ނައިޖީރިއާގެ ހުޅަނގު އުތުރުގެ ސަރަޙައްދެއްގައި ހުރި ސާނަވީ ތަޢުލީމުދޭ މަދަރުސާއަކަށް ބަޑި ހިފައިގެން ތިބި ބަޔަކު ވަދެ، މިމަހުގެ 12ވަނަ ދުވަހުގައި ދިން ޙަމަލާގެ ޒިންމާ ބޯކޯ ހަރާމުން ނަގައިފިއެވެ.
ބޯކޯ ހަރާމުގެ އިސްވެރިޔާކަމަށް ދަޢުވާކުރާ ފަރާތަކުންވަނީ ނައިޖީރިޔާގެ ކަޓްސިނާ ސްޓޭޓުގައި ހުންނަ 800އަށްވުރެ ގިނަ ދަރިވަރުން ކިޔަވަމުންދާ ސަރުކާރުގެ ސައިން ސެކަންޑަރީ ސްކޫލަށް ޙަމަލާ ދީފައިވަނީ އެ ޖަމާޢަތުންކަމަށް ބުނެ އޯޑިއޯ ކުލިޕެއް އާންމުކޮށްފައެވެ. ނަމަވެސް އޭނާގެ ވާހަކައަށް ބާރުދޭ ހެއްކެއް ދައްކާފައެއް ނުވެއެވެ. އެ ހާދިޘާގައި އެ މަދަރުސާގައި ތަޢުލީމު ޙާޞިލްކުރަމުންދިޔަ އެތައް ދަރިވަރުންނެއްވަނީ ވަގަށް ނަގައިފައެވެ. ވަގަށް ނަގާފައިވާ ދަރިވަރުންގެ ޖުމްލަ ޢަދަދު މިހާތަނަށް ސާފުވެފައެއްނުވެއެވެ. އަސްކަރިއްޔާގެ ތަރުޖަމާނު، ޖެނެރަލް ޖޯން އެނެންޝޭ ވިދާޅުވީ 333 ދަރިވަރުންނަށް ވީނުވީއެއް ނޭނގި ގެއްލިފައިވާކަމަށެވެ.
ކަޓްސިނާ ސްޓޭޓުގެ ގަވަރުނަރު، އަމީނު ބެއްލޯ މަސާރީވަނީ ކުދިން ވަގަށް ނެގި މީހުން ސަރުކާރާއި ގުޅާފައިވާކަމަށް ވިދާޅުވެފައެވެ. އެ ކުދިންގެ ރައްކާތެރިކަން ކަށަވަރުކުރުމަށާއި ވީ އެންމެ އަވަހަށް އެ ކުދިން ސަލާމަތްކުރުމަށް ހަމަލާ ދިން ފަރާތާއި މަޝްވަރާތައް ކުރަމުންދާކަމަށް އޭނާ ވިދާޅުވިއެވެ. ނަމަވެސް އެއީ ކޮން ބައެއްކަން އޭނާ ހާމަކުރައްވާފައެއް ނުވެއެވެ.
ނައިޖީރިއާގެ ރައީސް މުޙައްމަދު ބުޚާރީވަނީ މަދަރުސާއަށް ދިން ޙަމަލާ ހަރުކަށި އިބާރާތުން ކުށްވެރިކުރައްވާފައެވެ. އަދި މަދަރުސާގައި ކިޔަވާ ދަރިވަރުންގެ ތެރެއިން ގެއްލިފައިވާ ދަރިވަރުންގެ ޢަދަދު ޔަޤީންކުރުމަށް ރައީސް ބުޚާރީވަނީ އެ މަދަރުސާއަށް އަންގަވައިފައެވެ. ހާދިޘާ ހިންގުމުން ދަރިވަރުން އަނބުރާ ގެއަށް ގެންދިޔަ ބެލެނިވެރިންވެސް މަދަރުސާއަށް އެކަން އެންގުމަށްވަނީ އިރުޝާދުދީފައެވެ.
ބޯކޯ ހަރާމާއި އެ ޖަމާޢަތުގެ ފެކްޝަނެއް ކަމުގައިވާ އައިއެސްޑަބްލިއުއޭޕީން ނައިޖީރިއާގެ ހުޅަނގު ދެކުނު ސަރަޙައްދުގައިއާއި އެ ޤައުމުގެ އަވަށްޓެރި ކެމެރޫނާއި ޗޭޑް އަދި ނައިޖާގައި ޙަރަކާތްތެރިވަމުންދާތާ ގިނަ އަހަރުތަކެއްވަނީ ވެފައެވެ. އެ ޖަމާޢަތްތަކުންވަނީ އަނިޔާވެރި ގިނަ ޙަމަލާތައް އެ ޤައުމުތަކުގައި ދީފައެވެ. ހުޅަނގުގެ ތަޢުލީމަކީ މަނާ ތަޢުލީމެއްކަމުގައި ޤަބޫލުކުރާ ބޯކޯ ހަރާމުން 2014ވަނަ އަހަރުގައިވެސްވަނީ ނައިޖީރިއާގެ ޝިބޮކްގައި ހުންނަ މަދަރުސާއަކުން އެތައް ސަތޭކަ އަންހެން ކުދިން ވަގަށް ނަގައިފައެވެ.