ނައިޖީރިޔާގެ ހުޅަނގު އުތުރުގެ ސަރަޙައްދެއްގައި ހުރި ސާނަވީ ތަޢުލީމުދޭ މަދަރުސާއަކަށް ބަޑި ހިފައިގެން ތިބި ބަޔަކު ވަދެ ދިން ޙަމަލާއެއްގައި އެތައް ސަތޭކަ ދަރިވަރުން ވީ ނުވީއެއް ނޭނގި ގެއްލިއްޖެއެވެ.
މޮޓޯ ސައިކަލުތަކެއްގައި އައި މިމީހުންގެ ޙަމަލާ ޢަމާޒުކޮށްފައިވަނީ ކަޓްސިނާ ސްޓޭޓުގައި ހުންނަ 800އަށްވުރެ ގިނަ ދަރިވަރުން ދިރިއުޅޭ ސަރުކާރުގެ ސައިން ސެކަންޑަރީ ސްކޫލަށެވެ. އެ ބޯޑިން ސްކޫލާއި ކައިރި ސަރަޙައްދުތަކުގައި ދިރިއުޅޭ ފަރާތްތަކުން ބުނީ އެ މަދަރުސާއަށް ދިން ޙަމަލާ އެއް ގަޑިއިރަށްވުރެ ގިނަ އިރަށް ދެމިގެންދިޔަކަމަށެވެ.
ޙަމަލާދޭން ފެށުމުން ގިނަ ޢަދަދެއްގެ ދަރިވަރުން މަދަރުސާ ދޫކޮށްވަނީ ފިލާފައެވެ. އޭގެ ތެރެއިން 200 އެއްހާ ކުދިން މިހާރުވަނީ އަނބުރާ މަދަރުސާއަށް އައިސްފައެވެ. ނަމަވެސް މަންޒަރު ދުށް ބައެއް މީހުން ބުނީ ޙަމަލާ ދިން މީހުން ބައެއް ދަރިވަރުން ރަހީނުކޮށްގެން ގެންދާ މަންޒަރު ފެނުނުކަމަށެވެ.
ނައިޖީރިޔާގެ އަސްކަރިއްޔާއިން ބުނީ ޙަމަލާދިން މީހުން ޖަންގަލީގައި ފިލާ ތިބޭ ސަރަޙައްދު ހޯދާފައިވާކަމަށާއި ސިފައިންނާއި ޙަމަލާ ދިން މީހުންނާއި ދެމެދު ޙަމަލާ ބަދަލުކޮށްފައިވާކަމަށެވެ. ނަމަވެސް އެ ޙަމަލާގެ ނަތީޖާއެއް މިހާތަނަށް ސާފެއް ނުވެއެވެ. އެއްވެސް ދަރިވަރަކު ޒަޚަމްވިކަން މިހާތަނަށް އެނގިފައެއް ނުވެއެވެ.
ނައިޖީރިއާގެ ރައީސް މުޙައްމަދު ބުޚާރީވަނީ މަދަރުސާއަށް ދިން ޙަމަލާ ހަރުކަށި އިބާރާތުން ކުށްވެރިކުރައްވާފައެވެ. އަދި މަދަރުސާގައި ކިޔަވާ ދަރިވަރުންގެ ތެރެއިން ގެއްލިފައިވާ ދަރިވަރުންގެ ޢަދަދު ޔަޤީންކުރުމަށް ރައީސް ބުޚާރީވަނީ އެ މަދަރުސާއަށް އަންގަވައިފައެވެ. ހާދިޘާ ހިންގުމުން ދަރިވަރުން އަނބުރާ ގެއަށް ގެންދިޔަ ބެލެނިވެރިންވެސް މަދަރުސާއަށް އެކަން އެންގުމަށްވަނީ އިރުޝާދުދީފައެވެ.