ފުވައްމުލަކުގައި މޫދަށް އެރިއުޅެނިކޮށް ނިޔާވި ފައުޒާން ވަކިވެގެންދިޔައީ އޭނާގެ ޤުރުބާނީން ޤައުމު ރޮއްވާލާފައިކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ފުވައްމުލަކުގައި ގެނބެމުންދިޔަ ދެކުދިން ސަލާމަތްކުރުމުގެ ތެރޭގައި ފައުޒާން ނިޔާވުމާ ގުޅިގެން ރައީސުލްޖުމްހޫރިއްޔާ ވިދާޅުވީ ފައުޒާން ވަކިވީ ހިތްވަރުގަދަކަމުގެ ލާމަސީލު ނަމޫނާ ދައްކުވައިދީފައިކަމަށެވެ. ރައީސުލްޖުމްހޫރިއްޔާ ކުރެއްވި ޓުވިޓެއްގައިވަނީ ފައުޒާންގެ ފުރާނައަށް ސުވަރުގޭގެ ނިޢުމަތް މިންވަރުކޮށްދެއްވުން އެދި ހެޔޮ ދުޢާކުރައްވާފައެވެ.
އަޙްމަދު ފައުޒާން އަޅުގަނޑުމެންނާ ވަކިވެގެން އެ ދިޔައީ ހިތްވަރުގަދަކަމުގެ ލާމަސީލު ނަމޫނާ ދައްކުވައިދީފައި. އޭނާގެ އެ ޤުރުބާނީން ޤައުމު ރޮއްވައިލާފައި.
— Ibrahim Mohamed Solih (@ibusolih) January 10, 2021
އަޅުގަނޑުގެ ދުޢާއަކީ ފައުޒާނަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން.
إِنَّا لِلَّهِ وَإِنَّا إِلَيْهِ رَاجِعُونَ
ފައުޒާން ނިޔާވުމާ ގުޅިގެން ރައީސުލްޖުމްހޫރިއްޔާގެ ނައިބު ފައިސަލް ނަސީމުވެސްވަނީ ފައުޒާންގެ ހިތްވަރު ފާހަގަކުރައްވާފައެވެ. ނައިބު ރައީސް ވިދާޅުވީ ފައުޒާން އެންމެ ފަހު ވަގުތުވެސް ދައްކުވައިދިނީ ތިމާއަށް ވުރެ އަނެކާގެ ކަންކަން އިސްކޮށް އަނެކުން ސަލާމަތްކުރުމުގެ މުހިއްމުކަމާއި އެކަމުގެ ވަރުގަދަ ހިތްވަރެއް ކަމަށްވެސް ނައިބު ރައީސްވަނީ ވިދާޅުވެފައެވެ.
ފުވައްމުލަކު ސްކޫލްގެ ދަރިވަރު އަޙްމަދު ފައުޒާން އެންމެފަހު ވަގުތުވެސް ދައްކުވައިދިނީ، ތިމާގެ އަމިއްލަ ނަފުސަށް ވުރެ އެނެކާ ސަލާމަތް ކުރުމުގެ ވަރުގަދަ ހިތްވަރު! މަރްޙޫމަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށި ! امين https://t.co/G1JyTEUHx9
— Faisal Naseem (@FaisalNasym) January 10, 2021
ފައުޒާން އެންމެ ފަހު ވަގުތުވެސް ދެއްކި ހިތްވަރު އެޑިއުކޭޝަން މިނިސްޓަރާއި ސްކައުޓު އެސޯސިއޭޝަނުންވެސްވަނީ ފާހަގަކޮށްފައެވެ.
ފައުޒާން ނިޔާވުމާއި ގުޅިގެން ފޮރިން މިނިސްޓަރ ޢަބްދުﷲ ޝާހިދު ކުރެއްވި ޓުވީޓެއްގައި ވިދާޅުވެފައިވަނީ "މުޅި ފުއައްމުލައް ފަޚުރުވެރިވާ ދަރިއެއް ކަމުގައިވި ފައުޒާން ދުނިޔެދޫކޮށް އެދިޔައީ މުޅިއިންސާނިއްޔަތަށް ހިތްވަރާއި އޯގާތެރިކަމާއި ކުލުނުގެ ފުރިހަމަ ނަމޫނާއެއް ދައްކައިދީފައި" ކަމަށެވެ.
ފުވައްމުލަކު ސްކޫލްގެ ސްކައުޓް ގްރޫޕުގައި ޕެޓްރޯލް ލީޑަރެއްގެ މަޤާމު އަދާކުރަމުންދިޔަ ފައުޒާން ނިޔާވީ ފުވައްމުލަކުގައި މޫދަށް އެރިގެން އުޅެނިކޮށް ގެނބެމުންދިޔަ 2 އަންހެން ކުދިން ސަލާމަތްކުރުމުގެ ތެރޭގައެވެ. ފައުޒާން ނިޔާވީ އޭނާ ގެއްލިގެން ހޯދަމުން ދަނިކޮށް ފެނުމާ ގުޅިގެން ފުވައްމުލަކު ހޮސްޕިޓަލަށް ގެންގޮސް ކުއްލި ފަރުވާ ދެމުންދަނިކޮށެވެ. އޭނާ ގެއްލިގެން ފުލުހުންނަށް ރިޕޯޓުކޮށްފައިވަނީ ހޮނިހިރު ދުވަހުގެ ހަވީރު 16:47 ހާއިރުކަމަށާއި އޭނާ ފެނިފައިވަނީ ހޯދަމުންދަނިކޮށް 17:50 ހާއިރުކަމަށް ފުލުހުން ވިދާޅުވެއެވެ.
ފައުޒާން ނިޔާވުމާ ގުޅިގެން ސަރުކާރުގެ އިސްވެރިންނާއި އާއްމުން އަންނަނީ ހިތާމައިގެ ޝުއޫރު ފާޅުކޮށް އޭނާގެ ހިތްވަރާއި ޤުރުބާނީ ފާހަގަކުރަމުންނެވެ.