ރާއްޖޭގެ ރަށްތައް ފަސޭހަ ފެރީ ނިޒާމަކުން ގުޅާލުމަކީ ސަރުކާރުގެ ވަޢުދެކެވެ. ރާއްޖޭގައި މިހާރު އޮތް، އެންމެ ގޮންޖެހުން ބޮޑު އަސާސީ ޚިދުމަތަކީ ދަތުރުފަތުރުގެ ޚިދުމަތް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުވެސްވަނީ ވިދާޅުވެފައެވެ. އަދި ކަނޑުދަތުރުފަތުރުގެ ފަސޭހަ ނިޒާމެއް ޤާއިމުކުރުމަކީ ސަރުކާރުން އަންނަ އަހަރަށް ކަނޑައަޅާ އެންމެ ބޮޑު އެއް އަމާޒުކަމަށްވެސް އެމަނިކުފާނުވަނީ ވިދާޅުވެފައެވެ.
ޕީއެސްއެމްގެ ދިވެހިރާއްޖޭގެ އަޑުން ގެނެސްދޭ "ބާއްޖަވެރި ހެނދުނެއް" ޕްރޮގްރާމްގައި ކަނޑުދަތުފަތުރުގެ ނިޒާމު ހަރުދަނާކުރުމާއި ގުޅޭގޮތުން ވާހަކަފުޅުދައްކަވަމުން ޕްލޭނިންގ މިނިސްޓަރ މުޙައްމަދު އަސްލަމް ވިދާޅުވީ މިނިޒާމާއި ގުޅޭ މަޝްވަރާތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއާއެކު ކުރިއަށްދާކަމަށެވެ.
އަދި ސަރުކާރުގެ ޢަމާޒަށް ވާސިލުވުމަށް ބޭނުންވާ ޕްލޭންތައް ހެދުމާއި އެކަމަށް ވާންޖެހޭ ތައްޔާރީތަކުގެ މަސައްކަތް އެމްޓީސީއާ ގުޅިގެން ފަށާފައިވާކަމަށާއި މިކަމާއި ގުޅޭ ޕްލޭންތައް ހަދާފައިވަނީ ރާއްޖެ އެކި ޒޯންތަކަކަށް ބަހާލައިގެން ކަމަށް މިނިސްޓަރ އަސްލަމް ވިދާޅުވިއެވެ. އެގޮތުން ޒޯން ތެރޭގެ ރަށްތަކާއި، އަދި އެއް ޒޯން އަނެއް ޒޯނަށް ދަތުރުކުރެވޭނެ ފެރީ ނިޒާމެއް ޤާއިމުކުރައްވާނެ ކަމަށްވެސް މިނިސްޓަރ ވިދާޅުވިއެވެ.
"ރާއްޖެ ލާމަރުކަޒީ ކުރެވޭނީ ދަތުރުފަތުރުގެ ރަނގަޅު ނިޒާމަކުން ގުޅިގެން. ރައީސް އިޢުލާންކުރެއްވި ގޮތަށް އެމްޓީސީއާއެކު މަޝްވަރާ ކުރަމުންދަނީ. އެގްރިމެންޓަކަށް އައިސް އެންމެ ފުރަތަމަ ޚިދުމަތް ފަށާނީ ހއ.ހދ އަދި ށ. އަތޮޅަށް." މިނިސްޓަރ އަސްލަމް ވިދާޅުވިއެވެ.
މި ފެރީ ނިޒާމަކީ މުހިންމު ޚިދުމަތްތައް ހޯދުމަށް ކައިރި ރަށްތަކަށް ދުވަހުން ދުވަހަށް ކުރާ ދަތުރުތަކަށް ޚާއްސަ ނިޒާމެކެވެ.
މިނިސްޓަރ އަސްލަމް ވިދާޅުވީ 2009 ވަނަ އަހަރު ބައެއް އަތޮޅުތަކުގައި ފެރީ ނިޒާމު ފެށިކަމަށާއި އޭރު ބައެއް އަތޮޅުތަކުގައި ރަނގަޅަށް ޚިދުމަތް ފަށައިގަނެވުނު ނަމަވެސް، މިހާރު މިނިޒާމު މުޅިންހެން އުވިފައިވާކަމަށެވެ.
މިނިސްޓަރ އަސްލަމް ވިދާޅުވީ އާއްމު ދަތުރުފަތުރުގެ ޚިދުމަތްދޭ ފެރީތަކުގައި ހުންނަންޖެހޭ ވަކި ޚާއްސަ މިންގަނޑުތަކާއި ގައިޑްލައިންތައް ހަދާފައިވާކަމަށެވެ. އެގޮތުން ފެރީ ވާންޖެހޭނީ މީހުން އުފުލުމަށް ފަސޭހަ، މިކަމަށް ޚާއްސަކޮށް ފަރުމާކޮށްފައިވާ ފެރީއަށްކަމަށެވެ. މިއީ 30، 40 އަދި 80 މީހުންގެ ޖާގައިގެ ފެރީތަކަކަށްވާނެ ކަމަށް މިނިސްޓަރ ވިދާޅުވިއެވެ.
"ބިތަކަށް ޖެހިގެން ނޫން. ފަސޭހައިން އިށީނދެގެން ތިބެވޭ ރީތިކޮށް ގޮނޑިތައް ހުންނަންޖެހޭނީ. އަރާފައިބަން ފަސޭހަ، ނުކުޅެދުންތެރިކަން ހުންނަ މީހުންނަށްވެސް ފަސޭހައިން ބޭނުންކުރެވެންޖެހޭނެ. އަދި ސޭފްޓީ ސްޓޭންޑަރޑްތަކާއި އުޅަނދު ދުއްވާ ސްޕީޑްވެސް ކަނޑައެޅޭގޮތަށް ގައިޑްލައިންތައް ހަދަމުންދަނީ." މިނިސްޓަރ އަސްލަމް ވިދާޅުވިއެވެ.
މިނިސްޓަރ ވިދާޅުވީ ރާއްޖޭގެ އެންމެ ދެކުނުން އެންމެ އުތުރަށް ސީދާ ދަތުރުތައް ނޯންނާނެކަމަށެވެ. ނަމަވެސް އެކި ޒޯންތަކުން ޓްރާންސިޓްވެގެން ދަތުރުކުރެވޭނެކަމަށެވެ.
މިގޮތަށް ދަތުރުފަތުރުން ގުޅާލުމުގެ ބޭނުމަކީ ދިރިއުޅޭ ރަށް ބަދަލުނުކޮށް، އެކި ރަށްތަކުން ލިބޭ ޚިދުމަތްތަކާއި އާބާދީ ގުޅާލުން ކަމަށްވެސް މިނިސްޓަރ އަސްލަމްވަނީ ވިދާޅުވެފައެވެ.