ސްރީ ލަންކާގައި ކޯވިޑް-19 އިތުރަށް ފެތުރުނަ ނުދިނުމަށް އެ ޤައުމުގެ ތިން އަވަށެއް ފުރަބަންދުކޮށްފިއެވެ.
ސްރީ ލަންކާގެ ވެރިކަންކުރާ އަވަށް، ކޮލޮމްބޯއާއި 60 ކިލޯމީޓަރު ދުރުގައި އޮންނަ ކޮސްގަމާ، އަވިއްސަވެއްލާ އަދު ރުވަންވެއްލާ ފުރަބަންދުކޮށްފައިވަނީ ކުރިއަށް އޮތް ޗުއްޓީއާއި ދިމާކޮށް ޑިސެމްބަރު މަހުގެ 24ވަނަ ދުވަހުގައެވެ.
ސްރީ ލަންކާގައި މިހާތަނަށް 39،231 މީހުންނަށް ކޯވިޑް-19 ޖެހި 185 މީހުންވަނީ މަރުވެފައެވެ. މިދިޔަ އޮކްޓޯބަރު މަހުން ފެށިގެން އެ ޤައުމުގައި ބަލިފެތުރޭ މިންވަރުވަނީ އިތުރުވާން ފަށާފައެވެ. އޮކްޓޯބަރު މަހު ފެތުރެންފެށި ދެ ކްލަސްޓާގެ ސަބަބުން ސްރީލަންކާގައި މިހާތަނަށް 34،959 މީހުންނަށްވަނީ ކޯވިޑް-19 ޖެހިފައެވެ. އެއާއިއެކު ހަމަ އެ މަހުގެ ތެރޭގައި އެ ޤައުމުގެ އެތައް އަވަށެއްގައިވަނީ ފުރަބަންދުގެ އުސޫލުތައް ޤާއިމްކޮށްފައެވެ. މަދަރުސާތަކާއި ސަރުކާރުގެ އިދާރާތައް ބަންދުކޮށް، އާންމުން އެއްވެ އުޅުން މަނާކުރުމުގެ އިތުރުން އާންމު ދަތުރުފަތުރުގެ ނިޒާމު ބޭނުންކުރުމުގައިވެސްވަނީ ރައްކާތެރިކަމުގެ ގިނަ ފިޔަވަޅުތަކެއް އަޅައިފައެވެ.
ފާއިތުވި 24 ގަޑިއިރުގެ ތެރޭގައިވެސް އެ ޤައުމުގައި 592 މީހުންނަށް ބަލިޖެހި އެކަކުވަނީ މަރުވެފައެވެ.