އިނގިރޭސިވިލާތުގެ ދެކުނުގެ ސަރަޙައްދުތަކުގައި ހަލުވިކަމާއިއެކު ފެތުރެމުންދާ ކޯވިޑް-19 ޖައްސާ ވައިރަހުގައި އާންމުކޮށް ފެންނަ ވައިރަހާއި ތަފާތުތަކެއް ހުރިކަމަށް އެ ޤައުމުގެ ސައިންސްވެރިން ބުނެފިއެވެ. މި ވައިރަހުން ބަލިޖެހިފައިވާ 1،108 މީހުން އިނގިރޭސިވިލާތުގެ ދެކުނާއި ހުޅަނގުގެ ސަރަޙައްދުތަކުން ފެނިފައިވާކަމަށް އެޤައުމުގެ ޢާންމު ޞިއްޙަތާއިބެހޭ އިދާރާއިންވަނީ ބުނެފައެވެ.
އެ ސަރަޙައްދުތަކުގައި ފެތުރެމުންދާ ވައިރަހުން ފާހަގަވެފައިވާ ބައެއް ބަދަލުތަކުގެ ތެރޭގައި ކޯވިޑް ވައިރަހުގެ އެންމެ މައިގަނޑު ސިފަކަމުގައިވާ، އިންސާނުންނަށް ބަލިޖެއްސުމުގައި އެންމެ އިސް ދައުރެއް ޢަދާކުރާ އޭގެ ބޭރު ފަށަލައިގައިވާ ޕްރޮޓީން ކަށިތަކަށް ކޮންމެވެސް ވަރަކަށް ބަދަލު އައިސްފައިވާކަމަށްވަނީ ފާހަގަވެފައެވެ. އޭގެ ސަބަބުން އިންސާނުންނަށް ބަލިޖެހޭ މިންވަރު އިތުރުވެ، ގައިންގަޔަށް ބަލި އަރައި މިންވަރު އިތުރުވުން އެކަށީގެންވެއެވެ. ނަމަވެސް ދެކުނު ސަރަޙައްދުތަކުގައި ބަލި ފެތުރޭ މިންވަރު ކުއްލިއަކަށް އިތުރުވެފައިވަނީ އެ ސަބަބާއިހުރެކަމަށް ޔަޤީނެއް ނުވެއެވެ.
ކޯވިޑް ޖެނޯމިކްސް ޔޫކޭ ކޮންސޯޓިއަމްގެ ސައިންސްވެރިން ނެރުނު ބަޔާނެއްގައި ބުނީ ބަލި ފެތުރޭ މިންވަރު އިތުރުވެފައިވުމާއި ވައިރަހުގެ ސިފައަށް އައިސްފައިވާ ބަދަލާއިމެދު އެއްވެސް ގުޅުމެއް ވޭތޯ ޔަޤީންކުރުމުގެ މަސައްކަތް ކުރިއަށްދާކަމަށެވެ.
ވައިރަހަށް ބަދަލު އައުމުގެ ސަބަބުން ބަލިޖެހޭ މީހުންގެ ޙާލަތު އިތުރަށް ގޯސްވާކަމުގެ އެއްވެސް ހެއްކެއްވެސް މިހާތަނަށް ލިބިފައެއް ނުވެއެވެ. އަދި ބައްޔާއި ދެކޮޅަށް ތައްޔާރުކޮށްފައިވާ ވެކްސިންތަކުގެ އަސަރު ވައިރަހުގެ އެ ބާވަތަށް ނުކުރާނެކަމުގެ ހެއްކެއްވެސް މިހާތަނަށް ފެނިފައެއް ނުވެއެވެ. ނަމަވެސް ދެ ދާއިރާއާއިގުޅޭ އިތުރު ދިރާސާތައް ކުރުން މުހިންމުކަމުގައި ޔޫކޭ ކޮންސޯޓިއަމުންވަނީ ބުނެފައެވެ.
އިނގިރޭސިވިލާތުގައި މިހާތަނަށް 1.8 މިލިއަން މީހުންނަށް ކޯވިޑް ޖެހި 65،000 އާއި ގާތްކުރާ ޢަދަދަކަށް މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައިވެސް އެ ޤައުމުގައި 18،450 މީހުންނަށް ބަލިޖެހި، 506 މީހުންވަނީ މަރުވެފައެވެ.