އައު ސަރުކާރުގެ ވަޒީރުން ގޮވައިގެން ސަޢުދީ ޢަރަބިއްޔާއިން ޔަމަނަށް ދަތުރުކުރި މަތިންދާ ބޯޓް ޔަމަނުގައި ޖެއްސި ވަގުތާއި ދިމާކޮށް އެ އެއާޕޯޓުގައި ބޮޑު ގޮވުމެއް ގޮއްވާލައިފިއެވެ.
މި ގޮވުންތުންކާއި އެކު ގޮވުމުގެ އަޑު ފައްގަޑާއި އެކު ބަޑީގެ އަޑުތައްވެސް އިވިގެންދިޔަކަމަށް ރިޕޯޓްތައް ބުނެއެވެ. މި ހާދިޘާގައި 22 މީހުން މަރުވެ 50އަށްވުރެ ގިނަ މީހުން ޒަޚަމްވެފައިވާކަމަށް ޚަބަރުތައް ބުނެއެވެ.
ގޮވުމުގެ ސަބަބު މިހާތަނަށް ސާފުވެފައެ ނުވާއިރު އެ ޙަމަލާގެ ޒިންމާ އެއްވެސް ފަރާތަކުން މިހާތަނަށް އުފުލައިފައެއް ނުވެއެވެ. ނަމަވެސް ޔަމަނުގެ އިންފޮމޭޝަން މިނިސްޓަރު، މުޢައްމަރު އަލްއަރްޔާނީވަނީ އެ ޙަމަލާއަކީ އީރާނުން ވާގިވެރިވާ ހޫޘީން ދީފައިވާ ޙަމަލާއެއްކަމަށް ތުހުމަތުކުރައްވާފައެވެ. ނަމަވެސް ހޫޘީންވަނީ އެ ޙަމަލާއަކީ އެ ޖަމާޢަތުން ދިން ޙަމަލާއެއް ނޫންކަމަށް ބުނެފައެވެ.
ފުރަތަމަ ގޮވުންތައް ގޮވިތާ ގަޑިއިރުތަކެއް ފަހުން ޢަދަނުގައި ހުންނަ މާޝެގް ރިޔާސީ ގަނޑުވަރު ކައިރިން ދެވަނަ ގޮވުމެއްވަނީ ގޮވައިފައެވެ. ފުރަތަމަ ގޮވުމަށްފަހު ބޮޑުވަޒީރު މައީން އަބްދުލްމާލިކާއި ސަޢުދީން ޔަމަނަށް ކަނޑައަޅާފައި ހުންނަވާ ސަފީރާއި ސަރުކާރުގެ ވަޒީރުންނަށް ރައްކާތެރިކަން ދިނުމަށް ގެންގޮސްފައިވަނީ ރިޔާސީ އިދާރާއަށެވެ.
ރިޔާސީ އިދާރާގައި ހުންނަވާ ބޮޑުވަޒީރު މައީން ކުރެއްވި ޓްވީޓެއްގައި ވިދާޅުވީ ސަރުކާރުގެ ވެރިން ތިއްބެވީ ޢަދަނުގައި ކަމަށާއި ހުރިހާ ބޭފުޅުންގެ ޙާލު ރަނގަޅުކަމަށެވެ. ވައިގެ ބަނދަރުގައި ދިން ނިރުބަވެރި ޙަމަލާ އޭނާ ވަނީ ހަރުކަށި އިބާރާތުން ކުށްވެރިކުރައްވާފައެވެ.
މިދިޔަ އަހަރު ސަޢުދީ ޢަރަބިއްޔާގެ ރިޔާޟުގައި ބޭއްވި މަޝްވަރާތަކުގައި އެ ޤައުމުގެ ދެކުނުގައި ޙަރަކާތްތެރިވާ ހަނގުރާމަވެރި ޖަމާޢަތެއްކަމަށްވާ ސަދަން ޓްރާންސިޝަނަލް ކައުންސިލް، އެސްޓީސީއާއި ޔަމަނުގެ ސަރުކާރުންވަނީ ޢަދާވާތްތެރިކަން ނައްތާލާ ދެ ފަރާތުގެ މަންދޫބުން ހިމެނޭގޮތަށް އައު ވަޒީރުންގެ މަޖިލީހެއް އެކުލަވާލަން އެއްބަސްވެފައެވެ. އަދި ދެ ފަރާތުގެ އަސްކަރިއްޔާ އެއްކޮށްލުމަށްވެސް ވަނީ އެއްބަސްވެފައެވެ.
މީގެ ކުރިން އެސްޓީސީއާއި ޔަމަނުގެ ސަރުކާރުން ގުޅިގެންވަނީ ހޫޘީންނާ ދެކޮޅަށް މަސައްކަތްކޮށްފައެވެ. ނަމަވެސް އޭޕްރިލް މަހުގެ ތެރޭގައި އެސްޓީސީންވަނީ އަސްކަރީ އިއްތިޙާދުން ވަކިވެ، ޔަމަނުގެ ދެކުނުގައި އަމިއްލަ ވެރިކަމެއް އިޢުލާނުކޮށްފައެވެ. އެއާއެކު ދެ ފަރާތުގެ މެދުގައި ޤާއިމުކޮށްފައިވާ އެއްބަސްވުން ތަންފީޒުކުރުމަށް ހުރަސް އެޅުނެވެ.
އޭގެ ފަހުން ޔަމަނުގެ މައި ސަރުކާރާއި އެ ޖަމާޢަތާ ދެމެދުވަނީ ވަރުގަދަ ޙަމަލާތަކެއްވެސް ބަދަލުކޮށްފައެވެ. ނަމަވެސް މިދިޔަ ޖުލައި މަހުގެ ތެރޭގައި އެސްޓީސީންވަނީ 2019ވަނަ އަހަރު ޤާއިމްކުރި އެއްބަސްވުމަށް ޢަމަލުކުރުމަށް ނިންމާފައެވެ. އެ އެއްބަސްވުމުގެ ދަށުން ދެ ފަރާތުގެ ހަމަހަމަ ބައިވެރިވުމާއިއެކު 24 މެންބަރުންގެ މައްޗަށް އެކުލެވޭ ވަޒީރުންގެ މަޖިލީސް ޤާއިމްކޮށްފައިވަނީ މި އަހަރުގެ ޑިސެމްބަރު މަހުގެ 18ވަނަ ދުވަހުގައެވެ.