އިޓަލީވިލާތުގައި ފާހަގަކުރުމަށް ތައްޔާރުވަމުންދާ ޑިސެމްބަރުމަހާޢި އައު އަހަރުގެ ޗުއްޓީއާއި ދިމާކޮށް މުޅި ޤައުމު ފުރަބަންދުކުރުމަށް ނިންމައިފިއެވެ. އިޓަލީން އެ ފިޔަވަޅު އަޅާފައި މިވަނީ އެ ޤައުމުގައި ކޯވިޑް ފެތުރޭ މީންވަރު އަނެއްކާވެސް އިތުރުވާން ފެށުމުންނެވެ.
އިޓަލީގެ ބޮޑުވަޒީރު ޖުސެއްޕެ ކޯންތެ ވިދާޅުވީ އަނެއްކާވެސް ޤައުމު ފުރަބަންދުކުރުމަށް ނިންމެވި ނިންމެވުމަކީ ފަސޭހަ ނިންމުމެއް ނޫންކަމަށެވެ. ނަމަވެސް ކަމާއިބެހޭ މާހިރުން ވަރަށް ބޮޑަށް ކަންބޮޑުވުން ފައުޅުކޮށްފައިވާކަމަށާއި ޗުއްޓީ ތެރޭގައި ބަލިޖެހޭ މީހުންގެ ޢަދަދު ވަރަށް ބޮޑަށް އިތުރުވެދާނެކަމުގެ އިންޒާރު އެ ބޭފުޅުން ދެއްވާފައިވާކަމަށް ކޯންތެ ވިދާޅުވިއެވެ. އެހެންކަމުން އަވަސް ފިޔަވަޅުތަކެއް އެޅުމަކީ ކޮންމެހެން މުހިންމުކަމެއްކަމުގައި އޭނާ ވިދާޅުވިއެވެ.
ޗުއްޓީ އާއި ދިމާކޮށް އިޓަލީވިލާތުގެ ސަމާލުގެ މިންވަރު ރަތަށް މަތިކުރަން ވަނީ ނިންމާފައެވެ. ފުރަބަންދުގެ ހަރުކަށިކަން ކަނޑައަޅާފައިވަނީ ތިން މުއްދަތަކަށް ބަހާލައިގެންނެވެ. މިގޮތުން ފުރަތަމަ މުއްދަތަކީ މިމަހުގެ 24 ހުން 27 ގެ ނިޔަށެވެ. ދެވަނަ މުއްދަތު ފެށޭނީ އޭގެ ތިން ދުވަސްފަހުން ޑިސެމްބަރުމަގުގެ 31 ވަނަދުވަހުއެވެ. މި ފަހަރު މި މުއްދަތު ޖެނުއަރީމަހުގެ 3 ވަނަ ދުވަހާއި ހަމައަށް ދެމިގެންދާނެއެވެ. އޭގެ ފަހުން ޖެނުއަރީ މަހުގެ 5 ވަނަދުވަހާއި 6 ވަނަދުވަހު އަނެއްކާވެސް ފުރަބަންދުގެ ފިޔަވަޅުތައް ހަރުކަށިވާނެއެވެ.
މި ދުވަސްތަކުގައި ކޮންމެހެން ދޭންޖެހޭ ޚިދުމަތްތައްދޭ ފިހާރަތައް ނޫން ފިހާރަތަކާއި، ރެސްޓޯރަންޓުތަކާއި ކެފޭތައް ބަންދުކުރާނެއެވެ. އިޓަލީގެ ރައްޔިތުންނަށް ދަތުރުކުރެވޭނީ މަސައްކަތުގެ ބޭނުމަށާއި ޞިއްޙީ ބޭނުންތަކަށާއި ކުއްލި ޙާލަތްތަކުގައި އެކަންޏެވެ. ގޭގެއަށް ޒިޔާރަތްކުރުމަށް ޙުއްދަ ދިނުމުގައިވެސްވަނީ ބަދަލުތަކެއް ގެނެސްފައެވެ. އަދި ރޭގަނޑު 10އަކުން ފެށިގެން ފަތިހު ފަހަކަށް ކާފިއު ހިންގުމަށްވެސްވަނީ ނިންމާފައެވެ.
ޑިސެމްބަރު މަހުގެ 28ވަނަ ދުވަހުން 30ވަނަ ދުވަހަށް އަދި ޖަނަވަރީ މަހުގެ ހަތަރުވަނަ ދުވަހު މި ފިޔަވަޅުތަކަށް ކޮންމެވެސް ވަރެއްގެ ލުޔެއް ދޭނެއެވެ. އެ ދުވަސްތަކުގައި އާންމުންނަށް ގެއިން ބޭރަށް ނުކުތުމުގެ ޙުއްދަ އޮންނާނެއެވެ.
ބޮޑުވަޒީރު ކޯންތެ ވިދާޅުވީ އެފަދަ ގޮތަކަށް ފިޔަވަޅު އެޅުމަށް ފަރުމާކޮށްފައިވަނީ އިޖުތިމާޢީ ގުޅުން ބޭއްވުމަށް ކޮންމެވެސް ވަރެއްގެ ފުރުޞަތެއް ދިނުމުގެ ގޮތުންކަމަށެވެ. ފިޔަވަޅުތަކަށް ޢަމަލުކުރޭތޯ ބެލުމަށް ފުލުހުން ނުފޮނުވި ނަމަވެސް، ފިޔަވަޅުތަކަށް އަމިއްލަ އިޚްތިޔާރުގައި ޢަމަލުކުރުމަށް އޭނާވަނީ އިޓަލީގެ ރައްޔިތުންނަށް ގޮވައިލައްވާފައެވެ.
ވިލާތުގެ ޤައުމުތަކުގެ ތެރެއިން ކޯވިޑްގެ ސަބަބުން އެންމެ ގިނަ ޢަދަދެއްގެ މީހުން މަރުވެފައިވާ ޤައުމުގެ ގޮތުގައި އޮތީ އިޓަލީވިލާތެވެ. އެ ޤައުމުގައި މިހާތަނަށް ޖުމްލަ 1.93 މިލިއަން މީހުންނަށް ބަލިޖެހިފައިވާއިރު 68،447 މީހުންވަނީ މަރުވެފައެވެ.
ޤައުމުގެ ޙާލަތަށް އިޝާރާތްކުރައްވާ ބޮޑުވަޒީރު ކޯންތެ ވިދާޅުވީ މި މަހުގެ ފަހު ކޮޅުގައި އެ ޤައުމުގައި ފެށުމަށް ހަމަޖެހިފައިވާ ކޯވިޑް ވެކްސިން މަޝްރޫޢުއަކީ ޤައުމަށް ކުރިމަތިވެފައިވާ ބިރުވެރި ޙާލަތުގެ ނިމުމުގެ ފެށުންކަމަށެވެ.