ޖިހާދަށް ގޮސް ސޫރިޔާގައި ހާލުގައި ޖެހި އެޤައުމުގެ ރެފިއުޖީ ކޭމްޕުތަކުގައި ތިބި ޖަރުމަނުވިލާތާއި ފިންލޭންޑަށް ނިސްބަތްވާ 23 ރައްޔިތަކު އަނބުރާ ޤައުމަށް ގެންގޮސްފިއެވެ. ޤައުމަށް އަނބުރާ ގެންދިޔަ މީހުންގެ ތެރޭގައި އައިސިސް ޖަމާޢަތުގެ ބައިވެރިންކަމަށް ތުހުމަތުކުރެއްވި އެމީހުންނާއި ދެކޮޅަށް ޖިނާޢީ ތަހުޤީޤު ފަށާފައިވާ މީހުންވެސް ހިމެނެއެވެ.
ޖަރުމަނުވިލާތުގެ ޚާރިޖީ ވަޒީރު ހައިކޯ މާސް ވިދާޅުވީ އެ ޤައުމުގެ 12 ކުޑަކުއްޖަކާއި ތިން އަންހެނަކު ސޫރިޔާއިން އަނބުރާ ޤައުމަށް ގެނެވުނީތީ ވަރަށް ބޮޑަށް ހިތްހަމަޖެހިފައިވާކަމަށެވެ. އޭނާ ވިދާޅުވީ މީ އިންސާނިއްޔަތަށްޓަކައި ކުރިކަމެއްކަމަށާއި އަނބުރާ ޤައުމަށް ގެނައި މީހުންގެ ތެރޭގައި ގިނައީ މައިންބަފައިން މަރުވެފައިވާ ކުޑަކުދިންނާއި ހާލު ދެރަ ކުޑަކުދިންކަމަށެވެ. މައިންބަފައިން ތިބި ކުދިން އެކުދިންގެ ބެލެނިވެރިއަކު ނެތި ޤައުމަށް އަނބުރާ ގެނައުމަކީ ޤަނޫނީ ގޮތުން ކުރެވޭނެކަމެއް ނޫންކަމަށްވެސް ހައިކޯ ފާހަގަކުރެއްވިއެވެ.
ޖަރުމަނުވިލާތުގެ ނޫސް އިދާރާތަކުން ބުނީ ޤައުމަށް އަނބުރާ ގެނައި މީހުންގެ ތެރޭގައި ހިމެނޭ ކުޑަކުދިންނަކީ އުމުރުން 2 އަހަރާއި 12 އަހަރާއި ދެމެދުގެ ކުދިން ކަމަށެވެ. އަދި އެ ތިން އަންހެނުންނަކީ 21 އަހަރާއި 38 އަހަރާއި ދެމެދުގެ މީހުންކަމަށްވެސް ނޫސް ތަކުން ވަނީ ރިޕޯޓުކޮށްފައެވެ. އެ ތިން މީހުންނަކީވެސް އައިސިސްގައި ޙާރަކާތްތެރިވާ ހަނގުރާމަވެރިންގެ އަނބިންކަމަށާއި އެމީހުންގެ ޞިއްޙީ ޙާލަތު ވަރަށް ދެރަކަމަށްވެސް ނޫސްތަކުން ބުނެއެވެ. އެމީހުން އެނބުރި ޤައުމަށް އައުމުން އޭގެ ތެރެއިން އެކަކުވަނީ ސަލާމަތީ ބާރުތަކުގެ ބެލުމުގެ ދަށަށް ގެންގޮސްފައެވެ.
ސޫރިޔާގެ ކޭމްޕުތަކުގައި 9،000އަށްވުރެ ގިނަ އަންހެނުންނާއި ކުޑަކުދިން ތިބިކަމަށް ފިންލޭންޑުން ބުނެއެވެ. އޭގެ ތެރެއިން ތިން ބައި ކުޅަ ދެ ބަޔަކީ ކުޑަކުދިންކަމަށްވެސް ރަސްމީ އިދާރާތަކުން ބުނެއެވެ. ސަލާމަތީ ސަބަބުތަކަށްޓަކައި ވިލާތުގެ ގިނަ ޤައުމުތަކުން ސޫރިޔާގައި ތިބި އެ ޤައުމުތަކުގެ ރައްޔިތުން އަނބުރާ ޤައުމަށް ގެނައުމަށް ދެކޮޅު ހަދާކަމަށްވެސް ފިންލޭންޑުން ބުނެއެވެ.