ސްޕެނިޝް ލަލީގާގައި އަލަވޭޒް އާއި އެޓްލެޓިކޯ މެޑްރިޑް ރޭ ބައްދަލުކުރިމެޗް ކާމިޔާބުކޮށް ތާވަލްގެ އެއްވަނައަށް އަނެއްކާވެސް އެޓްލެޓީކޯ އަރައިފިއެވެ. އަލަވޭޒްގެ ދަނޑުގައި ކުޅުނު މިމެޗް އެޓްލެޓިކޯ ކާމިޔާބުކުރީ 2 ލަނޑު 1 ލަނޑުންނެވެ.
މިމެޗްގެ ފުރަތަމަ ލަނޑު މެޗްގެ 41 ވަނަ މިނެޓްގައި ޖަހައިދިނީ މާކޮސް ލޮރެންޓޭއެވެ. އަދި މެޗްގެ 63 ވަނަ މިނެޓްގައި އަލަވޭޒްގެ ވިކްޓަރ ލަގުއާޑިއާއަށް ރައްކާޑު ދެއްކުމާއެކު މިމެޗް ފަސޭހަ ކަމާއެކު އެޓްލެޓިކޯ ކާމިޔާބު ކުރާނެ ކަމަށް ހީވިނަމަވެސް އެޓީމުންވަނީ 10 ކުޅުންތެރިންނާއެކު ރަގަޅު ކުޅުމެއް ދައްކާ ގިނަ ހަމަލާތަކެއް އުފައްދާފައެވެ. މިގޮތުން މެޗްގެ 84 ވަނަ މިނެޓްގައި އެޓީމުން އުފެއްދި ހަމަލާއެއްގައި އެޓީމުން ވަނީ ލަނޑެއް ޖަހާ މެޗްގެ ނަތީޖާ ހަމަހަމަވެސް ކޮށްފައެވެ. މިލަނޑަކީ އެޓްލެޓިކޯގެ ފިލީޕޭ އަތުން ބައިކޮޅަށް ވަން ލަނޑެކެވެ. މިމެޗުން އެޓްލެޓިކޯ މޮޅުވި ލަނޑު މެޗްގެ 90 ވަނަ މިނެޓްގައި ޖަހާދިނީ މިސީޒަންގައި އެޓީމާ ގުޅި މޮޅު ކުޅުމެއް ދައްކަމުންދާ ލުއިސް ސުވަރޭޒްއެވެ. މިއީ މިސީޒަންގައި ލަލީގާގައި އޭނާ ކާމިޔާބުކުރި 9 ވަނަ ލަނޑެވެ.
މިކާމިޔާބީއާއެކު އެޓްލެޓިކޯވަނީ ކުޅުނު 15 މެޗުން 38 ޕޮއިންޓް ހޯދައި ތާވަލްގެ އެއްވަނައަށް ކުރިއަށް ޖެހިލާފައެވެ. އަދި އެންމެ ގާތުން ވާދަކުރާ އެންމެ ފަހުގެ ޗެމްޕިއަން އަދި ވާދަވެރި ރެއާލް މެޑްރިޑަށް 17 މެޗުން ލިބިފައިވަނީ 36 ޕޮއިންޓެވެ.
ލަލީގާގައި ރޭ ބާރސެލޯނާ އާއި ހުއެސްކާ ބައްދަލުކުރިމެޗް 1 ލަނޑު ސުން ލަނޑުން ކާމިޔާބުކުރީ ބާސާއެވެ. ހުއެސްކާގެ ދަނޑުގައި ކުޅުނު މިމެޗް ބާސާ ކާމިޔާބުކުރި ހަމައެކަނި ލަނޑު މެޗްގެ 27 ވަނަ މިނެޓްގައި ކެޕްޓަން ލައޮނެލް މެސީ ތަނަވަސްކޮށްދިން ފުރުސަތެއްގައި ޖަހާދިނީ ފްރެންކީ ޑި ޖޮންގއެވެ. މިއީ މެސީ ބާސާއަށް ކުޅެދިން 750 ވަނަ މެޗެވެ. އަދި ލަލީގާގައި އޭނާ ކުޅުނު 500 ވަނަ މެޗެވެ.
ރޭގެ ކާމިޔާބީއާއެކު ބާސާވަނީ ކުޅުނު 16 މެޗުން 28 ޕޮއިންޓް ހޯދާ ތާވަލްގެ 5 ވަނައަށް ކުރިއަށް ޖެހިލާފައެވެ.