މޮޑާނާއިން ތައްޔާރުކޮށްފައިވާ ކޯވިޑް-19 ވެކްސިނަކީ ރައްކާތެރި ވެކްސިނެއްކަމަށާއި އެ ވެކްސިންގެ ކާމިޔާބީގެ ނިސްބަތަކީ 94 އިންސައްތަކަމަށް އެމެރިކާގެ ފުޑް އެންޑް ޑްރަގް އޮތޯރިޓީ (އެފްޑީއޭ)އިން ބުނެފިއެވެ. އެފްޑީއޭއިން އެހެން ބުނެފައިވަނީ ފައިޒާ އާއި ބަޔޯއެންޓެކުން އުފައްދާފައިވާ ކޯވިޑް ވެކްސިން އެމެރިކާގެ ރައްޔިތުންނަށް ދޭން ފެށިތާ އެއް ދުވަހުގެ ތެރޭގައެވެ. އެއާއިއެކު މޮޑާނާގެ ވެކްސިނަކީ ކުއްލި ޙަލަތުގައި ބޭނުންކުރުމުގެ ޙުއްދަދޭ ދެވަނަ ކޯވިޑް ވެކްސިނަށް ވާނެކަމަށް ބެލެވެއެވެ.
30،000 މީހުން ބައިވެރިވި ވެކްސިންގެ ތަޙްލީލުތަކުގެ ނަތީޖާއިން ދެއްކި ގޮތުގައި ވެކްސިން ދިން މީހުންގެ ތެރެއިން 94.1 އިންސައްތަ މީހުންނަށް ވައިރަހުގެ އަސަރުކޮށްފައެއް ނުވެއެވެ. ވެކްސިން ދިނުމުން ހުން އައުމާއި ބޮލުގައި ރިއްސުމާއި މަސްގުޅަ ކެއުމާއި ގައިގައި ރިއްސުންފަދަ ބައެއް ކަންކަން ދިމާވެއެވެ.
މޮޑާނާގެ ވެކްސިނާއި ގުޅޭގޮތުން އެފްޑީއޭއިން ނެރުނު 54 ޞަފްހާގެ ލިޔުމެއްގައި ބުނީ ވެކްސިންގެ ރައްކާތެރިކަމާއިމެދު ކަންބޮޑުވާފަދަ ޚާއްޞަ ކަމެއް އެ އިދާރާއަށް ފާހަގަވެފައި ނުވާކަމަށެވެ. އަދި އެ ވެކްސިން ދިނުމުން ނޭދެވޭ ބޮޑެތި އަސަރުތައް ކުރާކަމަށް ފާހަގަވެފައިނުވާކަމަށެވެ.
އެމެރިކާގައި މިހާރު ދޭން ފަށާފައިވާ ފައިޒާގެ ވެކްސިން ގުދަން ކުރާ މާހައުލުގައި މައިނަސް 70 ޑިގްރީގެ ފިނިމިން ހުންނަން ޖެހެއެވެ. ފައިޒާގެ ވެކްސިނާއި ޚިލާފަށް މޮޑާނާގެ ވެކްސިން ރައްކާކޮށްފައި ބެހެއްޓުމަށް އާދަޔާ ޚިލާފަށް ފިނި މާހައުލެއް ބޭނުމެއް ނުވެއެވެ. އާދައިގެ ފުރިޖެއްގެ ގަނޑުކުރާ ބައިގައި މައިނަސް 20 ޑިގްރީގެ ފިނީގައި މޮޑާނާގެ ވެކްސިން ރައްކާކުރެވޭނެއެވެ.
މިހާތަނަށް އެންމެ ގިނަ ޢަދަދެއްގެ މީހުންނަށް ކޯވިޑް ޖެހި، އެ ބަލީގައި އެންމެ ގިނަ މީހުން މަރުވެފައިވަނީ އެމެރިކާގައެވެ. އެ ޤައުމުގައި ޖުމްލަ 16.9 މިލިއަން މީހުންނަށް ބަލިޖެހިފައިވާއިރު 308،147 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައިވެސް އެ ޤައުމުގައި 198،805 މީހުންނަށް ބަލިޖެހި 1،621 މީހުންވަނީ މަރުވެފައެވެ.