ލޯކަލް ކައުންސިލްތަކުގެ އިންތިޚާބު ވީހާވެސް އަވަހަކަށް ބޭއްވުން މުހިއްމުކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. ރައީސް ނަޝީދު މިހެން ވިދާޅުވެފައި މިވަނީ ލޯކަލް ކައުންސިލް އިންތިޚާބުގެ ޚާއްސަ ޤާނޫނުގައި ބުނެފައިވާ މުއްދަތުގައި އެއިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ނުބޭއްވޭނެކަން ޔަގީންވެ އެކަމާއި އިލެކްޝަންސް ކޮމިޝަނުން ކަންބޮޑުވުން ފާޅުކޮށްފައިވަނިކޮށެވެ.
އިލްކެޝަންސް ކޮމިޝަންގެ ރައީސް އަހްމަދު ޝަރީފު ރޭ ވިދާޅުވީ ކޯވިޑްގެ ބަލިމަޑުކަމުގެ ތެރޭގައި އެހެން ޤައުމުތަކުގައި އިންތިޚާބުތައް ބޭއްވި ގޮތަށް ރާއްޖޭގައި އިންތިޚާބުތައް ނުބޭއްވި ލަސްވަނީ އެކޮމިޝަނަށް އޮންނަ ބާރު އެހެން ބަޔަކަށް ދީފައި އޮތުމުންކަމަށެވެ.
ކޮވިޑްގެ ހާލަތާއި ގުޅިގެން ލޯކަލް ކައުންސިލްތަކުގެ އިންތިޚާބު ފަސްކުރަން ޖެހުމުން އެކަމަށް އެކުލަވާލި ހާއްސަ ޤާނުނުގައި ބުނެފައިވަނީ އިންތިޚާބާއި ގުޅޭ ކަންކަން އިލެކްޝަންސް ކޮމިޝަނުން ކުރިޔަށް ގެންދެވޭނީ ކޯވިޑްގެ ހާލަތާއި ގުޅިގެން އިއުލާންކޮށްފައިވާ ކުއްލި ނުރައްކަލުގެ ހާލަތު އުވާލުމުންނެވެ. އަދި އެ ޤާނޫނު ބުނާގޮތުން އިންތިޚާބު ބޭއްވުމަކީ އާއްމު ސިއްހަތަށް ނުރައްކަލެއް ނުވާނެކަމަށް އެޗްޕީއޭއިން އިއުލާންކުރަންޖެހޭކަމަށްވެސް މި ޤާނުނުގައި ބުނެފައިވެއެވެ.
އިއްޔެ ނިޔަލަށް ހަމަވި ކުއްލި ނުރައްކަލުގެ ހާލަތު އަންނަ މަހުގެ 3 ވަނަދުވަހުގެ ނިޔަލަށް އިތުރުކުރުމުން ލޯކަލް ކައުންސިލް އިންތިހާބު ބޭއްވުމަށް ޤާނުނުގައި ކަނޑައަޅާފައިވާ ތާރީހުގައި ނުބޭއްވޭނެކަން މި ވަނީ ޔަޤީންވެފައެވެ.
މިކަމާއި ގުޅިގެން ރޭ ރައްޔިތުން މަޖިލީހުގައި ރައީސް ކުރީގެ ރައީސް މުހައްމަދު ނަޝީދު ކުރެއްވި ޓްވީޓެއްގައި ވިދާޅުވީ ލޯކަލް ކައުންސިލް އިންތިޚާބު ވީހާވެސް އަވަހަށް ބޭއްވުން ވަރަށް މުހިއްމުކަމަށެވެ. އަދި އެކަން ކުރުމަށް ޤާނޫނަށް ބަދަލު ގެންނަން ޖެހޭ ނަމަ އެކަންވެސް ކުރުން މުހިއްމުކަމުގައި ދެކެވެޑައިގަންނަވާކަމަށްވެސް ރައީސް ނަޝީދު ވިދާޅުވިއެވެ.
Local Council inthikhab veehaaves avahah beyvun varah muhinmu. Mikan kurumah qanoon ah badhal gennan jehey nama, ekanves kurun muhinmu kamuga alhugandu dheken
— Mohamed Nasheed (@MohamedNasheed) January 4, 2021
އިލެކްޝަންސް ކޮމިޝަންގެ ރައީސް އަހްމަދު ޝަރީފު ވިދާޅުވީ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ބޭއްވުމަށް ޤާނުނަށް ގެންނަންޖެހޭ ބަދަލުތައް ފާހަގަކޮށް ބިލެއް ޑްރާފްޓްކުރުމުގެ މަސައްކަތް އެ ކޮމިޝަނުން ކުރަމުން އަންނަކަމަށެވެ. އަދި ކުއްލި ނުރައްކަލުގެ ހާލަތުގެ މުއްދަތު އިތުރުކުރުމުން މާރިޗު މަހު އިންތިޚާބު ބޭއްވުމަށް އެއްވެސް ތައްޔާރީއެއް ނުވެވޭނެކަމަށްވެސް ޝަރީފު ވަނީ ވިދާޅުވެފައެވެ.
މިިދިޔަ އަހަރުގެ އޭޕްރިލްމަހުގެ 6 ވަނަދުވަހު ބޭއްވުމަށް ތައްޔާރުވި ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ފަސްކުރީ ރާއްޖެއިން ކޯވިޑް ފެނި މިދިޔަ އަހަރުގެ އޭޕްރިލްމަހުގެ 15 ވަނަދުވަހު މުޅި ރާއްޖެ ފުރަބަންދުކުރުމާއި ގުޅިގެންނެވެ.
ފުރަބަންދާއި އެކު ޕާޓީތަކުން އިންތިޚާބަށް ކުރަމުން އައި ކެމްޕެއިންތައްވެސް ވަނީ ހުއްޓާލާފައެވެ. އެހެންނަމަވެސް ދާދި ފަހުން އެޗްޕީއޭއިން ވަނީ ކޯވިޑާއި ގުޅިގެން އަޅާފައިވާ ރައްކާތެރިކަމުގެ ބައެއް ފިޔަވަޅުތަކަށް ދިން ލުއިތަކާއި އެކު ސީޔާސީ ޕާޓީތަކުން އެ އިދާރާއިން ކަނޑައަޅާފައިވާ ގައިޑްލައިންތަކާއި އެކު ކުރިޔަށް ގެންދެވިދާނެކަން އިއުލާންކޮށްފައެވެ.