ދިރާގު ދިވެހި ޕްރިމިއަރ ލީގުގައި ކްލަބް ވެލެންސިއާ އާއި ކްލަބް އީގަލްސް ބައްދަލުކުރިމެޗް ކާމިޔާބުކޮށް ޕޮއިންޓް ތާވަލްގެ އެއްވަނައަށް ވެލެންސިއާ އަރައިފިއެވެ. މިއަދު ހަވީރު ގޮލަޅު ދަނޑުގައި ކުޅުނު މިމެޗް ކްލަބް ވެލެންސިއާ ކާމިޔާބުކުރީ 2 ލަނޑު ސުންލަނޑުންނެވެ.
މިމެޗްގެ ފުރަތަމަ ލަނޑު މެޗްގެ 16 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ ވެލެންސިއާގެ ކެޕްޓަން ޢަލީ އަޝްފާޤެވެ. މިއީ ވެލެންސިއާގެ ފޯވަޑް އަލީ ފާސިރަށް އީގަލްސްގެ ޕެނަލްޓީ އޭރިއާ ތެރެއިން އީގަލްސްގެ ކުޅުންތެރިން ފައުލް ކުރުމުން ލިބުނު ޕެނަލްޓީ އެކެވެ. މިމެޗުގެ ފުރަތަމަ ހާފްގައި ލަނޑު ޖަހާނެ އިތުރު ދެތިން ފުރުސަތު ވެލެންސިއާއިން ތަނަވަސް ކުރި ނަމަވެސް މިއިން އެއްވެސް ފުރުސަތެއް ލަނޑަކަށް ބަދަލުކުރެވޭ ގޮތެއް ނުވިއެވެ. އަދި އިގަލްސްގެ ފަރާތުން މިހާފްގައި މާ އެދެވޭ ރަގަޅު ކުޅުމެއް ފެނިގެނެއް ނުދިޔައެވެ. އަދި މިހާފްގައި އަނިޔާގެ ސަބަބުން އީގަލްސްއަށް ދެބަދަލެއްވެސް ކުރަން ޖެހުނު ތަން ފެނިގެން ދިޔައެވެ.
މިމެޗްގެ ދެވަނަ ހާފްގައި ދެޓީމްގެ ފަރާތުންވެސް ފެނިގެންދިޔައީ ވަރަށް ހަމަހަމ ކުޅުމެކެވެ. އަދި އީގަލްްސްއިންވެސް ލަނޑު ޖަހާނެ ރަގަޅު ދެތިން ފުރުސަތު ތަނަވަސް ކުރިއެވެ. ނަމަވެސް ވެލެންސިއާގެ ކީޕަރ މުހަންމަދު ޝަފީއުގެ ލަނދެއް ޖެހޭ ގޮތެއް ނުވިއެވެ. މިމެޗްގައި ވެލެންސިއާއިން ޖެހި ދެވަނަ ލަނޑު މެޗްގެ 84 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ އަލީ ފާސިރުއެވެ. މިއީ ވެލެންސިއާގެ ކެޕްޓަން އަޝްފާޤަށް އީގަލްސްގެ ކީޕަރ މިލާން ފައުލް ކުރުމުގެ ސަބަބުން ލިބުނު ޕެނަލްޓީއެކެވެ.
މިމެޗްގެ 87 ވަނަ މިނެޓްގައި އީގަލްސްގެ ނާއިމް މުހައްމަދަށް ދެވަނަ ރީނދޫ ކާޑާއެކު ރަތްކާޑެއް ދެއްކުމާއެކު މެޗްގެ ފަހު ވަގުތުކޮޅު އެޓީމުން ކުޅުނީ އެއް ކުޅުންތެރިއެއް މަދުކޮށެވެ. އަދި މިވަގުތުކޮޅުގެ ތެރޭގައި ލީޑު ފުޅާ ކުރުމަށް ރަގަޅު ދެ ފުރުސަތެއް ވެލެންސިއާއަށް ލިބި ބޭކާރުވިއެވެ. މިމެޗްގެ މޮޅު ކުޅުންތެރިޔަކަށް ހޮވުނީ ވެލެންސިއާގެ ކެޕްޓަން އަލީ އަޝްފާޤެވެ.
މިކާމިޔާބީއާއެކު ދިރާގު ދިވެހި ޕްރިމިއަރ ލީގުގައި ކުޅުނު 4 މެޗުން 10 ޕޮއިންޓް ހޯދާ ވެލެންސިއާވަނީ ތާވަލްގެ އެއްވަނައަށް އަރާފައެވެ. އަދި އީގަލްސްއޮތީ ކުޅުނު 4 މެޗުން ލިބިިފައިވާ އެއްޕޮއިންޓާއެކު ތާވަލްގެ ހަތްވަނައިގައެވެ.