެވެ. އޮފްސައިޑް ލަނޑެއް ކަމަށް އެންމެ ފުރަތަމަ ދެއްކި މިލަނޑު ފަހުން ގަބޫލް ކޮށްފައިވަނީ ވީ.އޭ.އާރު. ރެފްރީ ބެލުމަށްފަހުއެވެ. އަދި އޭގެ އިރުކޮޅެއް ފަހުން ބެންޒީމާ އިތުރު ލަނޑެއްވެސް ޖެހިއެވެ. ނަމަވެސް އެލަނޑު ވަނީ އޮފްސައިޑް ލަނޑެއް ކަމަށް ނިންމާފައެވެ. މިމެޗްގައި މީގެއިތުރުންވެސް ދެޓީމަށް ލަނޑު ޖަހާނެ ރަގަޅު ފުރުސަތު ލިބިފައިވެއެވެ. ނަމަވެސް މިއިން އެއްވެސް ހަމަލާއެއް ކާމިޔާބުވާ ގޮތެއް ދެޓީމުންކުރެ އެއްވެސް ޓީމަކަށް ނުވިއެވެ.
މިކާމިޔާބީއާއެކު މިސީޒަންގެ ފުރަތަމަ ފައިނަލުން ބިލްބާއޯއަށް މިވަނީ ޖާގަލިބިފައެވެ. ސްޕެނިޝް ސުޕަރ ކަޕްގެ ފައިނަލްގައި އެޓީމް ބައްދަލުކުރާނީ ސެމީ ފައިނަލްގެ ފުރަތަމަ މެޗް ކާމިޔާބުކުރި އެފްސީ ބާސެލޯނާއާއެވެ. ބާރސާ އެމެޗް ކާމިޔާބުކުރީ ރެއާލް ސޮސިއެޑާޑްއާ ބައްދަލުކޮށް ޕެނަލްޓީ ޖަހައިގެންނެވެ. މި މުބާރާތުގެ ފައިނަލް މެޗް ކުޅުމަށް ހަމަޖެހިފައިވަނީ މިއަންނަ އާދީއްތަ ދުވަހުގެ ރޭ ސެވިއްޔާގައެވެ.